១១. ភិក្ខទាយិវគ្គោ

១. ភិក្ខទាយកត្ថេរអបទានំ

១. ‘‘សុវណ្ណវណ្ណំ សម្ពុទ្ធំ, អាហុតីនំ បដិគ្គហំ;

បវរា [បវនា (ស្យា.)] អភិនិក្ខន្តំ, វនា និព្ពនមាគតំ [វានា និព្ពានមាគតំ (ស្យា.)].

២. ‘‘កដច្ឆុភិក្ខំ បាទាសិំ, សិទ្ធត្ថស្ស មហេសិនោ;

បញ្ញាយ ឧបសន្តស្ស, មហាវីរស្ស តាទិនោ.

៣. ‘‘បទេនានុបទាយន្តំ [បទេនានុបទាយន្តោ (សី. ស្យា.)], និព្ពាបេន្តេ មហាជនំ;

ឧឡារា វិត្តិ មេ ជាតា, ពុទ្ធេ អាទិច្ចពន្ធុនេ [វិត្តិ មេ បាហុនា តាវ, ពុទ្ធស្សាទិច្ចពន្ធុនោ (ស្យា.)].

៤. ‘‘ចតុន្នវុតិតោ កប្បេ, យំ ទានមទទិំ តទា;

ទុគ្គតិំ នាភិជានាមិ, ភិក្ខាទានស្សិទំ ផលំ.

៥. ‘‘សត្តាសីតិម្ហិតោ កប្បេ, មហារេណុ សនាមកា;

សត្តរតនសម្បន្នា, សត្តេតេ ចក្កវត្តិនោ.

៦. ‘‘បដិសម្ភិទា ចតស្សោ, វិមោក្ខាបិ ច អដ្ឋិមេ;

ឆឡភិញ្ញា សច្ឆិកតា, កតំ ពុទ្ធស្ស សាសនំ’’.

ឥត្ថំ សុទំ អាយស្មា ភិក្ខទាយកោ ថេរោ ឥមា គាថាយោ អភាសិត្ថាតិ.

ភិក្ខទាយកត្ថេរស្សាបទានំ បឋមំ.

២. ញាណសញ្ញិកត្ថេរអបទានំ

៧. ‘‘សុវណ្ណវណ្ណំ សម្ពុទ្ធំ, និសភាជានិយំ យថា;

តិធាបភិន្នំ មាតង្គំ, កុញ្ជរំវ មហេសិនំ.

៨. ‘‘ឱភាសេន្តំ ទិសា សព្ពា, ឧឡុរាជំវ បូរិតំ;

រថិយំ បដិបជ្ជន្តំ, លោកជេដ្ឋំ អបស្សហំ.

៩. ‘‘ញាណេ ចិត្តំ បសាទេត្វា, បគ្គហេត្វាន អញ្ជលិំ;

បសន្នចិត្តោ សុមនោ, សិទ្ធត្ថមភិវាទយិំ.

១០. ‘‘ចតុន្នវុតិតោ កប្បេ, យំ កម្មមករិំ តទា;

ទុគ្គតិំ នាភិជានាមិ, ញាណសញ្ញាយិទំ ផលំ.

១១. ‘‘តេសត្តតិម្ហិតោ កប្បេ, សោឡសាសុំ នរុត្តមា;

សត្តរតនសម្បន្នា, ចក្កវត្តី មហព្ពលា.

១២. ‘‘បដិសម្ភិទា ចតស្សោ…បេ… កតំ ពុទ្ធស្ស សាសនំ’’.

ឥត្ថំ សុទំ អាយស្មា ញាណសញ្ញិកោ ថេរោ ឥមា គាថាយោ អភាសិត្ថាតិ.

ញាណសញ្ញិកត្ថេរស្សាបទានំ ទុតិយំ.

៣. ឧប្បលហត្ថិយត្ថេរអបទានំ

១៣. ‘‘តិវរាយំ និវាសីហំ, អហោសិំ មាលិកោ តទា;

អទ្ទសំ វិរជំ ពុទ្ធំ, សិទ្ធត្ថំ លោកបូជិតំ [លោកនាយកំ (សី.)].

១៤. ‘‘បសន្នចិត្តោ សុមនោ, បុប្ផហត្ថមទាសហំ;

យត្ថ យត្ថុបបជ្ជាមិ, តស្ស កម្មស្ស វាហសា.

១៥. ‘‘អនុភោមិ ផលំ ឥដ្ឋំ, បុព្ពេ សុកតមត្តនោ;

បរិក្ខិត្តោ សុមល្លេហិ, បុប្ផទានស្សិទំ ផលំ.

