៣. បរមន្នទាយកត្ថេរអបទានំ

៩. ‘‘កណិការំវ ជោតន្តំ, ឧទយន្តំវ ភាណុមំ;

វិបស្សិំ អទ្ទសំ ពុទ្ធំ, លោកជេដ្ឋំ នរាសភំ.

១០. ‘‘អញ្ជលិំ បគ្គហេត្វាន, អភិនេសិំ សកំ ឃរំ;

អភិនេត្វាន សម្ពុទ្ធំ, បរមន្នមទាសហំ.

១១. ‘‘ឯកនវុតិតោ កប្បេ, បរមន្នមទិំ [បរមន្នំ ទទិំ (សី.), បរមន្នមទំ (ស្យា.)] តទា;

ទុគ្គតិំ នាភិជានាមិ, បរមន្នស្សិទំ ផលំ.

១២. ‘‘បដិសម្ភិទា ចតស្សោ…បេ… កតំ ពុទ្ធស្ស សាសនំ’’.

ឥត្ថំ សុទំ អាយស្មា បរមន្នទាយកោ ថេរោ ឥមា គាថាយោ អភាសិត្ថាតិ.

បរមន្នទាយកត្ថេរស្សាបទានំ តតិយំ.