៥. ផលទាយកត្ថេរអបទានំ

២០. ‘‘ភាគីរថីនទីតីរេ, អហោសិ អស្សមោ តទា;

តមហំ អស្សមំ គច្ឆិំ, ផលហត្ថោ អបេក្ខវា.

២១. ‘‘វិបស្សិំ តត្ថ អទ្ទក្ខិំ, បីតរំសិំវ ភាណុមំ;

យំ មេ អត្ថិ ផលំ សព្ពំ, អទាសិំ សត្ថុនោ អហំ.

២២. ‘‘ឯកនវុតិតោ កប្បេ, យំ ផលំ អទទិំ តទា;

ទុគ្គតិំ នាភិជានាមិ, ផលទានស្សិទំ ផលំ.

២៣. ‘‘បដិសម្ភិទា ចតស្សោ…បេ… កតំ ពុទ្ធស្ស សាសនំ’’.

ឥត្ថំ សុទំ អាយស្មា ផលទាយកោ ថេរោ ឥមា គាថាយោ អភាសិត្ថាតិ.

ផលទាយកត្ថេរស្សាបទានំ បញ្ចមំ.