៣. នឡិនកេសរិយត្ថេរអបទានំ

៩. ‘‘ជាតស្សរស្ស វេមជ្ឈេ, វសាមិ ជលកុក្កុដោ;

អទ្ទសាហំ [អថទ្ទសំ (សី. ស្យា.)] ទេវទេវំ, គច្ឆន្តំ អនិលញ្ជសេ.

១០. ‘‘តុណ្ឌេន កេសរិំ [កេសរំ (ស្យា.)] គយ្ហ, វិប្បសន្នេន ចេតសា;

ពុទ្ធស្ស អភិរោបេសិំ, តិស្សស្ស លោកពន្ធុនោ.

១១. ‘‘ទ្វេនវុតេ ឥតោ កប្បេ, យំ បុប្ផមភិបូជយិំ;

ទុគ្គតិំ នាភិជានាមិ, ពុទ្ធបូជាយិទំ ផលំ.

១២. ‘‘តេសត្តតិម្ហិ កប្បម្ហិ, សត្ត កេសរនាមកា [សតបត្តសនាមកោ (សី. ស្យា.)];

សត្តរតនសម្បន្នា, ចក្កវត្តី មហព្ពលា.

១៣. ‘‘បដិសម្ភិទា ចតស្សោ…បេ… កតំ ពុទ្ធស្ស សាសនំ’’.

ឥត្ថំ សុទំ អាយស្មា នឡិនកេសរិយោ ថេរោ ឥមា គាថាយោ អភាសិត្ថាតិ.

នឡិនកេសរិយត្ថេរស្សាបទានំ តតិយំ.