១៦. ‘‘ចតុន្នវុតិតោ កប្បេ, យំ បុប្ផមភិរោបយិំ;

ទុគ្គតិំ នាភិជានាមិ, បុប្ផបូជាយិទំ [ពុទ្ធបូជាយិទំ (សី.)] ផលំ.

១៧. ‘‘ចតុន្នវុតុបាទាយ, ឋបេត្វា វត្តមានកំ;

បញ្ចរាជសតា តត្ថ, នជ្ជសមសនាមកា [នជ្ជុបមសនាមកា (សី. ស្យា.)].

១៨. ‘‘បដិសម្ភិទា ចតស្សោ…បេ… កតំ ពុទ្ធស្ស សាសនំ’’.

ឥត្ថំ សុទំ អាយស្មា ឧប្បលហត្ថិយោ ថេរោ ឥមា គាថាយោ អភាសិត្ថាតិ.

ឧប្បលហត្ថិយត្ថេរស្សាបទានំ តតិយំ.

៤. បទបូជកត្ថេរអបទានំ

១៩. ‘‘សិទ្ធត្ថស្ស ភគវតោ, ជាតិបុប្ផមទាសហំ;

បាទេសុ សត្ត បុប្ផានិ, ហាសេនោកិរិតានិ មេ.

២០. ‘‘តេន កម្មេនហំ អជ្ជ, អភិភោមិ នរាមរេ;

ធារេមិ អន្តិមំ ទេហំ, សម្មាសម្ពុទ្ធសាសនេ.

២១. ‘‘ចតុន្នវុតិតោ កប្បេ, យំ បុប្ផមភិរោបយិំ;

ទុគ្គតិំ នាភិជានាមិ, បុប្ផបូជាយិទំ ផលំ.

២២. ‘‘សមន្តគន្ធនាមាសុំ, តេរស ចក្កវត្តិនោ;

ឥតោ បញ្ចមកេ កប្បេ, ចាតុរន្តា ជនាធិបា.

២៣. ‘‘បដិសម្ភិទា ចតស្សោ…បេ… កតំ ពុទ្ធស្ស សាសនំ’’.

ឥត្ថំ សុទំ អាយស្មា បទបូជកោ ថេរោ ឥមា គាថាយោ អភាសិត្ថាតិ.

បទបូជកត្ថេរស្សាបទានំ ចតុត្ថំ.

៥. មុដ្ឋិបុប្ផិយត្ថេរអបទានំ

២៤. ‘‘សុទស្សនោតិ នាមេន, មាលាការោ អហំ តទា;

អទ្ទសំ វិរជំ ពុទ្ធំ, លោកជេដ្ឋំ នរាសភំ.

២៥. ‘‘ជាតិបុប្ផំ គហេត្វាន, បូជយិំ បទុមុត្តរំ;

វិសុទ្ធចក្ខុ សុមនោ, ទិព្ពចក្ខុំ សមជ្ឈគំ.

២៦. ‘‘ឯតិស្សា បុប្ផបូជាយ, ចិត្តស្ស បណិធីហិ ច;

កប្បានំ សតសហស្សំ, ទុគ្គតិំ នុបបជ្ជហំ.

២៧. ‘‘សោឡសាសិំសុ រាជានោ, ទេវុត្តរសនាមកា;

ឆត្តិំសម្ហិ ឥតោ កប្បេ, ចក្កវត្តី មហព្ពលា.

២៨. ‘‘បដិសម្ភិទា ចតស្សោ…បេ… កតំ ពុទ្ធស្ស សាសនំ’’.

ឥត្ថំ សុទំ អាយស្មា មុដ្ឋិបុប្ផិយោ ថេរោ ឥមា គាថាយោ អភាសិត្ថាតិ.

មុដ្ឋិបុប្ផិយត្ថេរស្សាបទានំ បញ្ចមំ.

៦. ឧទកបូជកត្ថេរអបទានំ

២៩. ‘‘សុវណ្ណវណ្ណំ សម្ពុទ្ធំ, គច្ឆន្តំ អនិលញ្ជសេ;

ឃតាសនំវ ជលិតំ, អាទិត្តំវ ហុតាសនំ.

៣០. ‘‘បាណិនា ឧទកំ គយ្ហ, អាកាសេ ឧក្ខិបិំ អហំ;

សម្បដិច្ឆិ មហាវីរោ, ពុទ្ធោ ការុណិកោ ឥសិ [មយិ (ស្យា.)].

៣១. ‘‘អន្តលិក្ខេ ឋិតោ សត្ថា, បទុមុត្តរនាមកោ;

មម សង្កប្បមញ្ញាយ, ឥមំ គាថំ អភាសថ.

