៣. កោដុម្ពរិយត្ថេរអបទានំ

១២. ‘‘កណិការំវ ជោតន្តំ, និសិន្នំ បព្ពតន្តរេ;

អប្បមេយ្យំវ ឧទធិំ, វិត្ថតំ ធរណិំ យថា.

១៣. ‘‘បូជិតំ [បរេតំ (សី.)] ទេវសង្ឃេន, និសភាជានិយំ យថា;

ហដ្ឋោ ហដ្ឋេន ចិត្តេន, ឧបាគច្ឆិំ នរុត្តមំ.

១៤. ‘‘សត្តបុប្ផានិ បគ្គយ្ហ, កោដុម្ពរសមាកុលំ;

ពុទ្ធស្ស អភិរោបេសិំ, សិខិនោ លោកពន្ធុនោ.

១៥. ‘‘ឯកត្តិំសេ ឥតោ កប្បេ, យំ បុប្ផមភិរោបយិំ;

ទុគ្គតិំ នាភិជានាមិ, ពុទ្ធបូជាយិទំ ផលំ.

១៦. ‘‘ឥតោ វីសតិកប្បម្ហិ, មហានេលសនាមកោ;

ឯកោ អាសិ មហាតេជោ, ចក្កវត្តី មហព្ពលោ.

១៧. ‘‘បដិសម្ភិទា ចតស្សោ…បេ… កតំ ពុទ្ធស្ស សាសនំ’’.

ឥត្ថំ សុទំ អាយស្មា កោដុម្ពរិយោ ថេរោ ឥមា គាថាយោ អភាសិត្ថាតិ.

កោដុម្ពរិយត្ថេរស្សាបទានំ តតិយំ.