២៨. សុវណ្ណពិព្ពោហនវគ្គោ

១. សុវណ្ណពិព្ពោហនិយត្ថេរអបទានំ

១. ‘‘ឯកាសនំ អហមទំ, បសន្នោ សេហិ បាណិភិ;

ពិព្ពោហនញ្ច [ពិម្ពោហនញ្ច (សី. បី.)] បាទាសិំ, ឧត្តមត្ថស្ស បត្តិយា.

២. ‘‘ឯកនវុតិតោ កប្បេ, ពិព្ពោហនមទាសហំ;

ទុគ្គតិំ នាភិជានាមិ, ពិព្ពោហនស្សិទំ ផលំ.

៣. ‘‘ឥតោ តេសដ្ឋិមេ កប្បេ, អសមោ នាម ខត្តិយោ;

សត្តរតនសម្បន្នោ, ចក្កវត្តី មហព្ពលោ.

៤. ‘‘បដិសម្ភិទា ចតស្សោ, វិមោក្ខាបិ ច អដ្ឋិមេ;

ឆឡភិញ្ញា សច្ឆិកតា, កតំ ពុទ្ធស្ស សាសនំ’’.

ឥត្ថំ សុទំ អាយស្មា សុវណ្ណពិព្ពោហនិយោ ថេរោ ឥមា គាថាយោ អភាសិត្ថាតិ.

សុវណ្ណពិព្ពោហនិយត្ថេរស្សាបទានំ បឋមំ.

២. តិលមុដ្ឋិទាយកត្ថេរអបទានំ

៥. ‘‘មម សង្កប្បមញ្ញាយ, សត្ថា លោកគ្គនាយកោ;

មនោមយេន កាយេន, ឥទ្ធិយា ឧបសង្កមិ.

៦. ‘‘សត្ថារំ ឧបសង្កន្តំ, វន្ទិត្វា បុរិសុត្តមំ;

បសន្នចិត្តោ សុមនោ, តិលមុដ្ឋិមទាសហំ.

៧. ‘‘ឯកនវុតិតោ កប្បេ, យំ ទានមទទិំ តទា;

ទុគ្គតិំ នាភិជានាមិ, តិលមុដ្ឋិយិទំ ផលំ.

៨. ‘‘ឥតោ សោឡសកប្បម្ហិ, តន្តិសោ [ខន្តិយោ (ស្យា.)] នាម ខត្តិយោ;

សត្តរតនសម្បន្នោ, ចក្កវត្តី មហព្ពលោ.

៩. ‘‘បដិសម្ភិទា ចតស្សោ…បេ… កតំ ពុទ្ធស្ស សាសនំ’’.

ឥត្ថំ សុទំ អាយស្មា តិលមុដ្ឋិទាយកោ ថេរោ ឥមា គាថាយោ អភាសិត្ថាតិ.

តិលមុដ្ឋិទាយកត្ថេរស្សាបទានំ ទុតិយំ.

៣. ចង្កោដកិយត្ថេរអបទានំ

១០. ‘‘មហាសមុទ្ទំ និស្សាយ, វសតី បព្ពតន្តរេ;

បច្ចុគ្គន្ត្វាន កត្វាន [បច្ចុគ្គន្ត្វាន’កាសហំ (អដ្ឋ.), បច្ចុគ្គមនំ កត្វាន (?)], ចង្កោដក [ចង្គោដក (សី.)] មទាសហំ.

១១. ‘‘សិទ្ធត្ថស្ស មហេសិនោ, សព្ពសត្តានុកម្បិនោ [សយម្ភុស្សានុកម្បិនោ (ស្យា.)];

បុប្ផចង្កោដកំ ទត្វា, កប្បំ សគ្គម្ហិ មោទហំ.

១២. ‘‘ចតុន្នវុតិតោ កប្បេ, ចង្កោដកមទំ តទា;

ទុគ្គតិំ នាភិជានាមិ, ចង្កោដកស្សិទំ ផលំ.

១៣. ‘‘បដិសម្ភិទា ចតស្សោ…បេ… កតំ ពុទ្ធស្ស សាសនំ’’.

ឥត្ថំ សុទំ អាយស្មា ចង្កោដកិយោ ថេរោ ឥមា គាថាយោ អភាសិត្ថាតិ.

ចង្កោដកិយត្ថេរស្សាបទានំ តតិយំ.