៣២. ‘‘‘ឥមិនា ទកទានេន, បីតិឧប្បាទនេន ច;

កប្បសតសហស្សម្បិ, ទុគ្គតិំ នុបបជ្ជតិ’ [នុបបជ្ជសិ (ក.)].

៣៣. ‘‘តេន កម្មេន ទ្វិបទិន្ទ, លោកជេដ្ឋ នរាសភ;

បត្តោម្ហិ អចលំ ឋានំ, ហិត្វា ជយបរាជយំ.

៣៤. ‘‘សហស្សរាជនាមេន, តយោ តេ ចក្កវត្តិនោ;

បញ្ចសដ្ឋិកប្បសតេ, ចាតុរន្តា ជនាធិបា.

៣៥. ‘‘បដិសម្ភិទា ចតស្សោ…បេ… កតំ ពុទ្ធស្ស សាសនំ’’.

ឥត្ថំ សុទំ អាយស្មា ឧទកបូជកោ ថេរោ ឥមា គាថាយោ អភាសិត្ថាតិ.

ឧទកបូជកត្ថេរស្សាបទានំ ឆដ្ឋំ.

៧. នឡមាលិយត្ថេរអបទានំ

៣៦. ‘‘បទុមុត្តរពុទ្ធស្ស, លោកជេដ្ឋស្ស តាទិនោ;

តិណត្ថរេ និសិន្នស្ស, ឧបសន្តស្ស តាទិនោ.

៣៧. ‘‘នឡមាលំ គហេត្វាន, ពន្ធិត្វា [ពីជិត្វា (ក.)] ពីជនិំ អហំ;

ពុទ្ធស្ស ឧបនាមេសិំ, ទ្វិបទិន្ទស្ស តាទិនោ.

៣៨. ‘‘បដិគ្គហេត្វា សព្ពញ្ញូ, ពីជនិំ លោកនាយកោ;

មម សង្កប្បមញ្ញាយ, ឥមំ គាថំ អភាសថ.

៣៩. ‘‘‘យថា មេ កាយោ និព្ពាតិ, បរិឡាហោ ន វិជ្ជតិ;

តថេវ តិវិធគ្គីហិ, ចិត្តំ តវ វិមុច្ចតុ’.

៤០. ‘‘សព្ពេ ទេវា សមាគច្ឆុំ, យេ កេចិ វននិស្សិតា;

សោស្សាម ពុទ្ធវចនំ, ហាសយន្តញ្ច ទាយកំ.

៤១. ‘‘និសិន្នោ ភគវា តត្ថ, ទេវសង្ឃបុរក្ខតោ;

ទាយកំ សម្បហំសេន្តោ, ឥមា គាថា អភាសថ.

៤២. ‘‘‘ឥមិនា ពីជនិទានេន, ចិត្តស្ស បណិធីហិ ច;

សុព្ពតោ នាម នាមេន, ចក្កវត្តី ភវិស្សតិ.

៤៣. ‘‘‘តេន កម្មាវសេសេន, សុក្កមូលេន ចោទិតោ;

មាលុតោ នាម នាមេន, ចក្កវត្តី ភវិស្សតិ’.

៤៤. ‘‘‘ឥមិនា ពីជនិទានេន, សម្មានវិបុលេន ច;

កប្បសតសហស្សម្បិ, ទុគ្គតិំ នុបបជ្ជតិ.

៤៥. ‘‘តិំសកប្បសហស្សម្ហិ, សុព្ពតា អដ្ឋតិំស តេ;

ឯកូនតិំសសហស្សេ, អដ្ឋ មាលុតនាមកា.

៤៦. ‘‘បដិសម្ភិទា ចតស្សោ…បេ… កតំ ពុទ្ធស្ស សាសនំ’’.

ឥត្ថំ សុទំ អាយស្មា នឡមាលិយោ ថេរោ ឥមា គាថាយោ អភាសិត្ថាតិ.

នឡមាលិយត្ថេរស្សាបទានំ សត្តមំ.

សត្តមភាណវារំ.

៨. អាសនុបដ្ឋាហកត្ថេរអបទានំ

៤៧. ‘‘កាននំ វនមោគយ្ហ, អប្បសទ្ទំ និរាកុលំ;

សីហាសនំ មយា ទិន្នំ, អត្ថទស្សិស្ស តាទិនោ.

៤៨. ‘‘មាលាហត្ថំ គហេត្វាន, កត្វា ច នំ បទក្ខិណំ;

សត្ថារំ បយិរុបាសិត្វា, បក្កាមិំ ឧត្តរាមុខោ.

