៤. សូចិទាយកត្ថេរអបទានំ

១៩. ‘‘កម្មារោហំ បុរេ អាសិំ, ពន្ធុមាយំ បុរុត្តមេ;

សូចិទានំ មយា ទិន្នំ, វិបស្សិស្ស មហេសិនោ.

២០. ‘‘វជិរគ្គសមំ ញាណំ, ហោតិ កម្មេន តាទិសំ;

វិរាគោម្ហិ វិមុត្តោម្ហិ [វិភវោម្ហិ វិភត្តោម្ហិ (ក.)], បត្តោម្ហិ អាសវក្ខយំ.

២១. ‘‘អតីតេ ច ភវេ សព្ពេ, វត្តមានេ ចនាគតេ [អតីតា ច ភវា សព្ពេ, វត្តមានា ច’នាគតា (ស្យា. ក.)];

ញាណេន វិចិនិំ សព្ពំ, សូចិទានស្សិទំ ផលំ.

២២. ‘‘ឯកនវុតិតោ កប្បេ, សត្តាសុំ វជិរវ្ហយា;

សត្តរតនសម្បន្នា, ចក្កវត្តី មហព្ពលា.

២៣. ‘‘បដិសម្ភិទា ចតស្សោ…បេ… កតំ ពុទ្ធស្ស សាសនំ’’.

ឥត្ថំ សុទំ អាយស្មា សូចិទាយកោ ថេរោ ឥមា គាថាយោ អភាសិត្ថាតិ.

សូចិទាយកត្ថេរស្សាបទានំ ចតុត្ថំ.