៣. បាយសទាយកត្ថេរអបទានំ

២៦. ‘‘សុវណ្ណវណ្ណោ សម្ពុទ្ធោ, ពាត្តិំសវរលក្ខណោ;

បវនា [បធានោ (ក.)] អភិនិក្ខន្តោ, ភិក្ខុសង្ឃបុរក្ខតោ [សុវណ្ណវណ្ណំ …បេ… បុរក្ខតំ-ឯវំ ទុតិយន្តវសេន សី. ស្យា. បោត្ថកេសុ ទិស្សតិ].

២៧. ‘‘មហច្ចា [សហត្ថា (ស្យា. ក.)] កំសបាតិយា, វឌ្ឍេត្វា បាយសំ [បាយាសំ (ស្យា. ក.)] អហំ;

អាហុតិំ យិដ្ឋុកាមោ សោ, ឧបនេសិំ ពលិំ អហំ.

២៨. ‘‘ភគវា តម្ហិ សមយេ, លោកជេដ្ឋោ នរាសភោ;

ចង្កមំ សុសមារូឡ្ហោ, អម្ពរេ អនិលាយនេ.

២៩. ‘‘តញ្ច អច្ឆរិយំ ទិស្វា, អព្ភុតំ លោមហំសនំ;

ឋបយិត្វា កំសបាតិំ, វិបស្សិំ អភិវាទយិំ.

៣០. ‘‘តុវំ ទេវោសិ [ពុទ្ធោសិ (ស្យា.)] សព្ពញ្ញូ, សទេវេ សហមានុសេ;

អនុកម្បំ ឧបាទាយ, បដិគណ្ហ មហាមុនិ.

៣១. ‘‘បដិគ្គហេសិ ភគវា, សព្ពញ្ញូ លោកនាយកោ;

មម សង្កប្បមញ្ញាយ, សត្ថា លោកេ មហាមុនិ [អនុត្តរោ (ស្យា.)].

៣២. ‘‘ឯកនវុតិតោ កប្បេ, យំ ទានមទទិំ តទា;

ទុគ្គតិំ នាភិជានាមិ, បាយសស្ស [បាយាសស្ស (ស្យា. ក.)] ឥទំ ផលំ.

៣៣. ‘‘ឯកតាលីសិតោ កប្បេ, ពុទ្ធោ នាមាសិ ខត្តិយោ;

សត្តរតនសម្បន្នោ, ចក្កវត្តី មហព្ពលោ.

៣៤. ‘‘បដិសម្ភិទា ចតស្សោ…បេ… កតំ ពុទ្ធស្ស សាសនំ’’.

ឥត្ថំ សុទំ អាយស្មា បាយសទាយកោ [បាយាសទាយកោ (ស្យា. ក.)] ថេរោ ឥមា គាថាយោ អភាសិត្ថាតិ.

បាយសទាយកត្ថេរស្សាបទានំ តតិយំ.