៨. អាសនុបដ្ឋាហកត្ថេរអបទានំ

៤៧. ‘‘កាននំ វនមោគយ្ហ, អប្បសទ្ទំ និរាកុលំ;

សីហាសនំ មយា ទិន្នំ, អត្ថទស្សិស្ស តាទិនោ.

៤៨. ‘‘មាលាហត្ថំ គហេត្វាន, កត្វា ច នំ បទក្ខិណំ;

សត្ថារំ បយិរុបាសិត្វា, បក្កាមិំ ឧត្តរាមុខោ.

៤៩. ‘‘តេន កម្មេន ទ្វិបទិន្ទ, លោកជេដ្ឋ នរាសភ;

សន្និព្ពាបេមិ [សន្ទិដ្ឋាបេមិ (ក.)] អត្តានំ, ភវា សព្ពេ សមូហតា.

៥០. ‘‘អដ្ឋារសកប្បសតេ, យំ ទានមទទិំ តទា;

ទុគ្គតិំ នាភិជានាមិ, សីហាសនស្សិទំ ផលំ.

៥១. ‘‘ឥតោ សត្តកប្បសតេ, សន្និព្ពាបក [សន្និដ្ឋោ នាម (ក.)] ខត្តិយោ;

សត្តរតនសម្បន្នោ, ចក្កវត្តី មហព្ពលោ.

៥២. ‘‘បដិសម្ភិទា ចតស្សោ…បេ… កតំ ពុទ្ធស្ស សាសនំ’’.

ឥត្ថំ សុទំ អាយស្មា អាសនុបដ្ឋាហកោ ថេរោ ឥមា គាថាយោ អភាសិត្ថាតិ.

អាសនុបដ្ឋាហកត្ថេរស្សាបទានំ អដ្ឋមំ.