៣-៣. មហាកស្សបត្ថេរអបទានំ

៣៩៨. ‘‘បទុមុត្តរស្ស ភគវតោ, លោកជេដ្ឋស្ស តាទិនោ;

និព្ពុតេ លោកនាថម្ហិ, បូជំ កុព្ពន្តិ សត្ថុនោ.

៣៩៩. ‘‘ឧទគ្គចិត្តា ជនតា, អាមោទិតបមោទិតា;

តេសុ សំវេគជាតេសុ, បីតិ មេ ឧទបជ្ជថ.

៤០០. ‘‘ញាតិមិត្តេ សមានេត្វា, ឥទំ វចនមព្រវិំ;

បរិនិព្ពុតោ មហាវីរោ, ហន្ទ បូជំ ករោមសេ.

៤០១. ‘‘សាធូតិ តេ បដិស្សុត្វា, ភិយ្យោ ហាសំ ជនិំសុ មេ;

ពុទ្ធស្មិំ លោកនាថម្ហិ, កាហាម បុញ្ញសញ្ចយំ.

៤០២. ‘‘អគ្ឃិយំ សុកតំ កត្វា, សតហត្ថសមុគ្គតំ;

ទិយឌ្ឍហត្ថបត្ថដំ, វិមានំ នភមុគ្គតំ.

៤០៣. ‘‘កត្វាន ហម្មិយំ តត្ថ, តាលបន្តីហិ ចិត្តិតំ;

សកំ ចិត្តំ បសាទេត្វា, ចេតិយំ បូជយុត្តមំ.

៤០៤. ‘‘អគ្គិក្ខន្ធោវ ជលិតោ, កិំសុកោ ឥវ [សាលរាជាវ (សី.)] ផុល្លិតោ;

ឥន្ទលដ្ឋីវ អាកាសេ, ឱភាសេតិ ចតុទ្ទិសា.

៤០៥. ‘‘តត្ថ ចិត្តំ បសាទេត្វា, កត្វាន កុសលំ ពហុំ;

បុព្ពកម្មំ សរិត្វាន, តិទសំ ឧបបជ្ជហំ.

៤០៦. ‘‘សហស្សយុត្តំ ហយវាហិំ, ទិព្ពយានមធិដ្ឋិតោ;

ឧព្ពិទ្ធំ ភវនំ មយ្ហំ, សត្តភូមំ សមុគ្គតំ.

៤០៧. ‘‘កូដាគារសហស្សានិ, សព្ពសោណ្ណមយា អហុំ;

ជលន្តិ សកតេជេន, ទិសា សព្ពា បភាសយំ.

៤០៨. ‘‘សន្តិ អញ្ញេបិ និយ្យូហា, លោហិតង្គមយា តទា;

តេបិ ជោតន្តិ អាភាយ, សមន្តា ចតុរោ ទិសា.

៤០៩. ‘‘បុញ្ញកម្មាភិនិព្ពត្តា, កូដាគារា សុនិម្មិតា;

មណិមយាបិ ជោតន្តិ, ទិសា ទស [ទិសោទិសំ (ស្យា.)] សមន្តតោ.

៤១០. ‘‘តេសំ ឧជ្ជោតមានានំ, ឱភាសោ វិបុលោ អហុ;

សព្ពេ ទេវេ អភិភោមិ, បុញ្ញកម្មស្សិទំ ផលំ.

៤១១. ‘‘សដ្ឋិកប្បសហស្សម្ហិ, ឧព្ពិទ្ធោ នាម ខត្តិយោ;

ចាតុរន្តោ វិជិតាវី, បថវិំ អាវសិំ អហំ.

៤១២. ‘‘តថេវ ភទ្ទកេ កប្បេ, តិំសក្ខត្តុំ អហោសហំ;

សកកម្មាភិរទ្ធោម្ហិ, ចក្កវត្តី មហព្ពលោ.

៤១៣. ‘‘សត្តរតនសម្បន្នោ, ចតុទីបម្ហិ ឥស្សរោ;

តត្ថាបិ ភវនំ មយ្ហំ, ឥន្ទលដ្ឋីវ ឧគ្គតំ.

៤១៤. ‘‘អាយាមតោ ចតុព្ពីសំ, វិត្ថារេន ច ទ្វាទស;

រម្មណំ [រម្មកំ (សី. ស្យា.)] នាម នគរំ, ទឡ្ហបាការតោរណំ.

៤១៥. ‘‘អាយាមតោ បញ្ចសតំ, វិត្ថារេន តទឌ្ឍកំ;

អាកិណ្ណំ ជនកាយេហិ, តិទសានំ បុរំ វិយ.

៤១៦. ‘‘យថា សូចិឃរេ សូចី, បក្ខិត្តា បណ្ណវីសតិ;

អញ្ញមញ្ញំ បឃដ្ដេន្តិ, អាកិណ្ណំ ហោតិ លង្កតំ [តំ តទា (សី.), សតតា (ស្យា.), សង្ករំ (?)].

៤១៧. ‘‘ឯវម្បិ នគរំ មយ្ហំ, ហត្ថិស្សរថសំកុលំ;

មនុស្សេហិ សទាកិណ្ណំ, រម្មណំ នគរុត្តមំ.

៤១៨. ‘‘តត្ថ ភុត្វា បិវិត្វា ច, បុន ទេវត្តនំ គតោ [បុនបិ ទេវតង្គតោ (ក.)].

ភវេ បច្ឆិមកេ មយ្ហំ, អហោសិ កុលសម្បទា.

៤១៩. ‘‘ព្រាហ្មញ្ញកុលសម្ភូតោ, មហារតនសញ្ចយោ;

អសីតិកោដិយោ ហិត្វា, ហិរញ្ញស្សាបិ បព្ពជិំ.

៤២០. ‘‘បដិសម្ភិទា ចតស្សោ, វិមោក្ខាបិ ច អដ្ឋិមេ;

ឆឡភិញ្ញា សច្ឆិកតា, កតំ ពុទ្ធស្ស សាសនំ’’.

ឥត្ថំ សុទំ អាយស្មា មហាកស្សបោ ថេរោ ឥមា គាថាយោ អភាសិត្ថាតិ.

មហាកស្សបត្ថេរស្សាបទានំ តតិយំ.