៩. សមាទបកត្ថេរអបទានំ

៤៤. ‘‘នគរេ ពន្ធុមតិយា, មហាបូគគណោ អហុ;

តេសាហំ បវរោ អាសិំ, មម ពទ្ធចរា [បដ្ឋចរា (ស្យា.)] ច តេ.

៤៥. ‘‘សព្ពេ តេ សន្និបាតេត្វា, បុញ្ញកម្មេ សមាទយិំ;

មាឡំ កស្សាម សង្ឃស្ស, បុញ្ញក្ខេត្តំ អនុត្តរំ.

៤៦. ‘‘សាធូតិ តេ បដិស្សុត្វា, មម ឆន្ទវសានុគា;

និដ្ឋាបេត្វា ច តំ មាឡំ, វិបស្សិស្ស អទម្ហសេ.

៤៧. ‘‘ឯកនវុតិតោ កប្បេ, យំ មាឡមទទិំ តទា;

ទុគ្គតិំ នាភិជានាមិ, មាឡទានស្សិទំ ផលំ.

៤៨. ‘‘ឯកូនសត្តតិកប្បេ [ឯកូនសដ្ឋិកប្បម្ហិ (សី. ស្យា.)],

ឯកោ អាសិ ជនាធិបោ.

អាទេយ្យោ នាម នាមេន, ចក្កវត្តី មហព្ពលោ.

៤៩. ‘‘បដិសម្ភិទា ចតស្សោ…បេ… កតំ ពុទ្ធស្ស សាសនំ’’.

ឥត្ថំ សុទំ អាយស្មា សមាទបកោ ថេរោ ឥមា គាថាយោ អភាសិត្ថាតិ.

សមាទបកត្ថេរស្សាបទានំ នវមំ.