៦. ឧបដ្ឋាកទាយកត្ថេរអបទានំ

២៤. ‘‘រថិយំ បដិបជ្ជន្តំ, អាហុតីនំ បដិគ្គហំ;

ទ្វិបទិន្ទំ មហានាគំ, លោកជេដ្ឋំ នរាសភំ.

២៥. ‘‘បក្កោសាបិយ តស្សាហំ, សព្ពលោកហិតេសិនោ;

ឧបដ្ឋាកោ មយា ទិន្នោ, សិទ្ធត្ថស្ស មហេសិនោ.

២៦. ‘‘បដិគ្គហេត្វា [បដិគ្គហេសិ (ក.)] សម្ពុទ្ធោ, និយ្យាទេសិ មហាមុនិ [មហាឥសិ (ក.)];

ឧដ្ឋាយ អាសនា តម្ហា, បក្កាមិ បាចិនាមុខោ.

២៧. ‘‘ចតុន្នវុតិតោ កប្បេ, ឧបដ្ឋាកមទំ តទា;

ទុគ្គតិំ នាភិជានាមិ, ឧបដ្ឋានស្សិទំ ផលំ.

២៨. ‘‘សត្តបញ្ញាសិតោ កប្បេ, ពលសេនសនាមកោ;

សត្តរតនសម្បន្នោ, ចក្កវត្តី មហព្ពលោ.

២៩. ‘‘បដិសម្ភិទា ចតស្សោ…បេ… កតំ ពុទ្ធស្ស សាសនំ’’.

ឥត្ថំ សុទំ អាយស្មា ឧបដ្ឋាកទាយកោ ថេរោ ឥមា គាថាយោ អភាសិត្ថាតិ.

ឧបដ្ឋាកទាយកត្ថេរស្សាបទានំ ឆដ្ឋំ.