៩. វេយ្យាវច្ចកត្ថេរអបទានំ

៥១. ‘‘វិបស្សិស្ស ភគវតោ, មហាបូគគណោ អហុ;

វេយ្យាវច្ចករោ អាសិំ, សព្ពកិច្ចេសុ វាវដោ [ព្យាវដោ (សី. ស្យា.)].

៥២. ‘‘ទេយ្យធម្មោ ច មេ នត្ថិ, សុគតស្ស មហេសិនោ;

អវន្ទិំ សត្ថុនោ បាទេ, វិប្បសន្នេន ចេតសា.

៥៣. ‘‘ឯកនវុតិតោ កប្បេ, វេយ្យាវច្ចំ អកាសហំ;

ទុគ្គតិំ នាភិជានាមិ, វេយ្យាវច្ចស្សិទំ ផលំ.

៥៤. ‘‘ឥតោ ច អដ្ឋមេ កប្បេ, រាជា អាសិំ សុចិន្តិតោ;

សត្តរតនសម្បន្នោ, ចក្កវត្តី មហព្ពលោ.

៥៥. ‘‘បដិសម្ភិទា ចតស្សោ…បេ… កតំ ពុទ្ធស្ស សាសនំ’’.

ឥត្ថំ សុទំ អាយស្មា វេយ្យាវច្ចកោ ថេរោ ឥមា គាថាយោ អភាសិត្ថាតិ.

វេយ្យាវច្ចកត្ថេរស្សាបទានំ នវមំ.