៣១. បទុមកេសរវគ្គោ

១. បទុមកេសរិយត្ថេរអបទានំ

១. ‘‘ឥសិសង្ឃេ អហំ បុព្ពេ, អាសិំ មាតង្គវារណោ;

មហេសីនំ បសាទេន, បទ្មកេសរមោកិរិំ.

២. ‘‘បច្ចេកជិនសេដ្ឋេសុ, ធុតរាគេសុ តាទិសុ;

តេសុ ចិត្តំ បសាទេត្វា, កប្បំ សគ្គម្ហិ មោទហំ.

៣. ‘‘ឯកនវុតិតោ កប្បេ, កេសរំ ឱកិរិំ តទា;

ទុគ្គតិំ នាភិជានាមិ, ពុទ្ធបូជាយិទំ ផលំ.

៤. ‘‘បដិសម្ភិទា ចតស្សោ, វិមោក្ខាបិ ច អដ្ឋិមេ;

ឆឡភិញ្ញា សច្ឆិកតា, កតំ ពុទ្ធស្ស សាសនំ’’.

ឥត្ថំ សុទំ អាយស្មា បទុមកេសរិយោ ថេរោ ឥមា គាថាយោ អភាសិត្ថាតិ.

បទុមកេសរិយត្ថេរស្សាបទានំ បឋមំ.

២. សព្ពគន្ធិយត្ថេរអបទានំ

៥. ‘‘គន្ធមាលំ មយា ទិន្នំ, វិបស្សិស្ស មហេសិនោ;

អទាសិំ ឧជុភូតស្ស, កោសេយ្យវត្ថមុត្តមំ.

៦. ‘‘ឯកនវុតិតោ កប្បេ, យំ វត្ថមទទិំ [គន្ធមទទិំ (ស្យា.)] បុរេ;

ទុគ្គតិំ នាភិជានាមិ, គន្ធទានស្សិទំ ផលំ.

៧. ‘‘ឥតោ បន្នរសេ កប្បេ, សុចេឡោ នាម ខត្តិយោ;

សត្តរតនសម្បន្នោ, ចក្កវត្តី មហព្ពលោ.

៨. ‘‘បដិសម្ភិទា ចតស្សោ…បេ… កតំ ពុទ្ធស្ស សាសនំ’’.

ឥត្ថំ សុទំ អាយស្មា សព្ពគន្ធិយោ ថេរោ ឥមា គាថាយោ អភាសិត្ថាតិ.

សព្ពគន្ធិយត្ថេរស្សាបទានំ ទុតិយំ.

៣. បរមន្នទាយកត្ថេរអបទានំ

៩. ‘‘កណិការំវ ជោតន្តំ, ឧទយន្តំវ ភាណុមំ;

វិបស្សិំ អទ្ទសំ ពុទ្ធំ, លោកជេដ្ឋំ នរាសភំ.

១០. ‘‘អញ្ជលិំ បគ្គហេត្វាន, អភិនេសិំ សកំ ឃរំ;

អភិនេត្វាន សម្ពុទ្ធំ, បរមន្នមទាសហំ.

១១. ‘‘ឯកនវុតិតោ កប្បេ, បរមន្នមទិំ [បរមន្នំ ទទិំ (សី.), បរមន្នមទំ (ស្យា.)] តទា;

ទុគ្គតិំ នាភិជានាមិ, បរមន្នស្សិទំ ផលំ.

១២. ‘‘បដិសម្ភិទា ចតស្សោ…បេ… កតំ ពុទ្ធស្ស សាសនំ’’.

ឥត្ថំ សុទំ អាយស្មា បរមន្នទាយកោ ថេរោ ឥមា គាថាយោ អភាសិត្ថាតិ.

បរមន្នទាយកត្ថេរស្សាបទានំ តតិយំ.

