១. កុដជបុប្ផិយត្ថេរអបទានំ

១. ‘‘សុវណ្ណវណ្ណំ សម្ពុទ្ធំ, សតរំសិំវ ឧគ្គតំ;

ទិសំ អនុវិលោកេន្តំ, គច្ឆន្តំ អនិលញ្ជសេ.

២. ‘‘កុដជំ បុប្ផិតំ ទិស្វា, សំវិត្ថតសមោត្ថតំ;

រុក្ខតោ ឱចិនិត្វាន, ផុស្សស្ស អភិរោបយិំ.

៣. ‘‘ទ្វេនវុតេ ឥតោ កប្បេ, យំ បុប្ផមភិរោបយិំ;

ទុគ្គតិំ នាភិជានាមិ, ពុទ្ធបូជាយិទំ ផលំ.

៤. ‘‘ឥតោ សត្តរសេ កប្បេ, តយោ អាសុំ សុបុប្ផិតា;

សត្តរតនសម្បន្នា, ចក្កវត្តី មហព្ពលា.

៥. ‘‘បដិសម្ភិទា ចតស្សោ, វិមោក្ខាបិ ច អដ្ឋិមេ;

ឆឡភិញ្ញា សច្ឆិកតា, កតំ ពុទ្ធស្ស សាសនំ’’.

ឥត្ថំ សុទំ អាយស្មា កុដជបុប្ផិយោ ថេរោ ឥមា គាថាយោ អភាសិត្ថាតិ.

កុដជបុប្ផិយត្ថេរស្សាបទានំ បឋមំ.