៣. រត្តិបុប្ផិយត្ថេរអបទានំ

១៣. ‘‘មិគលុទ្ទោ បុរេ អាសិំ, អរញ្ញេ កាននេ អហំ;

វិបស្សិំ អទ្ទសំ ពុទ្ធំ, ទេវទេវំ នរាសភំ.

១៤. ‘‘រត្តិកំ បុប្ផិតំ ទិស្វា, កុដជំ ធរណីរុហំ;

សមូលំ បគ្គហេត្វាន, ឧបនេសិំ មហេសិនោ.

១៥. ‘‘ឯកនវុតិតោ កប្បេ, យំ បុប្ផមភិរោបយិំ;

ទុគ្គតិំ នាភិជានាមិ, បុប្ផទានស្សិទំ ផលំ.

១៦. ‘‘ឥតោ ច អដ្ឋមេ កប្បេ, សុប្បសន្នសនាមកោ;

សត្តរតនសម្បន្នោ, រាជាហោសិំ មហព្ពលោ.

១៧. ‘‘បដិសម្ភិទា ចតស្សោ…បេ… កតំ ពុទ្ធស្ស សាសនំ’’.

ឥត្ថំ សុទំ អាយស្មា រត្តិបុប្ផិយោ ថេរោ ឥមា គាថាយោ អភាសិត្ថាតិ.

រត្តិបុប្ផិយត្ថេរស្សាបទានំ តតិយំ.