៤៩. ‘‘តេន កម្មេន ទ្វិបទិន្ទ, លោកជេដ្ឋ នរាសភ;

សន្និព្ពាបេមិ [សន្ទិដ្ឋាបេមិ (ក.)] អត្តានំ, ភវា សព្ពេ សមូហតា.

៥០. ‘‘អដ្ឋារសកប្បសតេ, យំ ទានមទទិំ តទា;

ទុគ្គតិំ នាភិជានាមិ, សីហាសនស្សិទំ ផលំ.

៥១. ‘‘ឥតោ សត្តកប្បសតេ, សន្និព្ពាបក [សន្និដ្ឋោ នាម (ក.)] ខត្តិយោ;

សត្តរតនសម្បន្នោ, ចក្កវត្តី មហព្ពលោ.

៥២. ‘‘បដិសម្ភិទា ចតស្សោ…បេ… កតំ ពុទ្ធស្ស សាសនំ’’.

ឥត្ថំ សុទំ អាយស្មា អាសនុបដ្ឋាហកោ ថេរោ ឥមា គាថាយោ អភាសិត្ថាតិ.

អាសនុបដ្ឋាហកត្ថេរស្សាបទានំ អដ្ឋមំ.

៩. ពិឡាលិទាយកត្ថេរអបទានំ

៥៣. ‘‘ហិមវន្តស្សាវិទូរេ, វសាមិ បណ្ណសន្ថរេ;

ឃាសេសុ គេធមាបន្នោ, សេយ្យសីលោ ចហំ [សេយសីលោវហំ (ស្យា. ក.)] តទា.

៥៤. ‘‘ខណន្តាលុ [ខណមាលុ (ស្យា.)] កលម្ពានិ, ពិឡាលិតក្កលានិ ច;

កោលំ ភល្លាតកំ ពិល្លំ, អាហត្វា បដិយាទិតំ.

៥៥. ‘‘បទុមុត្តរោ លោកវិទូ, អាហុតីនំ បដិគ្គហោ;

មម សង្កប្បមញ្ញាយ, អាគច្ឆិ មម សន្តិកំ.

៥៦. ‘‘ឧបាគតំ មហានាគំ, ទេវទេវំ នរាសភំ;

ពិឡាលិំ បគ្គហេត្វាន, បត្តម្ហិ ឱកិរិំ អហំ.

៥៧. ‘‘បរិភុញ្ជិ មហាវីរោ, តោសយន្តោ មមំ តទា;

បរិភុញ្ជិត្វាន សព្ពញ្ញូ, ឥមំ គាថំ អភាសថ.

៥៨. ‘‘‘សកំ ចិត្តំ បសាទេត្វា, ពិឡាលិំ មេ អទា តុវំ;

កប្បានំ សតសហស្សំ, ទុគ្គតិំ នុបបជ្ជសិ’.

៥៩. ‘‘ចរិមំ វត្តតេ មយ្ហំ, ភវា សព្ពេ សមូហតា;

ធារេមិ អន្តិមំ ទេហំ, សម្មាសម្ពុទ្ធសាសនេ.

៦០. ‘‘ចតុបញ្ញាសិតោ កប្បេ, សុមេខលិយសវ្ហយោ;

សត្តរតនសម្បន្នោ, ចក្កវត្តី មហព្ពលោ.

៦១. ‘‘បដិសម្ភិទា ចតស្សោ…បេ… កតំ ពុទ្ធស្ស សាសនំ’’.

ឥត្ថំ សុទំ អាយស្មា ពិឡាលិទាយកោ ថេរោ ឥមា គាថាយោ អភាសិត្ថាតិ.

ពិឡាលិទាយកត្ថេរស្សាបទានំ នវមំ.

១០. រេណុបូជកត្ថេរអបទានំ

៦២. ‘‘សុវណ្ណវណ្ណំ សម្ពុទ្ធំ, សតរំសិំវ ភាណុមំ;

ឱភាសេន្តំ ទិសា សព្ពា, ឧឡុរាជំវ បូរិតំ.

៦៣. ‘‘បុរក្ខតំ សាវកេហិ, សាគរេហេវ មេទនិំ;

នាគំ បគ្គយ្ហ រេណូហិ, វិបស្សិស្សាភិរោបយិំ.

៦៤. ‘‘ឯកនវុតិតោ កប្បេ, យំ រេណុមភិរោបយិំ;

ទុគ្គតិំ នាភិជានាមិ, ពុទ្ធបូជាយិទំ ផលំ.