៦. ឧទកទាយកត្ថេរអបទានំ

២៥. ‘‘ភុញ្ជន្តំ សមណំ ទិស្វា, វិប្បសន្នមនាវិលំ;

ឃដេនោទកមាទាយ, សិទ្ធត្ថស្ស អទាសហំ.

២៦. ‘‘និម្មលោ ហោមហំ អជ្ជ, វិមលោ ខីណសំសយោ;

ភវេ និព្ពត្តមានម្ហិ, ផលំ និព្ពត្តតេ មម [សុភំ (សី.)].

២៧. ‘‘ចតុន្នវុតិតោ កប្បេ, ឧទកំ យមទាសហំ [យំ តទា អទំ (សី.), អទទិំ តទា (ស្យា.)];

ទុគ្គតិំ នាភិជានាមិ, ទកទានស្សិទំ ផលំ.

២៨. ‘‘ឯកសដ្ឋិម្ហិតោ កប្បេ, ឯកោវ វិមលោ អហុ;

សត្តរតនសម្បន្នោ, ចក្កវត្តី មហព្ពលោ.

២៩. ‘‘បដិសម្ភិទា ចតស្សោ…បេ… កតំ ពុទ្ធស្ស សាសនំ’’.

ឥត្ថំ សុទំ អាយស្មា ឧទកទាយកោ ថេរោ ឥមា គាថាយោ អភាសិត្ថាតិ.

ឧទកទាយកត្ថេរស្សាបទានំ ឆដ្ឋំ.