៨. សឡលបុប្ផិយត្ថេរអបទានំ

៣០. ‘‘ចន្ទភាគានទីតីរេ, អហោសិំ កិន្នរោ តទា;

វិបស្សិំ អទ្ទសំ ពុទ្ធំ, រំសិជាលសមាកុលំ.

៣១. ‘‘បសន្នចិត្តោ សុមនោ, បរមាយ ច បីតិយា;

បគ្គយ្ហ សឡលំ បុប្ផំ, វិបស្សិំ ឱកិរិំ អហំ.

៣២. ‘‘ឯកនវុតិតោ កប្បេ, យំ បុប្ផមភិបូជយិំ;

ទុគ្គតិំ នាភិជានាមិ, ពុទ្ធបូជាយិទំ ផលំ.

៣៣. ‘‘បដិសម្ភិទា ចតស្សោ…បេ… កតំ ពុទ្ធស្ស សាសនំ’’.

ឥត្ថំ សុទំ អាយស្មា សឡលបុប្ផិយោ ថេរោ ឥមា គាថាយោ អភាសិត្ថាតិ.

សឡលបុប្ផិយត្ថេរស្សាបទានំ អដ្ឋមំ.