៤. បទីបទាយកត្ថេរអបទានំ

១៤. ‘‘ទេវភូតោ អហំ សន្តោ, ឱរុយ្ហ បថវិំ តទា;

បទីបេ បញ្ច បាទាសិំ, បសន្នោ សេហិ បាណិភិ.

១៥. ‘‘ចតុន្នវុតិតោ កប្បេ, យំ បទីបមទំ តទា;

ទុគ្គតិំ នាភិជានាមិ, ទីបទានស្សិទំ ផលំ.

១៦. ‘‘បញ្ចបញ្ញាសកេ កប្បេ, ឯកោ អាសិំ មហីបតិ;

សមន្តចក្ខុនាមេន, ចក្កវត្តី មហព្ពលោ.

១៧. ‘‘បដិសម្ភិទា ចតស្សោ…បេ… កតំ ពុទ្ធស្ស សាសនំ’’.

ឥត្ថំ សុទំ អាយស្មា បទីបទាយកោ [អបណ្ណទីបិយោ (សី. ក.)] ថេរោ ឥមា គាថាយោ អភាសិត្ថាតិ.

បទីបទាយកត្ថេរស្សាបទានំ ចតុត្ថំ.