៣-៩. ខទិរវនិយរេវតត្ថេរអបទានំ

៦២៨. ‘‘គង្គា ភាគីរថី នាម, ហិមវន្តា បភាវិតា;

កុតិត្ថេ នាវិកោ អាសិំ, ឱរិមេ ច តរិំ [ឱរិមំ ច តរេ (ស្យា.)] អហំ.

៦២៩. ‘‘បទុមុត្តរោ នាយកោ, សម្ពុទ្ធោ ទ្វិបទុត្តមោ;

វសី សតសហស្សេហិ, គង្គាតីរមុបាគតោ [បុព្ពេ មយ្ហំ សុតំ អាសិ,§‘‘បទុមុត្តរនាយកោ; វសីសតសហស្សេហិ, គង្គាសោតំ តរិស្សតិ‘‘; (សី.)].

៦៣០. ‘‘ពហូ នាវា សមានេត្វា, វឌ្ឍកីហិ [ចម្មកេហិ (ក.)] សុសង្ខតំ;

នាវាយ [នាវានំ (ក.)] ឆទនំ កត្វា, បដិមានិំ នរាសភំ.

៦៣១. ‘‘អាគន្ត្វាន ច សម្ពុទ្ធោ, អារូហិ តញ្ច នាវកំ;

វារិមជ្ឈេ ឋិតោ សត្ថា, ឥមា គាថា អភាសថ.

៦៣២. ‘‘‘យោ សោ តារេសិ សម្ពុទ្ធំ, សង្ឃញ្ចាបិ អនាសវំ;

តេន ចិត្តប្បសាទេន, ទេវលោកេ រមិស្សតិ.

៦៣៣. ‘‘‘និព្ពត្តិស្សតិ តេ ព្យម្ហំ, សុកតំ នាវសណ្ឋិតំ;

អាកាសេ បុប្ផឆទនំ, ធារយិស្សតិ សព្ពទា.

៦៣៤. ‘‘‘អដ្ឋបញ្ញាសកប្បម្ហិ, តារកោ [តារណោ (ស្យា.)] នាម ខត្តិយោ;

ចាតុរន្តោ វិជិតាវី, ចក្កវត្តី ភវិស្សតិ.

៦៣៥. ‘‘‘សត្តបញ្ញាសកប្បម្ហិ, ចម្មកោ [ចម្បកោ (សី.), ចម្ពកោ (ស្យា.)] នាម ខត្តិយោ;

ឧគ្គច្ឆន្តោវ សូរិយោ, ជោតិស្សតិ មហព្ពលោ.

៦៣៦. ‘‘‘កប្បសតសហស្សម្ហិ, ឱក្កាកកុលសម្ភវោ;

គោតមោ នាម គោត្តេន, សត្ថា លោកេ ភវិស្សតិ.

៦៣៧. ‘‘‘តិទសា សោ ចវិត្វាន, មនុស្សត្តំ គមិស្សតិ;

រេវតោ នាម នាមេន, ព្រហ្មពន្ធុ ភវិស្សតិ.

៦៣៨. ‘‘‘អគារា និក្ខមិត្វាន, សុក្កមូលេន ចោទិតោ;

គោតមស្ស ភគវតោ, សាសនេ បព្ពជិស្សតិ.

៦៣៩. ‘‘‘សោ បច្ឆា បព្ពជិត្វាន, យុត្តយោគោ វិបស្សកោ;

សព្ពាសវេ បរិញ្ញាយ, និព្ពាយិស្សតិនាសវោ’.

៦៤០. ‘‘វីរិយំ [វិរិយំ (សី. ស្យា.)] មេ ធុរធោរយ្ហំ, យោគក្ខេមាធិវាហនំ;

ធារេមិ អន្តិមំ ទេហំ, សម្មាសម្ពុទ្ធសាសនេ.

៦៤១. ‘‘សតសហស្សេ កតំ កម្មំ, ផលំ ទស្សេសិ មេ ឥធ;

សុមុត្តោ សរវេគោវ, កិលេសេ ឈាបយី មម.

៦៤២. ‘‘តតោ មំ វននិរតំ, ទិស្វា លោកន្តគូ មុនិ;

វនវាសិភិក្ខូនគ្គំ, បញ្ញបេសិ មហាមតិ.

៦៤៣. ‘‘បដិសម្ភិទា ចតស្សោ, វិមោក្ខាបិ ច អដ្ឋិមេ;

ឆឡភិញ្ញា សច្ឆិកតា, កតំ ពុទ្ធស្ស សាសនំ’’.

ឥត្ថំ សុទំ អាយស្មា ខទិរវនិយោ រេវតោ ថេរោ ឥមា គាថាយោ អភាសិត្ថាតិ.

ខទិរវនិយរេវតត្ថេរស្សាបទានំ នវមំ.