១. សុធាបិណ្ឌិយត្ថេរអបទានំ

១. ‘‘បូជារហេ បូជយតោ, ពុទ្ធេ យទិ វ សាវកេ;

បបញ្ចសមតិក្កន្តេ, តិណ្ណសោកបរិទ្ទវេ.

២. ‘‘តេ តាទិសេ បូជយតោ, និព្ពុតេ អកុតោភយេ;

ន សក្កា បុញ្ញំ សង្ខាតុំ, ឥមេត្តមបិ [ឥទម្មត្តន្តិ (សី.), ឥមេត្ថមបិ (ក.)] កេនចិ.

៣. ‘‘ចតុន្នមបិ ទីបានំ, ឥស្សរំ យោធ ការយេ;

ឯកិស្សា បូជនាយេតំ, កលំ នាគ្ឃតិ សោឡសិំ.

៤. ‘‘សិទ្ធត្ថស្ស នរគ្គស្ស, ចេតិយេ ផលិតន្តរេ;

សុធាបិណ្ឌោ មយា ទិន្នោ, វិប្បសន្នេន ចេតសា.

៥. ‘‘ចតុន្នវុតិតោ កប្បេ, យំ កម្មមករិំ តទា;

ទុគ្គតិំ នាភិជានាមិ, បដិសង្ខារស្សិទំ ផលំ.

៦. ‘‘ឥតោ តិំសតិកប្បម្ហិ, បដិសង្ខារសវ្ហយា;

សត្តរតនសម្បន្នា, តេរស ចក្កវត្តិនោ.

៧. ‘‘បដិសម្ភិទា ចតស្សោ, វិមោក្ខាបិ ច អដ្ឋិមេ;

ឆឡភិញ្ញា សច្ឆិកតា, កតំ ពុទ្ធស្ស សាសនំ’’.

ឥត្ថំ សុទំ អាយស្មា សុធាបិណ្ឌិយោ ថេរោ ឥមា គាថាយោ អភាសិត្ថាតិ.

សុធាបិណ្ឌិយត្ថេរស្សាបទានំ បឋមំ.