៩. ពុទ្ធសញ្ញកត្ថេរអបទានំ

៤៣. ‘‘ឧទេន្តំ សតរំសិំវ, បីតរំសិំវ ភាណុមំ;

វនន្តរគតំ សន្តំ, លោកជេដ្ឋំ នរាសភំ.

៤៤. ‘‘អទ្ទសំ សុបិនន្តេន, សិទ្ធត្ថំ លោកនាយកំ;

តត្ថ ចិត្តំ បសាទេត្វា, សុគតិំ ឧបបជ្ជហំ.

៤៥. ‘‘ចតុន្នវុតិតោ កប្បេ, យំ សញ្ញមលភិំ តទា;

ទុគ្គតិំ នាភិជានាមិ, ពុទ្ធសញ្ញាយិទំ ផលំ.

៤៦. ‘‘បដិសម្ភិទា ចតស្សោ…បេ… កតំ ពុទ្ធស្ស សាសនំ’’.

ឥត្ថំ សុទំ អាយស្មា ពុទ្ធសញ្ញកោ ថេរោ ឥមា គាថាយោ អភាសិត្ថាតិ.

ពុទ្ធសញ្ញកត្ថេរស្សាបទានំ នវមំ.