១. អាកាសុក្ខិបិយត្ថេរអបទានំ

១. ‘‘សុវណ្ណវណ្ណំ សិទ្ធត្ថំ, គច្ឆន្តំ អន្តរាបណេ;

ជលជគ្គេ ទុវេ គយ្ហ, ឧបាគច្ឆិំ នរាសភំ.

២. ‘‘ឯកញ្ច បុប្ផំ បាទេសុ, ពុទ្ធសេដ្ឋស្ស និក្ខិបិំ;

ឯកញ្ច បុប្ផំ បគ្គយ្ហ, អាកាសេ ឧក្ខិបិំ អហំ.

៣. ‘‘ចតុន្នវុតិតោ កប្បេ, យំ បុប្ផមភិរោបយិំ;

ទុគ្គតិំ នាភិជានាមិ, បុប្ផទានស្សិទំ ផលំ.

៤. ‘‘ឥតោ ឆត្តិំសកប្បម្ហិ, ឯកោ អាសិំ មហីបតិ;

អន្តលិក្ខករោ នាម, ចក្កវត្តី មហព្ពលោ.

៥. ‘‘បដិសម្ភិទា ចតស្សោ, វិមោក្ខាបិ ច អដ្ឋិមេ;

ឆឡភិញ្ញា សច្ឆិកតា, កតំ ពុទ្ធស្ស សាសនំ’’.

ឥត្ថំ សុទំ អាយស្មា អាកាសុក្ខិបិយោ ថេរោ ឥមា គាថាយោ អភាសិត្ថាតិ.

អាកាសុក្ខិបិយត្ថេរស្សាបទានំ បឋមំ.