៣-២. មហាមោគ្គល្លានត្ថេរអបទានំ

៣៧៥. ‘‘អនោមទស្សី ភគវា, លោកជេដ្ឋោ នរាសភោ;

វិហាសិ ហិមវន្តម្ហិ, ទេវសង្ឃបុរក្ខតោ.

៣៧៦. ‘‘វរុណោ នាម នាមេន, នាគរាជា អហំ តទា;

កាមរូបី វិកុព្ពាមិ, មហោទធិនិវាសហំ.

៣៧៧. ‘‘សង្គណិយំ គណំ ហិត្វា, តូរិយំ បដ្ឋបេសហំ;

សម្ពុទ្ធំ បរិវារេត្វា, វាទេសុំ អច្ឆរា តទា.

៣៧៨. ‘‘វជ្ជមានេសុ តូរេសុ, ទេវា តូរានិ [តុរិយេសុ, ទេវា តុរិយានិ (សី. ស្យា.)] វជ្ជយុំ;

ឧភិន្នំ សទ្ទំ សុត្វាន, ពុទ្ធោបិ សម្បពុជ្ឈថ.

៣៧៩. ‘‘និមន្តេត្វាន សម្ពុទ្ធំ, សកំ ភវនុបាគមិំ;

អាសនំ បញ្ញបេត្វាន, កាលមារោចយិំ អហំ.

៣៨០. ‘‘ខីណាសវសហស្សេហិ, បរិវុតោ លោកនាយកោ;

ឱភាសេន្តោ ទិសា សព្ពា, ភវនំ មេ ឧបាគមិ.

៣៨១. ‘‘ឧបវិដ្ឋំ មហាវីរំ, ទេវទេវំ នរាសភំ;

សភិក្ខុសង្ឃំ តប្បេសិំ [សន្តប្បេសិំ (ស្យា.), តប្បេមិ (ក.)], អន្នបានេនហំ តទា.

៣៨២. ‘‘អនុមោទិ មហាវីរោ, សយម្ភូ អគ្គបុគ្គលោ;

ភិក្ខុសង្ឃេ និសីទិត្វា, ឥមា គាថា អភាសថ.

៣៨៣. ‘‘‘យោ សោ [យំ សោ (ក.)] សង្ឃំ អបូជេសិ, ពុទ្ធញ្ច លោកនាយកំ;

តេន ចិត្តប្បសាទេន, ទេវលោកំ គមិស្សតិ.

៣៨៤. ‘‘‘សត្តសត្តតិក្ខត្តុញ្ច, ទេវរជ្ជំ ករិស្សតិ;

បថព្យា រជ្ជំ អដ្ឋសតំ, វសុធំ អាវសិស្សតិ.

៣៨៥. ‘‘‘បញ្ចបញ្ញាសក្ខត្តុញ្ច, ចក្កវត្តី ភវិស្សតិ;

ភោគា អសង្ខិយា តស្ស, ឧប្បជ្ជិស្សន្តិ តាវទេ.

៣៨៦. ‘‘‘អបរិមេយ្យេ ឥតោ កប្បេ, ឱក្កាកកុលសម្ភវោ;

គោតមោ នាម គោត្តេន [នាមេន (សី.)], សត្ថា លោកេ ភវិស្សតិ.

៣៨៧. ‘‘‘និរយា សោ ចវិត្វាន, មនុស្សតំ គមិស្សតិ;

កោលិតោ នាម នាមេន, ព្រហ្មពន្ធុ ភវិស្សតិ.

៣៨៨. ‘‘‘សោ បច្ឆា បព្ពជិត្វាន, កុសលមូលេន ចោទិតោ;

គោតមស្ស ភគវតោ, ទុតិយោ ហេស្សតិ សាវកោ.

៣៨៩. ‘‘‘អារទ្ធវីរិយោ បហិតត្តោ, ឥទ្ធិយា បារមិំ គតោ;

សព្ពាសវេ បរិញ្ញាយ, និព្ពាយិស្សតិនាសវោ’.

៣៩០. ‘‘បាបមិត្តោបនិស្សាយ, កាមរាគវសំ គតោ;

មាតរំ បិតរញ្ចាបិ, ឃាតយិំ ទុដ្ឋមានសោ.

៣៩១. ‘‘យំ យំ យោនុបបជ្ជាមិ, និរយំ អថ មានុសំ;

បាបកម្មសមង្គិតា, ភិន្នសីសោ មរាមហំ.

៣៩២. ‘‘ឥទំ បច្ឆិមកំ មយ្ហំ, ចរិមោ វត្តតេ ភវោ;

ឥធាបិ ឯទិសោ មយ្ហំ, មរណកាលេ ភវិស្សតិ.

៣៩៣. ‘‘បវិវេកមនុយុត្តោ, សមាធិភាវនារតោ;

សព្ពាសវេ បរិញ្ញាយ, វិហរាមិ អនាសវោ.

៣៩៤. ‘‘ធរណិម្បិ សុគម្ភីរំ, ពហលំ ទុប្បធំសិយំ;

វាមង្គុដ្ឋេន ខោភេយ្យំ, ឥទ្ធិយា បារមិំ គតោ.

៣៩៥. ‘‘អស្មិមានំ ន បស្សាមិ, មានោ មយ្ហំ ន វិជ្ជតិ;

សាមណេរេ ឧបាទាយ, គរុចិត្តំ ករោមហំ.

៣៩៦. ‘‘អបរិមេយ្យេ ឥតោ កប្បេ, យំ កម្មមភិនីហរិំ;

តាហំ ភូមិមនុប្បត្តោ, បត្តោម្ហិ អាសវក្ខយំ.

៣៩៧. ‘‘បដិសម្ភិទា ចតស្សោ, វិមោក្ខាបិ ច អដ្ឋិមេ;

ឆឡភិញ្ញា សច្ឆិកតា, កតំ ពុទ្ធស្ស សាសនំ’’.

ឥត្ថំ សុទំ អាយស្មា មហាមោគ្គល្លានោ ថេរោ ឥមា គាថាយោ អភាសិត្ថាតិ.

មហាមោគ្គល្លានត្ថេរស្សាបទានំ ទុតិយំ.