៦. ចិតកបូជកត្ថេរអបទានំ

៤៩. ‘‘វសាមិ រាជាយតនេ, សាមច្ចោ សបរិជ្ជនោ;

បរិនិព្ពុតេ ភគវតិ, សិខិនោ លោកពន្ធុនោ.

៥០. ‘‘បសន្នចិត្តោ សុមនោ, ចិតកំ អគមាសហំ;

តូរិយំ តត្ថ វាទេត្វា, គន្ធមាលំ សមោកិរិំ.

៥១. ‘‘ចិតម្ហិ បូជំ កត្វាន, វន្ទិត្វា ចិតកំ អហំ;

បសន្នចិត្តោ សុមនោ, សកំ ភវនុបាគមិំ.

៥២. ‘‘ភវនេ ឧបវិដ្ឋោហំ, ចិតបូជំ អនុស្សរិំ;

តេន កម្មេន ទ្វិបទិន្ទ, លោកជេដ្ឋ នរាសភ.

៥៣. ‘‘អនុភោត្វាន សម្បត្តិំ, ទេវេសុ មានុសេសុ ច;

បត្តោម្ហិ អចលំ ឋានំ, ហិត្វា ជយបរាជយំ.

៥៤. ‘‘ឯកត្តិំសេ ឥតោ កប្បេ, យំ បុប្ផមភិរោបយិំ;

ទុគ្គតិំ នាភិជានាមិ, ចិតបូជាយិទំ ផលំ.

៥៥. ‘‘ឯកូនតិំសកប្បម្ហិ, ឥតោ សោឡស រាជានោ;

ឧគ្គតា នាម នាមេន, ចក្កវត្តី មហព្ពលា.

៥៦. ‘‘បដិសម្ភិទា ចតស្សោ…បេ… កតំ ពុទ្ធស្ស សាសនំ’’.

ឥត្ថំ សុទំ អាយស្មា ចិតកបូជកោ ថេរោ ឥមា គាថាយោ អភាសិត្ថាតិ.

ចិតកបូជកត្ថេរស្សាបទានំ ឆដ្ឋំ.