៨. មណិបូជកត្ថេរអបទានំ

៣៤. ‘‘ឱរេន ហិមវន្តស្ស, នទិកា សម្បវត្តថ;

តស្សា ចានុបខេត្តម្ហិ, សយម្ភូ វសតេ តទា.

៣៥. ‘‘មណិំ បគ្គយ្ហ បល្លង្កំ, សាធុចិត្តំ មនោរមំ;

បសន្នចិត្តោ សុមនោ, ពុទ្ធស្ស អភិរោបយិំ.

៣៦. ‘‘ចតុន្នវុតិតោ កប្បេ, យំ មណិំ អភិរោបយិំ;

ទុគ្គតិំ នាភិជានាមិ, ពុទ្ធបូជាយិទំ ផលំ.

៣៧. ‘‘ឥតោ ច ទ្វាទសេ កប្បេ, សតរំសីសនាមកា;

អដ្ឋ តេ អាសុំ រាជានោ, ចក្កវត្តី មហព្ពលា.

៣៨. ‘‘បដិសម្ភិទា ចតស្សោ…បេ… កតំ ពុទ្ធស្ស សាសនំ’’.

ឥត្ថំ សុទំ អាយស្មា មណិបូជកោ ថេរោ ឥមា គាថាយោ អភាសិត្ថាតិ.

មណិបូជកត្ថេរស្សាបទានំ អដ្ឋមំ.