៣-៨. បិណ្ឌោលភារទ្វាជត្ថេរអបទានំ

៦១៣. ‘‘បទុមុត្តរោ នាម ជិនោ, សយម្ភូ អគ្គបុគ្គលោ;

បុរតោ ហិមវន្តស្ស, ចិត្តកូដេ វសី តទា.

៦១៤. ‘‘អភីតរូបោ តត្ថាសិំ, មិគរាជា ចតុក្កមោ;

តស្ស សទ្ទំ សុណិត្វាន, វិក្ខម្ភន្តិ ពហុជ្ជនា.

៦១៥. ‘‘សុផុល្លំ បទុមំ គយ្ហ, ឧបគច្ឆិំ នរាសភំ;

វុដ្ឋិតស្ស សមាធិម្ហា, ពុទ្ធស្ស អភិរោបយិំ.

៦១៦. ‘‘ចាតុទ្ទិសំ នមស្សិត្វា, ពុទ្ធសេដ្ឋំ នរុត្តមំ;

សកំ ចិត្តំ បសាទេត្វា, សីហនាទំ នទិំ អហំ [តទា (ស្យា.)].

៦១៧. ‘‘បទុមុត្តរោ លោកវិទូ, អាហុតីនំ បដិគ្គហោ;

សកាសនេ និសីទិត្វា, ឥមា គាថា អភាសថ.

៦១៨. ‘‘‘ពុទ្ធស្ស គិរមញ្ញាយ, សព្ពេ ទេវា សមាគតា;

អាគតោ វទតំ សេដ្ឋោ, ធម្មំ សោស្សាម តំ មយំ.

៦១៩. ‘‘‘តេសំ ហាសបរេតានំ, បុរតោ លោកនាយកោ;

មម សទ្ទំ [កម្មំ (?)] បកិត្តេសិ, ទីឃទស្សី មហាមុនិ’.

៦២០. ‘‘យេនិទំ បទុមំ ទិន្នំ, សីហនាទោ ច នាទិតោ;

តមហំ កិត្តយិស្សាមិ, សុណាថ មម ភាសតោ.

៦២១. ‘‘‘ឥតោ អដ្ឋមកេ កប្បេ, ចក្កវត្តី ភវិស្សតិ;

សត្តរតនសម្បន្នោ ចតុទីបម្ហិ ឥស្សរោ.

៦២២. ‘‘‘ការយិស្សតិ ឥស្សរិយំ [ឥស្សរំ (ស្យា. ក.)], មហិយា ចតុសដ្ឋិយា;

បទុមោ នាម នាមេន, ចក្កវត្តី មហព្ពលោ.

៦២៣. ‘‘កប្បសតសហស្សម្ហិ, ឱក្កាកកុលសម្ភវោ;

គោតមោ នាម គោត្តេន, សត្ថា លោកេ ភវិស្សតិ.

៦២៤. ‘បកាសិតេ បាវចនេ, ព្រហ្មពន្ធុ ភវិស្សតិ;

ព្រហ្មញ្ញា អភិនិក្ខម្ម, បព្ពជិស្សតិ តាវទេ’.

៦២៥. ‘‘បធានបហិតត្តោ សោ, ឧបសន្តោ និរូបធិ;

សព្ពាសវេ បរិញ្ញាយ, និព្ពាយិស្សតិនាសវោ.

៦២៦. ‘‘វិជនេ បន្តសេយ្យម្ហិ, វាឡមិគសមាកុលេ;

សព្ពាសវេ បរិញ្ញាយ, និព្ពាយិស្សតិនាសវោ.

៦២៧. ‘‘បដិសម្ភិទា ចតស្សោ, វិមោក្ខាបិ ច អដ្ឋិមេ;

ឆឡភិញ្ញា សច្ឆិកតា, កតំ ពុទ្ធស្ស សាសនំ’’.

ឥត្ថំ សុទំ អាយស្មា បិណ្ឌោលភារទ្វាជោ ថេរោ ឥមា គាថាយោ អភាសិត្ថាតិ.

បិណ្ឌោលភារទ្វាជត្ថេរស្សាបទានំ អដ្ឋមំ.