៧. តាលវណ្ដទាយកត្ថេរអបទានំ

៣១. ‘‘តាលវណ្ដំ មយា ទិន្នំ, តិស្សស្សាទិច្ចពន្ធុនោ;

គិម្ហនិព្ពាបនត្ថាយ, បរិឡាហោបសន្តិយា.

៣២. ‘‘សន្និព្ពាបេមិ រាគគ្គិំ, ទោសគ្គិញ្ច តទុត្តរិំ;

និព្ពាបេមិ ច មោហគ្គិំ, តាលវណ្ដស្សិទំ ផលំ.

៣៣. ‘‘កិលេសា ឈាបិតា មយ្ហំ, ភវា សព្ពេ សមូហតា;

ធារេមិ អន្តិមំ ទេហំ, សម្មាសម្ពុទ្ធសាសនេ.

៣៤. ‘‘ទ្វេនវុតេ ឥតោ កប្បេ, យំ កម្មមករិំ តទា;

ទុគ្គតិំ នាភិជានាមិ, តាលវណ្ដស្សិទំ ផលំ.

៣៥. ‘‘តេសដ្ឋិម្ហិ ឥតោ កប្បេ, មហានាមសនាមកោ;

សត្តរតនសម្បន្នោ, ចក្កវត្តី មហព្ពលោ.

៣៦. ‘‘បដិសម្ភិទា ចតស្សោ…បេ… កតំ ពុទ្ធស្ស សាសនំ’’.

ឥត្ថំ សុទំ អាយស្មា តាលវណ្ដទាយកោ ថេរោ ឥមា គាថាយោ អភាសិត្ថាតិ.

តាលវណ្ដទាយកត្ថេរស្សាបទានំ សត្តមំ.