៣-១០. អានន្ទត្ថេរអបទានំ

៦៤៤. ‘‘អារាមទ្វារា និក្ខម្ម, បទុមុត្តរោ មហាមុនិ;

វស្សេន្តោ អមតំ វុដ្ឋិំ, និព្ពាបេសិ មហាជនំ.

៦៤៥. ‘‘សតសហស្សំ តេ ធីរា, ឆឡភិញ្ញា មហិទ្ធិកា;

បរិវារេន្តិ សម្ពុទ្ធំ, ឆាយាវ អនបាយិនី [អនុបាយិនី (ស្យា. ក.)].

៦៤៦. ‘‘ហត្ថិក្ខន្ធគតោ អាសិំ, សេតច្ឆត្តំ វរុត្តមំ;

សុចារុរូបំ ទិស្វាន, វិត្តិ មេ ឧទបជ្ជថ.

៦៤៧. ‘‘ឱរុយ្ហ ហត្ថិខន្ធម្ហា, ឧបគច្ឆិំ នរាសភំ;

រតនាមយឆត្តំ មេ, ពុទ្ធសេដ្ឋស្ស ធារយិំ.

៦៤៨. ‘‘មម សង្កប្បមញ្ញាយ, បទុមុត្តរោ មហាឥសិ;

តំ កថំ ឋបយិត្វាន, ឥមា គាថា អភាសថ.

៦៤៩. ‘‘‘យោ សោ ឆត្តមធារេសិ, សោណ្ណាលង្ការភូសិតំ;

តមហំ កិត្តយិស្សាមិ, សុណោថ មម ភាសតោ.

៦៥០. ‘‘‘ឥតោ គន្ត្វា អយំ បោសោ, តុសិតំ អាវសិស្សតិ;

អនុភោស្សតិ សម្បត្តិំ, អច្ឆរាហិ បុរក្ខតោ.

៦៥១. ‘‘‘ចតុត្តិំសតិក្ខត្តុញ្ច, ទេវរជ្ជំ ករិស្សតិ;

ពលាធិបោ អដ្ឋសតំ, វសុធំ អាវសិស្សតិ.

៦៥២. ‘‘‘អដ្ឋបញ្ញាសក្ខត្តុញ្ច, ចក្កវត្តី ភវិស្សតិ;

បទេសរជ្ជំ វិបុលំ, មហិយា ការយិស្សតិ.

៦៥៣. ‘‘‘កប្បសតសហស្សម្ហិ, ឱក្កាកកុលសម្ភវោ;

គោតមោ នាម គោត្តេន, សត្ថា លោកេ ភវិស្សតិ.

៦៥៤. ‘‘‘សក្យានំ កុលកេតុស្ស, ញាតិពន្ធុ ភវិស្សតិ;

អានន្ទោ នាម នាមេន, ឧបដ្ឋាកោ មហេសិនោ.

៦៥៥. ‘‘‘អាតាបី និបកោ ចាបិ, ពាហុសច្ចេ សុកោវិទោ;

និវាតវុត្តិ អត្ថទ្ធោ, សព្ពបាឋី ភវិស្សតិ.

៦៥៦. ‘‘‘បធានបហិតត្តោ សោ, ឧបសន្តោ និរូបធិ;

សព្ពាសវេ បរិញ្ញាយ, និព្ពាយិស្សតិនាសវោ.

៦៥៧. ‘‘‘សន្តិ អារញ្ញកា នាគា, កុញ្ជរា សដ្ឋិហាយនា;

តិធាបភិន្នា មាតង្គា, ឦសាទន្តា ឧរូឡ្ហវា.

៦៥៨. ‘‘‘អនេកសតសហស្សា, បណ្ឌិតាបិ មហិទ្ធិកា;

សព្ពេ តេ ពុទ្ធនាគស្ស, ន ហោន្តុ បណិធិម្ហិ តេ’ [ន ហោន្តិ បរិវិម្ភិតា (ស្យា.), ន ហោន្តិ បណិធិម្ហិ តេ (ក.)].

៦៥៩. ‘‘អាទិយាមេ នមស្សាមិ, មជ្ឈិមេ អថ បច្ឆិមេ;

បសន្នចិត្តោ សុមនោ, ពុទ្ធសេដ្ឋំ ឧបដ្ឋហិំ.

៦៦០. ‘‘អាតាបី និបកោ ចាបិ, សម្បជានោ បតិស្សតោ;

សោតាបត្តិផលំ បត្តោ, សេខភូមីសុ កោវិទោ.

៦៦១. ‘‘សតសហស្សិតោ កប្បេ, យំ កម្មមភិនីហរិំ;

តាហំ ភូមិមនុប្បត្តោ, ឋិតា សទ្ធម្មមាចលា [ឋិតោ សទ្ធម្មមាចលោ (សី.), ឋិតា សទ្ធា មហប្ផលា (ស្យា.)].

៦៦២. ‘‘ស្វាគតំ វត មេ អាសិ, ពុទ្ធសេដ្ឋស្ស សន្តិកេ;

តិស្សោ វិជ្ជា អនុប្បត្តា, កតំ ពុទ្ធស្ស សាសនំ.

៦៦៣. ‘‘បដិសម្ភិទា ចតស្សោ, វិមោក្ខាបិ ច អដ្ឋិមេ;

ឆឡភិញ្ញា សច្ឆិកតា, កតំ ពុទ្ធស្ស សាសនំ’’.

ឥត្ថំ សុទំ អាយស្មា អានន្ទោ ថេរោ ឥមា គាថាយោ អភាសិត្ថាតិ.

អានន្ទត្ថេរស្សាបទានំ ទសមំ.

តស្សុទ្ទានំ –

ពុទ្ធោ បច្ចេកពុទ្ធោ ច, សារិបុត្តោ ច កោលិតោ;

កស្សបោ អនុរុទ្ធោ ច, បុណ្ណត្ថេរោ ឧបាលិ ច.

អញ្ញាសិកោណ្ឌញ្ញោ បិណ្ឌោលោ, រេវតានន្ទបណ្ឌិតោ;

ឆសតានិ ច បញ្ញាស, គាថាយោ សព្ពបិណ្ឌិតា.

អបទានេ ពុទ្ធវគ្គោ បឋមោ.