៣-១. សារិបុត្តត្ថេរអបទានំ

អថ ថេរាបទានំ សុណាថ –

១៤១. ‘‘ហិមវន្តស្ស អវិទូរេ, លម្ពកោ នាម បព្ពតោ;

អស្សមោ សុកតោ មយ្ហំ, បណ្ណសាលា សុមាបិតា.

១៤២. ‘‘ឧត្តានកូលា នទិកា, សុបតិត្ថា មនោរមា;

សុសុទ្ធបុឡិនាកិណ្ណា, អវិទូរេ មមស្សមំ.

១៤៣. ‘‘អសក្ខរា អបព្ភារា, សាទុ អប្បដិគន្ធិកា;

សន្ទតី នទិកា តត្ថ, សោភយន្តា មមស្សមំ.

១៤៤. ‘‘កុម្ភីលា មករា ចេត្ថ, សុសុមារា [សុំសុមារា (សី. ស្យា. )] ច កច្ឆបា;

ចរន្តិ នទិយា តត្ថ, សោភយន្តា មមស្សមំ.

១៤៥. ‘‘បាឋីនា បាវុសា មច្ឆា, ពលជា [វជលា (សី. ស្យា.) ជលជា (បី.)] មុញ្ជរោហិតា;

វគ្គឡា [វគ្គុលា (សី.) វគ្គុឡា (ស្យា.) មគ្គុរា (ថេរគាថា)] បបតាយន្តា, សោភយន្តិ [បបតាយន្តិ, សោភយន្តា (ក.)] មមស្សមំ.

១៤៦. ‘‘ឧភោ កូលេសុ នទិយា, បុប្ផិនោ ផលិនោ ទុមា;

ឧភតោ អភិលម្ពន្តា, សោភយន្តិ [អភិលម្ពន្តិ សោភយន្តា (ក.)] មមស្សមំ.

១៤៧. ‘‘អម្ពា សាលា ច តិលកា, បាដលី សិន្ទុវារកា [សិន្ទុវារិកា (ពហូសុ)];

ទិព្ពគន្ធា សម្បវន្តិ, បុប្ផិតា មម អស្សមេ.

១៤៨. ‘‘ចម្បកា សឡលា នីបា [និម្ពា (ក.)], នាគបុន្នាគកេតកា;

ទិព្ពគន្ធា សម្បវន្តិ, បុប្ផិតា មម អស្សមេ.

១៤៩. ‘‘អតិមុត្តា អសោកា ច, ភគិនីមាលា ច បុប្ផិតា;

អង្កោលា ពិម្ពិជាលា [ពិម្ពជាលា (ក.)] ច, បុប្ផិតា មម អស្សមេ.

១៥០. ‘‘កេតកា កន្ទលិ [កទលី (ស្យា.)] ចេវ, គោធុកា តិណសូលិកា;

ទិព្ពគន្ធំ សម្បវន្តា, សោភយន្តិ មមស្សមំ.

១៥១. ‘‘កណិការា កណ្ណិកា ច, អសនា អជ្ជុនា ពហូ;

ទិព្ពគន្ធំ សម្បវន្តា, សោភយន្តិ មមស្សមំ.

១៥២. ‘‘បុន្នាគា គិរិបុន្នាគា, កោវិឡារា ច បុប្ផិតា;

ទិព្ពគន្ធំ សម្បវន្តា, សោភយន្តិ មមស្សមំ.

១៥៣. ‘‘ឧទ្ធាលកា ច កុដជា, កទម្ពា វកុលា ពហូ;

ទិព្ពគន្ធំ សម្បវន្តា, សោភយន្តិ មមស្សមំ.

១៥៤. ‘‘អាឡកា ឥសិមុគ្គា ច, កទលិមាតុលុង្គិយោ;

គន្ធោទកេន សំវឌ្ឍា, ផលានិ ធារយន្តិ តេ.