៤. ធម្មសញ្ញកត្ថេរអបទានំ

១៣. ‘‘វិបស្សិនោ ភគវតោ, មហាពោធិមហោ អហុ;

រុក្ខដ្ឋស្សេវ សម្ពុទ្ធោ, [រុក្ខដ្ឋេយេវ សម្ពុទ្ធេ (សី.), រុក្ខដ្ឋោ ឥវ សម្ពុទ្ធោ (អដ្ឋ.) ឯត្ថ រុក្ខដ្ឋស្សេវ ពោធិមហការជនស្ស សម្ពុទ្ធោ ចតុសច្ចំ បកាសេតីតិ អត្ថោបិ សក្កា ញាតុំ] លោកជេដ្ឋោ នរាសភោ [លោកជេដ្ឋេ នរាសភេ (សី.)].

១៤. ‘‘ភគវា តម្ហិ សមយេ, ភិក្ខុសង្ឃបុរក្ខតោ;

ចតុសច្ចំ បកាសេតិ, វាចាសភិមុទីរយំ.

១៥. ‘‘សង្ខិត្តេន ច ទេសេន្តោ, វិត្ថារេន ច ទេសយំ [ទេសយិ (ស្យា.), ភាសតិ (ក.)];

វិវដ្ដច្ឆទោ សម្ពុទ្ធោ, និព្ពាបេសិ មហាជនំ.

១៦. ‘‘តស្សាហំ ធម្មំ សុត្វាន, លោកជេដ្ឋស្ស តាទិនោ;

វន្ទិត្វា សត្ថុនោ បាទេ, បក្កាមិំ ឧត្តរាមុខោ.

១៧. ‘‘ឯកនវុតិតោ កប្បេ, យំ ធម្មមសុណិំ តទា;

ទុគ្គតិំ នាភិជានាមិ, ធម្មសវស្សិទំ ផលំ.

១៨. ‘‘តេត្តិំសម្ហិ ឥតោ កប្បេ, ឯកោ អាសិំ មហីបតិ;

សុតវា នាម នាមេន, ចក្កវត្តី មហព្ពលោ.

១៩. ‘‘បដិសម្ភិទា ចតស្សោ…បេ… កតំ ពុទ្ធស្ស សាសនំ’’.

ឥត្ថំ សុទំ អាយស្មា ធម្មសញ្ញកោ ថេរោ ឥមា គាថាយោ អភាសិត្ថាតិ.

ធម្មសញ្ញកត្ថេរស្សាបទានំ ចតុត្ថំ.

៥. ផលទាយកត្ថេរអបទានំ

២០. ‘‘ភាគីរថីនទីតីរេ, អហោសិ អស្សមោ តទា;

តមហំ អស្សមំ គច្ឆិំ, ផលហត្ថោ អបេក្ខវា.

២១. ‘‘វិបស្សិំ តត្ថ អទ្ទក្ខិំ, បីតរំសិំវ ភាណុមំ;

យំ មេ អត្ថិ ផលំ សព្ពំ, អទាសិំ សត្ថុនោ អហំ.

២២. ‘‘ឯកនវុតិតោ កប្បេ, យំ ផលំ អទទិំ តទា;

ទុគ្គតិំ នាភិជានាមិ, ផលទានស្សិទំ ផលំ.

២៣. ‘‘បដិសម្ភិទា ចតស្សោ…បេ… កតំ ពុទ្ធស្ស សាសនំ’’.

ឥត្ថំ សុទំ អាយស្មា ផលទាយកោ ថេរោ ឥមា គាថាយោ អភាសិត្ថាតិ.

ផលទាយកត្ថេរស្សាបទានំ បញ្ចមំ.

៦. សម្បសាទកត្ថេរអបទានំ

២៤. ‘‘‘នមោ តេ ពុទ្ធ វីរត្ថុ, វិប្បមុត្តោសិ សព្ពធិ;

ព្យសនម្ហិ [ព្យសនំ ហិ (សី.)] អនុប្បត្តោ, តស្ស មេ សរណំ ភវ’.

