៤. តរណិយត្ថេរអបទានំ

១៥. ‘‘អត្ថទស្សី តុ ភគវា, ទ្វិបទិន្ទោ នរាសភោ;

បុរក្ខតោ សាវកេហិ, គង្គាតីរមុបាគមិ.

១៦. ‘‘សមតិត្តិ កាកបេយ្យា, គង្គា អាសិ ទុរុត្តរា;

ឧត្តារយិំ ភិក្ខុសង្ឃំ, ពុទ្ធញ្ច ទ្វិបទុត្តមំ.

១៧. ‘‘អដ្ឋារសេ កប្បសតេ, យំ កម្មមករិំ តទា;

ទុគ្គតិំ នាភិជានាមិ, តរណាយ ឥទំ ផលំ.

១៨. ‘‘តេរសេតោ កប្បសតេ, បញ្ច សព្ពោភវា [សព្ភោគវា (សី.)] អហុំ;

សត្តរតនសម្បន្នា, ចក្កវត្តី មហព្ពលា.

១៩. ‘‘បច្ឆិមេ ច ភវេ អស្មិំ, ជាតោហំ ព្រាហ្មណេ កុលេ;

សទ្ធិំ តីហិ សហាយេហិ, បព្ពជិំ សត្ថុ សាសនេ.

២០. ‘‘បដិសម្ភិទា ចតស្សោ…បេ… កតំ ពុទ្ធស្ស សាសនំ’’.

ឥត្ថំ សុទំ អាយស្មា តរណិយោ ថេរោ ឥមា គាថាយោ អភាសិត្ថាតិ;

តរណិយត្ថេរស្សាបទានំ ចតុត្ថំ.