៣-៥. បុណ្ណមន្តាណិបុត្តត្ថេរអបទានំ

៤៣៤. ‘‘អជ្ឈាយកោ មន្តធរោ, តិណ្ណំ វេទាន បារគូ;

បុរក្ខតោម្ហិ សិស្សេហិ, ឧបគច្ឆិំ នរុត្តមំ.

៤៣៥. ‘‘បទុមុត្តរោ លោកវិទូ, អាហុតីនំ បដិគ្គហោ;

មម កម្មំ បកិត្តេសិ, សង្ខិត្តេន មហាមុនិ.

៤៣៦. ‘‘តាហំ ធម្មំ សុណិត្វាន, អភិវាទេត្វាន សត្ថុនោ;

អញ្ជលិំ បគ្គហេត្វាន, បក្កមិំ [បក្កាមិំ (សី. ស្យា.)] ទក្ខិណាមុខោ.

៤៣៧. ‘‘សង្ខិត្តេន សុណិត្វាន, វិត្ថារេន អភាសយិំ [អទេសយិំ (សី. ស្យា.)];

សព្ពេ សិស្សា អត្តមនា, សុត្វាន មម ភាសតោ;

សកំ ទិដ្ឋិំ វិនោទេត្វា, ពុទ្ធេ ចិត្តំ បសាទយុំ.

៤៣៨. ‘‘សង្ខិត្តេនបិ ទេសេមិ, វិត្ថារេន តថេវហំ [ទេសេសិំ វិត្ថារេនបិ ភាសយិំ (ក.)];

អភិធម្មនយញ្ញូហំ, កថាវត្ថុវិសុទ្ធិយា;

សព្ពេសំ វិញ្ញាបេត្វាន, វិហរាមិ អនាសវោ.

៤៣៩. ‘‘ឥតោ បញ្ចសតេ កប្បេ, ចតុរោ សុប្បកាសកា;

សត្តរតនសម្បន្នា, ចតុទីបម្ហិ ឥស្សរា.

៤៤០. ‘‘បដិសម្ភិទា ចតស្សោ, វិមោក្ខាបិ ច អដ្ឋិមេ;

ឆឡភិញ្ញា សច្ឆិកតា, កតំ ពុទ្ធស្ស សាសនំ’’.

ឥត្ថំ សុទំ អាយស្មា បុណ្ណោ មន្តាណិបុត្តោ ថេរោ ឥមា គាថាយោ អភាសិត្ថាតិ.

បុណ្ណមន្តាណិបុត្តត្ថេរស្សាបទានំ បញ្ចមំ.