៤. អព្ភញ្ជនទាយកត្ថេរអបទានំ

១៤. ‘‘កោណ្ឌញ្ញស្ស ភគវតោ, វីតរាគស្ស តាទិនោ;

អាកាសសមចិត្តស្ស [អកក្កសចិត្តស្សាថ (អដ្ឋ.)], និប្បបញ្ចស្ស ឈាយិនោ.

១៥. ‘‘សព្ពមោហាតិវត្តស្ស, សព្ពលោកហិតេសិនោ;

អព្ភញ្ជនំ មយា ទិន្នំ, ទ្វិបទិន្ទស្ស តាទិនោ.

១៦. ‘‘អបរិមេយ្យេ ឥតោ កប្បេ, អព្ភញ្ជនមទំ តទា [អម្ភញ្ជនមទាសហំ (ស្យា.)];

ទុគ្គតិំ នាភិជានាមិ, អព្ភញ្ជនស្សិទំ ផលំ.

១៧. ‘‘ឥតោ បន្នរសេ កប្បេ, ចិរប្បោ នាម ខត្តិយោ;

សត្តរតនសម្បន្នោ, ចក្កវត្តី មហព្ពលោ.

១៨. ‘‘បដិសម្ភិទា ចតស្សោ…បេ… កតំ ពុទ្ធស្ស សាសនំ’’.

ឥត្ថំ សុទំ អាយស្មា អព្ភញ្ជនទាយកោ ថេរោ ឥមា គាថាយោ អភាសិត្ថាតិ.

អព្ភញ្ជនទាយកត្ថេរស្សាបទានំ ចតុត្ថំ.

៥. ឯកញ្ជលិកត្ថេរអបទានំ

១៩. ‘‘ឧទុម្ពរេ វសន្តស្ស, និយតេ បណ្ណសន្ថរេ;

វុត្ថោកាសោ មយា ទិន្នោ, សមណស្ស មហេសិនោ.

២០. ‘‘តិស្សស្ស ទ្វិបទិន្ទស្ស, លោកនាថស្ស តាទិនោ;

អញ្ជលិំ បគ្គហេត្វាន, សន្ថរិំ បុប្ផសន្ថរំ.

២១. ‘‘ទ្វេនវុតេ ឥតោ កប្បេ, យំ ករិំ បុប្ផសន្ថរំ;

ទុគ្គតិំ នាភិជានាមិ, សន្ថរស្ស ឥទំ ផលំ.

២២. ‘‘ឥតោ ចុទ្ទសកប្បម្ហិ, អហោសិំ មនុជាធិបោ;

ឯកអញ្ជលិកោ នាម, ចក្កវត្តី មហព្ពលោ.

២៣. ‘‘បដិសម្ភិទា ចតស្សោ…បេ… កតំ ពុទ្ធស្ស សាសនំ’’.

ឥត្ថំ សុទំ អាយស្មា ឯកញ្ជលិកោ ថេរោ ឥមា គាថាយោ អភាសិត្ថាតិ.

ឯកញ្ជលិកត្ថេរស្សាបទានំ បញ្ចមំ.

៦. បោត្ថកទាយកត្ថេរអបទានំ

២៤. ‘‘សត្ថារំ ធម្មមារព្ភ, សង្ឃញ្ចាបិ មហេសិនំ;

បោត្ថទានំ មយា ទិន្នំ, ទក្ខិណេយ្យេ អនុត្តរេ.

២៥. ‘‘ឯកនវុតិតោ កប្បេ, យំ កម្មមករិំ តទា;

ទុគ្គតិំ នាភិជានាមិ, បោត្ថទានស្សិទំ ផលំ.

២៦. ‘‘បដិសម្ភិទា ចតស្សោ…បេ… កតំ ពុទ្ធស្ស សាសនំ’’.

ឥត្ថំ សុទំ អាយស្មា បោត្ថកទាយកោ ថេរោ ឥមា គាថាយោ អភាសិត្ថាតិ.

បោត្ថកទាយកត្ថេរស្សាបទានំ ឆដ្ឋំ.

៧. ចិតកបូជកត្ថេរអបទានំ

២៧. ‘‘ចន្ទភាគានទីតីរេ, អនុសោតំ វជាមហំ;

សត្ត មាលុវបុប្ផានិ, ចិតមារោបយិំ អហំ.

