៣. ទ្វេរតនិយត្ថេរអបទានំ

១២. ‘‘មិគលុទ្ទោ បុរេ អាសិំ, អរញ្ញេ កាននេ អហំ;

អទ្ទសំ វិរជំ ពុទ្ធំ, អាហុតីនំ បដិគ្គហំ.

១៣. ‘‘មំសបេសិ មយា ទិន្នា, វិបស្សិស្ស មហេសិនោ;

សទេវកស្មិំ លោកស្មិំ, ឥស្សរំ ការយាមហំ.

១៤. ‘‘ឥមិនា មំសទានេន, រតនំ និព្ពត្តតេ មម;

ទុវេមេ រតនា លោកេ, ទិដ្ឋធម្មស្ស បត្តិយា.

១៥. ‘‘តេហំ សព្ពេ អនុភោមិ, មំសទានស្ស សត្តិយា;

គត្តញ្ច មុទុកំ មយ្ហំ, បញ្ញា និបុណវេទនី.

១៦. ‘‘ឯកនវុតិតោ កប្បេ, យំ មំសមទទិំ តទា;

ទុគ្គតិំ នាភិជានាមិ, មំសទានស្សិទំ ផលំ.

១៧. ‘‘ឥតោ ចតុត្ថកេ កប្បេ, ឯកោ អាសិំ ជនាធិបោ;

មហារោហិតនាមោ សោ, ចក្កវត្តី មហព្ពលោ.

១៨. ‘‘បដិសម្ភិទា ចតស្សោ…បេ… កតំ ពុទ្ធស្ស សាសនំ’’.

ឥត្ថំ សុទំ អាយស្មា ទ្វេរតនិយោ [ទ្វិរតនិយោ (សី.)] ថេរោ ឥមា គាថាយោ អភាសិត្ថាតិ.

ទ្វេរតនិយត្ថេរស្សាបទានំ តតិយំ.

ទសមំ ភាណវារំ.