២៥. ‘‘សិទ្ធត្ថោ តស្ស ព្យាកាសិ, លោកេ អប្បដិបុគ្គលោ;

‘មហោទធិសមោ សង្ឃោ, អប្បមេយ្យោ អនុត្តរោ.

២៦. ‘‘‘តត្ថ ត្វំ វិរជេ ខេត្តេ, អនន្តផលទាយកេ;

សង្ឃេ ចិត្តំ បសាទេត្វា, សុពីជំ វាប [ចាបិ (សី.), វាបិ (ស្យា.)] រោបយ.

២៧. ‘‘ឥទំ វត្វាន សព្ពញ្ញូ, លោកជេដ្ឋោ នរាសភោ;

មមេវ អនុសាសិត្វា, វេហាសំ នភមុគ្គមិ.

២៨. ‘‘អចិរំ គតមត្តម្ហិ, សព្ពញ្ញុម្ហិ នរាសភេ;

មរណំ សមនុប្បត្តោ, តុសិតំ ឧបបជ្ជហំ.

២៩. ‘‘តទាហំ វិរជេ ខេត្តេ, អនន្តផលទាយកេ;

សង្ឃេ ចិត្តំ បសាទេត្វា, កប្បំ សគ្គម្ហិ មោទហំ.

៣០. ‘‘ចតុន្នវុតិតោ កប្បេ, បសាទមលភិំ តទា;

ទុគ្គតិំ នាភិជានាមិ, បសាទស្ស ឥទំ ផលំ.

៣១. ‘‘បដិសម្ភិទា ចតស្សោ…បេ… កតំ ពុទ្ធស្ស សាសនំ’’.

ឥត្ថំ សុទំ អាយស្មា សម្បសាទកោ ថេរោ ឥមា គាថាយោ អភាសិត្ថាតិ.

សម្បសាទកត្ថេរស្សាបទានំ ឆដ្ឋំ.

៧. អារាមទាយកត្ថេរអបទានំ

៣២. ‘‘សិទ្ធត្ថស្ស ភគវតោ, អារាមោ រោបិតោ មយា;

សន្ទច្ឆាយេសុ [សីតឆាយេសុ (ស្យា.), សន្តច្ឆាយេសុ (ក.)] រុក្ខេសុ, ឧបាសន្តេសុ បក្ខិសុ.

៣៣. ‘‘អទ្ទសំ វិរជំ ពុទ្ធំ, អាហុតីនំ បដិគ្គហំ;

អារាមំ អភិនាមេសិំ, លោកជេដ្ឋំ នរាសភំ.

៣៤. ‘‘ហដ្ឋោ ហដ្ឋេន ចិត្តេន, ផលំ បុប្ផមទាសហំ;

តតោ ជាតប្បសាទោវ, តំ វនំ បរិណាមយិំ.

៣៥. ‘‘ពុទ្ធស្ស យមិទំ ទាសិំ, វិប្បសន្នេន ចេតសា;

ភវេ និព្ពត្តមានម្ហិ, និព្ពត្តតិ ផលំ មម.

៣៦. ‘‘ចតុន្នវុតិតោ កប្បេ, យំ អារាមមទំ តទា;

ទុគ្គតិំ នាភិជានាមិ, អារាមស្ស ឥទំ ផលំ.

៣៧. ‘‘សត្តតិំសេ ឥតោ កប្បេ, សត្តាសុំ មុទុសីតលា;

សត្តរតនសម្បន្នា, ចក្កវត្តី មហព្ពលា.

៣៨. ‘‘បដិសម្ភិទា ចតស្សោ…បេ… កតំ ពុទ្ធស្ស សាសនំ’’.

ឥត្ថំ សុទំ អាយស្មា អារាមទាយកោ ថេរោ ឥមា គាថាយោ អភាសិត្ថាតិ.

អារាមទាយកត្ថេរស្សាបទានំ សត្តមំ.

