១. បទុមកេសរិយត្ថេរអបទានំ

១. ‘‘ឥសិសង្ឃេ អហំ បុព្ពេ, អាសិំ មាតង្គវារណោ;

មហេសីនំ បសាទេន, បទ្មកេសរមោកិរិំ.

២. ‘‘បច្ចេកជិនសេដ្ឋេសុ, ធុតរាគេសុ តាទិសុ;

តេសុ ចិត្តំ បសាទេត្វា, កប្បំ សគ្គម្ហិ មោទហំ.

៣. ‘‘ឯកនវុតិតោ កប្បេ, កេសរំ ឱកិរិំ តទា;

ទុគ្គតិំ នាភិជានាមិ, ពុទ្ធបូជាយិទំ ផលំ.

៤. ‘‘បដិសម្ភិទា ចតស្សោ, វិមោក្ខាបិ ច អដ្ឋិមេ;

ឆឡភិញ្ញា សច្ឆិកតា, កតំ ពុទ្ធស្ស សាសនំ’’.

ឥត្ថំ សុទំ អាយស្មា បទុមកេសរិយោ ថេរោ ឥមា គាថាយោ អភាសិត្ថាតិ.

បទុមកេសរិយត្ថេរស្សាបទានំ បឋមំ.