២៨. ‘‘ចតុន្នវុតិតោ កប្បេ, ចិតកំ យមបូជយិំ;

ទុគ្គតិំ នាភិជានាមិ, ចិតបូជាយិទំ ផលំ.

២៩. ‘‘សត្តសដ្ឋិម្ហិតោ កប្បេ, បដិជគ្គសនាមកា;

សត្តរតនសម្បន្នា, សត្តាសុំ ចក្កវត្តិនោ [បដិជគ្គសនាមកោ; សត្តរតនសម្បន្នោ, ចក្កវត្តី មហព្ពលោ (ស្យា.)].

៣០. ‘‘បដិសម្ភិទា ចតស្សោ…បេ… កតំ ពុទ្ធស្ស សាសនំ’’.

ឥត្ថំ សុទំ អាយស្មា ចិតកបូជកោ ថេរោ ឥមា គាថាយោ អភាសិត្ថាតិ.

ចិតកបូជកត្ថេរស្សាបទានំ សត្តមំ.

៨. អាលុវទាយកត្ថេរអបទានំ

៣១. ‘‘បព្ពតេ ហិមវន្តម្ហិ, មហាសិន្ធុ សុទស្សនា;

តត្ថទ្ទសំ វីតរាគំ, សុប្បភាសំ សុទស្សនំ.

៣២. ‘‘បរមោបសមេ យុត្តំ, ទិស្វា វិម្ហិតមានសោ;

អាលុវំ តស្ស បាទាសិំ, បសន្នោ សេហិ បាណិភិ.

៣៣. ‘‘ឯកត្តិំសេ ឥតោ កប្បេ, យំ ផលមទទិំ តទា;

ទុគ្គតិំ នាភិជានាមិ, អាលុវស្ស ឥទំ ផលំ.

៣៤. ‘‘បដិសម្ភិទា ចតស្សោ…បេ… កតំ ពុទ្ធស្ស សាសនំ’’.

ឥត្ថំ សុទំ អាយស្មា អាលុវទាយកោ ថេរោ ឥមា គាថាយោ អភាសិត្ថាតិ.

អាលុវទាយកត្ថេរស្សាបទានំ អដ្ឋមំ.

៩. ឯកបុណ្ឌរីកត្ថេរអបទានំ

៣៥. ‘‘រោមសោ នាម នាមេន, សយម្ភូ សុព្ពតោ [សប្បភោ (ស្យា.)] តទា;

បុណ្ឌរីកំ មយា ទិន្នំ, វិប្បសន្នេន ចេតសា.

៣៦. ‘‘ចតុន្នវុតិតោ កប្បេ, បុណ្ឌរីកមទំ តទា;

ទុគ្គតិំ នាភិជានាមិ, បុណ្ឌរីកស្សិទំ ផលំ.

៣៧. ‘‘បដិសម្ភិទា ចតស្សោ…បេ… កតំ ពុទ្ធស្ស សាសនំ’’.

ឥត្ថំ សុទំ អាយស្មា ឯកបុណ្ឌរីកោ ថេរោ ឥមា គាថាយោ អភាសិត្ថាតិ.

ឯកបុណ្ឌរីកត្ថេរស្សាបទានំ នវមំ.

១០. តរណីយត្ថេរអបទានំ

៣៨. ‘‘មហាបថម្ហិ វិសមេ, សេតុ ការាបិតោ មយា;

តរណត្ថាយ លោកស្ស, បសន្នោ សេហិ បាណិភិ.

៣៩. ‘‘ឯកនវុតិតោ កប្បេ, យោ សេតុ ការិតោ មយា;

ទុគ្គតិំ នាភិជានាមិ, សេតុទានស្សិទំ ផលំ.

៤០. ‘‘បញ្ចបញ្ញាសិតោ កប្បេ, ឯកោ អាសិំ សមោគធោ;

សត្តរតនសម្បន្នោ, ចក្កវត្តី មហព្ពលោ.

៤១. ‘‘បដិសម្ភិទា ចតស្សោ…បេ… កតំ ពុទ្ធស្ស សាសនំ’’.

ឥត្ថំ សុទំ អាយស្មា តរណីយោ ថេរោ ឥមា គាថាយោ អភាសិត្ថាតិ.

តរណីយត្ថេរស្សាបទានំ ទសមំ.

សុវណ្ណពិព្ពោហនវគ្គោ អដ្ឋវីសតិមោ.