៥. ពិឡាលិទាយកត្ថេរអបទានំ

១៨. ‘‘ហិមវន្តស្សាវិទូរេ, រោមសោ នាម បព្ពតោ;

តម្ហិ បព្ពតបាទម្ហិ, សមណោ ភាវិតិន្ទ្រិយោ.

១៩. ‘‘ពិឡាលិយោ គហេត្វាន, សមណស្ស អទាសហំ;

អនុមោទិ មហាវីរោ, សយម្ភូ អបរាជិតោ.

២០. ‘‘ពិឡាលី តេ មម ទិន្នា, វិប្បសន្នេន ចេតសា;

ភវេ និព្ពត្តមានម្ហិ, ផលំ និព្ពត្តតំ តវ.

២១. ‘‘ចតុន្នវុតិតោ កប្បេ, យំ ពិឡាលិមទាសហំ;

ទុគ្គតិំ នាភិជានាមិ, ពិឡាលិយា ឥទំ ផលំ.

២២. ‘‘បដិសម្ភិទា ចតស្សោ…បេ… កតំ ពុទ្ធស្ស សាសនំ’’.

ឥត្ថំ សុទំ អាយស្មា ពិឡាលិទាយកោ ថេរោ ឥមា គាថាយោ អភាសិត្ថាតិ.

ពិឡាលិទាយកត្ថេរស្សាបទានំ បញ្ចមំ.