៥. អង្កោលកត្ថេរអបទានំ

២៣. ‘‘អង្កោលំ បុប្ផិតំ ទិស្វា, មាលាវរំ សកោសកំ [សមោគធំ (ស្យា.)];

ឱចិនិត្វាន តំ បុប្ផំ, អគមំ ពុទ្ធសន្តិកំ.

២៤. ‘‘សិទ្ធត្ថោ តម្ហិ សមយេ, បតិលីនោ មហាមុនិ;

មុហុត្តំ បដិមានេត្វា, គុហាយំ បុប្ផមោកិរិំ.

២៥. ‘‘ចតុន្នវុតិតោ កប្បេ, យំ បុប្ផមភិបូជយិំ;

ទុគ្គតិំ នាភិជានាមិ, បុប្ផទានស្សិទំ [ពុទ្ធបូជាយិទំ (សី. ស្យា.)] ផលំ.

២៦. ‘‘ឆត្តិំសម្ហិ ឥតោ កប្បេ, អាសេកោ ទេវគជ្ជិតោ;

សត្តរតនសម្បន្នោ, ចក្កវត្តី មហព្ពលោ.

២៧. ‘‘បដិសម្ភិទា ចតស្សោ…បេ… កតំ ពុទ្ធស្ស សាសនំ’’.

ឥត្ថំ សុទំ អាយស្មា អង្កោលកោ ថេរោ ឥមា គាថាយោ អភាសិត្ថាតិ.

អង្កោលកត្ថេរស្សាបទានំ បញ្ចមំ.