៨. អនុលេបទាយកត្ថេរអបទានំ

៣៩. ‘‘អត្ថទស្សិស្ស មុនិនោ, អទ្ទសំ សាវកំ អហំ;

នវកម្មំ ករោន្តស្ស, សីមាយ ឧបគច្ឆហំ.

៤០. ‘‘និដ្ឋិតេ នវកម្មេ ច, អនុលេបមទាសហំ;

បសន្នចិត្តោ សុមនោ, បុញ្ញក្ខេត្តេ អនុត្តរេ.

៤១. ‘‘អដ្ឋារសេ កប្បសតេ, យំ កម្មមករិំ តទា;

ទុគ្គតិំ នាភិជានាមិ, អនុលេបស្សិទំ ផលំ.

៤២. ‘‘បដិសម្ភិទា ចតស្សោ…បេ… កតំ ពុទ្ធស្ស សាសនំ’’.

ឥត្ថំ សុទំ អាយស្មា អនុលេបទាយកោ ថេរោ ឥមា គាថាយោ អភាសិត្ថាតិ.

អនុលេបទាយកត្ថេរស្សាបទានំ អដ្ឋមំ.

៩. ពុទ្ធសញ្ញកត្ថេរអបទានំ

៤៣. ‘‘ឧទេន្តំ សតរំសិំវ, បីតរំសិំវ ភាណុមំ;

វនន្តរគតំ សន្តំ, លោកជេដ្ឋំ នរាសភំ.

៤៤. ‘‘អទ្ទសំ សុបិនន្តេន, សិទ្ធត្ថំ លោកនាយកំ;

តត្ថ ចិត្តំ បសាទេត្វា, សុគតិំ ឧបបជ្ជហំ.

៤៥. ‘‘ចតុន្នវុតិតោ កប្បេ, យំ សញ្ញមលភិំ តទា;

ទុគ្គតិំ នាភិជានាមិ, ពុទ្ធសញ្ញាយិទំ ផលំ.

៤៦. ‘‘បដិសម្ភិទា ចតស្សោ…បេ… កតំ ពុទ្ធស្ស សាសនំ’’.

ឥត្ថំ សុទំ អាយស្មា ពុទ្ធសញ្ញកោ ថេរោ ឥមា គាថាយោ អភាសិត្ថាតិ.

ពុទ្ធសញ្ញកត្ថេរស្សាបទានំ នវមំ.

១០. បព្ភារទាយកត្ថេរអបទានំ

៤៧. ‘‘បិយទស្សិនោ ភគវតោ, បព្ភារោ សោធិតោ មយា;

ឃដកញ្ច ឧបដ្ឋាសិំ, បរិភោគាយ តាទិនោ.

៤៨. ‘‘តំ មេ ពុទ្ធោ វិយាកាសិ, បិយទស្សី មហាមុនិ;

សហស្សកណ្ឌោ សតភេណ្ឌុ [សតគេណ្ឌុ (ស្យា. ក.)], ធជាលុ ហរិតាមយោ.

៤៩. ‘‘និព្ពត្តិស្សតិ សោ យូបោ, រតនញ្ច អនប្បកំ;

បព្ភារទានំ ទត្វាន, កប្បំ សគ្គម្ហិ មោទហំ.

៥០. ‘‘ឥតោ ពាត្តិំសកប្បម្ហិ, សុសុទ្ធោ នាម ខត្តិយោ;

សត្តរតនសម្បន្នោ, ចក្កវត្តី មហព្ពលោ.

៥១. ‘‘បដិសម្ភិទា ចតស្សោ…បេ… កតំ ពុទ្ធស្ស សាសនំ’’.

ឥត្ថំ សុទំ អាយស្មា បព្ភារទាយកោ ថេរោ ឥមា គាថាយោ អភាសិត្ថាតិ.

បព្ភារទាយកត្ថេរស្សាបទានំ ទសមំ.

បទុមកេសរវគ្គោ ឯកតិំសតិមោ.