៣-៤. អនុរុទ្ធត្ថេរអបទានំ

៤២១. ‘‘សុមេធំ ភគវន្តាហំ, លោកជេដ្ឋំ នរាសភំ;

វូបកដ្ឋំ វិហរន្តំ, អទ្ទសំ លោកនាយកំ.

៤២២. ‘‘ឧបគន្ត្វាន សម្ពុទ្ធំ, សុមេធំ លោកនាយកំ;

អញ្ជលិំ បគ្គហេត្វាន, ពុទ្ធសេដ្ឋមយាចហំ.

៤២៣. ‘‘អនុកម្ប មហាវីរ, លោកជេដ្ឋ នរាសភ;

បទីបំ តេ បទស្សាមិ, រុក្ខមូលម្ហិ ឈាយតោ.

៤២៤. ‘‘អធិវាសេសិ សោ ធីរោ, សយម្ភូ វទតំ វរោ;

ទុមេសុ វិនិវិជ្ឈិត្វា, យន្តំ យោជិយហំ តទា.

៤២៥. ‘‘សហស្សវដ្ដិំ បាទាសិំ, ពុទ្ធស្ស លោកពន្ធុនោ;

សត្តាហំ បជ្ជលិត្វាន, ទីបា វូបសមិំសុ មេ.

៤២៦. ‘‘តេន ចិត្តប្បសាទេន, ចេតនាបណិធីហិ ច;

ជហិត្វា មានុសំ ទេហំ, វិមានមុបបជ្ជហំ.

៤២៧. ‘‘ឧបបន្នស្ស ទេវត្តំ, ព្យម្ហំ អាសិ សុនិម្មិតំ;

សមន្តតោ បជ្ជលតិ, ទីបទានស្សិទំ ផលំ.

៤២៨. ‘‘សមន្តា យោជនសតំ, វិរោចេសិមហំ តទា;

សព្ពេ ទេវេ អភិភោមិ, ទីបទានស្សិទំ ផលំ.

៤២៩. ‘‘តិំសកប្បានិ ទេវិន្ទោ, ទេវរជ្ជមការយិំ;

ន មំ កេចីតិមញ្ញន្តិ, ទីបទានស្សិទំ ផលំ.

៤៣០. ‘‘អដ្ឋវីសតិក្ខត្តុញ្ច, ចក្កវត្តី អហោសហំ;

ទិវា រត្តិញ្ច បស្សាមិ, សមន្តា យោជនំ តទា.

៤៣១. ‘‘សហស្សលោកំ ញាណេន, បស្សាមិ សត្ថុ សាសនេ;

ទិព្ពចក្ខុមនុប្បត្តោ, ទីបទានស្សិទំ ផលំ.

៤៣២. ‘‘សុមេធោ នាម សម្ពុទ្ធោ, តិំសកប្បសហស្សិតោ;

តស្ស ទីបោ មយា ទិន្នោ, វិប្បសន្នេន ចេតសា.

៤៣៣. ‘‘បដិសម្ភិទា ចតស្សោ, វិមោក្ខាបិ ច អដ្ឋិមេ;

ឆឡភិញ្ញា សច្ឆិកតា, កតំ ពុទ្ធស្ស សាសនំ’’.

ឥត្ថំ សុទំ អាយស្មា អនុរុទ្ធោ ថេរោ ឥមា គាថាយោ អភាសិត្ថាតិ.

អនុរុទ្ធត្ថេរស្សាបទានំ ចតុត្ថំ.