១. សោភិតត្ថេរអបទានំ

១. ‘‘បទុមុត្តរោ នាម ជិនោ, លោកជេដ្ឋោ នរាសភោ;

មហតោ ជនកាយស្ស, ទេសេតិ អមតំ បទំ.

២. ‘‘តស្សាហំ វចនំ សុត្វា, វាចាសភិមុទីរិតំ [វាចាសភិមុទីរយិំ (?)];

អញ្ជលិំ បគ្គហេត្វាន, ឯកគ្គោ អាសហំ តទា.

៣. ‘‘យថា សមុទ្ទោ ឧទធីនមគ្គោ, នេរូ នគានំ បវរោ សិលុច្ចយោ;

តថេវ យេ ចិត្តវសេន វត្តរេ, ន ពុទ្ធញាណស្ស កលំ ឧបេន្តិ តេ.

៤. ‘‘ធម្មវិធិំ [ធម្មេ វិធិំ (សី.)] ឋបេត្វាន, ពុទ្ធោ ការុណិកោ ឥសិ;

ភិក្ខុសង្ឃេ និសីទិត្វា, ឥមា គាថា អភាសថ.

៥. ‘‘‘យោ សោ ញាណំ បកិត្តេសិ, ពុទ្ធម្ហិ លោកនាយកេ;

កប្បានំ សតសហស្សំ, ទុគ្គតិំ ន គមិស្សតិ.

៦. ‘‘‘កិលេសេ ឈាបយិត្វាន, ឯកគ្គោ សុសមាហិតោ;

សោភិតោ នាម នាមេន, ហេស្សតិ សត្ថុ សាវកោ’.

៧. ‘‘បញ្ញាសេ កប្បសហស្សេ, សត្តេវាសុំ យសុគ្គតា [សមុគ្គតា (ស្យា.)];

សត្តរតនសម្បន្នា, ចក្កវត្តី មហព្ពលា.

៨. ‘‘កិលេសា ឈាបិតា មយ្ហំ, ភវា សព្ពេ សមូហតា;

តិស្សោ វិជ្ជា អនុប្បត្តា, កតំ ពុទ្ធស្ស សាសនំ.

៩. ‘‘បដិសម្ភិទា ចតស្សោ, វិមោក្ខាបិ ច អដ្ឋិមេ;

ឆឡភិញ្ញា សច្ឆិកតា, កតំ ពុទ្ធស្ស សាសនំ’’.

ឥត្ថំ សុទំ អាយស្មា សោភិតោ ថេរោ ឥមា គាថាយោ អភាសិត្ថាតិ.

សោភិតត្ថេរស្សាបទានំ បឋមំ.