៣. ឧប្បលហត្ថិយត្ថេរអបទានំ

១៣. ‘‘តិវរាយំ និវាសីហំ, អហោសិំ មាលិកោ តទា;

អទ្ទសំ វិរជំ ពុទ្ធំ, សិទ្ធត្ថំ លោកបូជិតំ [លោកនាយកំ (សី.)].

១៤. ‘‘បសន្នចិត្តោ សុមនោ, បុប្ផហត្ថមទាសហំ;

យត្ថ យត្ថុបបជ្ជាមិ, តស្ស កម្មស្ស វាហសា.

១៥. ‘‘អនុភោមិ ផលំ ឥដ្ឋំ, បុព្ពេ សុកតមត្តនោ;

បរិក្ខិត្តោ សុមល្លេហិ, បុប្ផទានស្សិទំ ផលំ.

១៦. ‘‘ចតុន្នវុតិតោ កប្បេ, យំ បុប្ផមភិរោបយិំ;

ទុគ្គតិំ នាភិជានាមិ, បុប្ផបូជាយិទំ [ពុទ្ធបូជាយិទំ (សី.)] ផលំ.

១៧. ‘‘ចតុន្នវុតុបាទាយ, ឋបេត្វា វត្តមានកំ;

បញ្ចរាជសតា តត្ថ, នជ្ជសមសនាមកា [នជ្ជុបមសនាមកា (សី. ស្យា.)].

១៨. ‘‘បដិសម្ភិទា ចតស្សោ…បេ… កតំ ពុទ្ធស្ស សាសនំ’’.

ឥត្ថំ សុទំ អាយស្មា ឧប្បលហត្ថិយោ ថេរោ ឥមា គាថាយោ អភាសិត្ថាតិ.

ឧប្បលហត្ថិយត្ថេរស្សាបទានំ តតិយំ.