៣-៧. អញ្ញាសិកោណ្ឌញ្ញត្ថេរអបទានំ

៥៩៦. ‘‘បទុមុត្តរសម្ពុទ្ធំ, លោកជេដ្ឋំ វិនាយកំ;

ពុទ្ធភូមិមនុប្បត្តំ, បឋមំ អទ្ទសំ អហំ.

៥៩៧. ‘‘យាវតា ពោធិយា មូលេ, យក្ខា សព្ពេ សមាគតា;

សម្ពុទ្ធំ បរិវារេត្វា, វន្ទន្តិ បញ្ជលីកតា.

៥៩៨. ‘‘សព្ពេ ទេវា តុដ្ឋមនា, អាកាសេ សញ្ចរន្តិ តេ;

ពុទ្ធោ អយំ អនុប្បត្តោ, អន្ធការតមោនុទោ.

៥៩៩. ‘‘តេសំ ហាសបរេតានំ, មហានាទោ អវត្តថ;

កិលេសេ ឈាបយិស្សាម, សម្មាសម្ពុទ្ធសាសនេ.

៦០០. ‘‘ទេវានំ គិរមញ្ញាយ, វាចាសភិមុទីរិហំ;

ហដ្ឋោ ហដ្ឋេន ចិត្តេន, អាទិភិក្ខមទាសហំ.

៦០១. ‘‘មម សង្កប្បមញ្ញាយ, សត្ថា លោកេ អនុត្តរោ;

ទេវសង្ឃេ និសីទិត្វា, ឥមា គាថា អភាសថ.

៦០២. ‘‘‘សត្តាហំ អភិនិក្ខម្ម, ពោធិំ អជ្ឈគមំ អហំ;

ឥទំ មេ បឋមំ ភត្តំ, ព្រហ្មចារិស្ស យាបនំ.

៦០៣. ‘‘‘តុសិតា ហិ ឥធាគន្ត្វា, យោ មេ ភិក្ខំ ឧបានយិ;

តមហំ កិត្តយិស្សាមិ, សុណោថ មម ភាសតោ.

៦០៤. ‘‘‘តិំសកប្បសហស្សានិ [តិំសមត្តេ កប្បសគស្សេ (ស្យា. ក.)], ទេវរជ្ជំ ករិស្សតិ;

សព្ពេ ទេវេ អភិភោត្វា, តិទិវំ អាវសិស្សតិ.

៦០៥. ‘‘‘ទេវលោកា ចវិត្វាន, មនុស្សត្តំ គមិស្សតិ;

សហស្សធា ចក្កវត្តី, តត្ថ រជ្ជំ ករិស្សតិ.

៦០៦. ‘‘‘កប្បសតសហស្សម្ហិ, ឱក្កាកកុលសម្ភវោ;

គោតមោ នាម គោត្តេន, សត្ថា លោកេ ភវិស្សតិ.

៦០៧. ‘‘‘តិទសា សោ ចវិត្វាន, មនុស្សត្តំ គមិស្សតិ;

អគារា បព្ពជិត្វាន, ឆព្ពស្សានិ វសិស្សតិ.

៦០៨. ‘‘‘តតោ សត្តមកេ វស្សេ, ពុទ្ធោ សច្ចំ កថេស្សតិ;

កោណ្ឌញ្ញោ នាម នាមេន, បឋមំ សច្ឆិកាហិតិ’.

៦០៩. ‘‘និក្ខន្តេនានុបព្ពជិំ, បធានំ សុកតំ មយា;

កិលេសេ ឈាបនត្ថាយ, បព្ពជិំ អនគារិយំ.

៦១០. ‘‘អភិគន្ត្វាន សព្ពញ្ញូ, ពុទ្ធោ លោកេ សទេវកេ;

ឥសិនាមេ មិគារញ្ញេ [ឥមិនា មេ មហារញ្ញំ (ស្យា.), ឥមិនា មេ មិគារញ្ញំ (ក.)], អមតភេរិមាហនិ.

៦១១. ‘‘សោ ទានិ បត្តោ អមតំ, សន្តិបទមនុត្តរំ;

សព្ពាសវេ បរិញ្ញាយ, វិហរាមិ អនាសវោ.

៦១២. ‘‘បដិសម្ភិទា ចតស្សោ, វិមោក្ខាបិ ច អដ្ឋិមេ;

ឆឡភិញ្ញា សច្ឆិកតា, កតំ ពុទ្ធស្ស សាសនំ’’.

ឥត្ថំ សុទំ អាយស្មា អញ្ញាសិកោណ្ឌញ្ញោ [អញ្ញាតកោណ្ឌញ្ញោ (សី.), អញ្ញា កោណ្ឌញ្ញោ (ស្យា.)] ថេរោ ឥមា

គាថាយោ អភាសិត្ថាតិ.

អញ្ញាសិកោណ្ឌញ្ញត្ថេរស្សាបទានំ សត្តមំ.