១. ភិក្ខទាយកត្ថេរអបទានំ

១. ‘‘សុវណ្ណវណ្ណំ សម្ពុទ្ធំ, អាហុតីនំ បដិគ្គហំ;

បវរា [បវនា (ស្យា.)] អភិនិក្ខន្តំ, វនា និព្ពនមាគតំ [វានា និព្ពានមាគតំ (ស្យា.)].

២. ‘‘កដច្ឆុភិក្ខំ បាទាសិំ, សិទ្ធត្ថស្ស មហេសិនោ;

បញ្ញាយ ឧបសន្តស្ស, មហាវីរស្ស តាទិនោ.

៣. ‘‘បទេនានុបទាយន្តំ [បទេនានុបទាយន្តោ (សី. ស្យា.)], និព្ពាបេន្តេ មហាជនំ;

ឧឡារា វិត្តិ មេ ជាតា, ពុទ្ធេ អាទិច្ចពន្ធុនេ [វិត្តិ មេ បាហុនា តាវ, ពុទ្ធស្សាទិច្ចពន្ធុនោ (ស្យា.)].

៤. ‘‘ចតុន្នវុតិតោ កប្បេ, យំ ទានមទទិំ តទា;

ទុគ្គតិំ នាភិជានាមិ, ភិក្ខាទានស្សិទំ ផលំ.

៥. ‘‘សត្តាសីតិម្ហិតោ កប្បេ, មហារេណុ សនាមកា;

សត្តរតនសម្បន្នា, សត្តេតេ ចក្កវត្តិនោ.

៦. ‘‘បដិសម្ភិទា ចតស្សោ, វិមោក្ខាបិ ច អដ្ឋិមេ;

ឆឡភិញ្ញា សច្ឆិកតា, កតំ ពុទ្ធស្ស សាសនំ’’.

ឥត្ថំ សុទំ អាយស្មា ភិក្ខទាយកោ ថេរោ ឥមា គាថាយោ អភាសិត្ថាតិ.

ភិក្ខទាយកត្ថេរស្សាបទានំ បឋមំ.