១៥៥. ‘‘អញ្ញេ បុប្ផន្តិ បទុមា, អញ្ញេ ជាយន្តិ កេសរី;

អញ្ញេ ឱបុប្ផា បទុមា, បុប្ផិតា តឡាកេ តទា.

១៥៦. ‘‘គព្ភំ គណ្ហន្តិ បទុមា, និទ្ធាវន្តិ មុលាឡិយោ;

សិំឃាដិបត្តមាកិណ្ណា, សោភន្តិ តឡាកេ តទា.

១៥៧. ‘‘នយិតា អម្ពគន្ធី ច, ឧត្តលី ពន្ធុជីវកា;

ទិព្ពគន្ធា សម្បវន្តិ, បុប្ផិតា តឡាកេ តទា.

១៥៨. ‘‘បាឋីនា បាវុសា មច្ឆា, ពលជា មុញ្ជរោហិតា;

សំគុលា មគ្គុរា [មង្គុរា (សី. ក.)] ចេវ, វសន្តិ តឡាកេ តទា.

១៥៩. ‘‘កុម្ភីលា សុសុមារា ច, តន្តិគាហា ច រក្ខសា;

ឱគុហា [ឱគាហា (ស្យា.)] អជគរា ច, វសន្តិ តឡាកេ តទា.

១៦០. ‘‘បារេវតា រវិហំសា, ចក្កវាកា នទីចរា;

កោកិលា សុកសាឡិកា, ឧបជីវន្តិ តំ សរំ.

១៦១. ‘‘កុក្កុត្ថកា កុឡីរកា, វនេ បោក្ខរសាតកា;

ទិន្ទិភា សុវបោតា ច, ឧបជីវន្តិ តំ សរំ.

១៦២. ‘‘ហំសា កោញ្ចា មយូរា ច, កោកិលា តម្ពចូឡកា [តម្ពចូឡិកា (សី.)];

បម្បកា ជីវំជីវា ច, ឧបជីវន្តិ តំ សរំ.

១៦៣. ‘‘កោសិកា បោដ្ឋសីសា ច, កុររា សេនកា ពហូ;

មហាកាឡា ច សកុណា, ឧបជីវន្តិ តំ សរំ.

១៦៤. ‘‘បសទា ច វរាហា ច, ចមរា គណ្ឌកា ពហូ [វកា ភេរណ្ឌកា ពហូ (សី. ស្យា.)];

រោហិច្ចា សុកបោតា [សុត្តបោតា (ស្យា.)] ច, ឧបជីវន្តិ តំ សរំ.

១៦៥. ‘‘សីហព្យគ្ឃា ច ទីបី ច, អច្ឆកោកតរច្ឆកា;

តិធា បភិន្នមាតង្គា, ឧបជីវន្តិ តំ សរំ.

១៦៦. ‘‘កិន្នរា វានរា ចេវ, អថោបិ វនកម្មិកា;

ចេតា ច លុទ្ទកា ចេវ, ឧបជីវន្តិ តំ សរំ.

១៦៧. ‘‘តិន្ទុកានិ បិយាលានិ, មធុកា កាសុមារយោ [កាសមារិយោ (ស្យា.)];

ធុវំ ផលានិ ធារេន្តិ, អវិទូរេ មមស្សមំ.

១៦៨. ‘‘កោសម្ពា [កោសុម្ភា (សី. ស្យា.)] សឡលា និម្ពា [សឡលា នីបា (សី. ស្យា.) បនសា អម្ពា (?)], សាទុផលសមាយុតា;

ធុវំ ផលានិ ធារេន្តិ, អវិទូរេ មមស្សមំ.

១៦៩. ‘‘ហរីតកា អាមលកា, អម្ពជម្ពុវិភីតកា;

កោលា ភល្លាតកា ពិល្លា, ផលានិ ធារយន្តិ តេ.

១៧០. ‘‘អាលុវា ច កឡម្ពា ច, ពិឡាលីតក្កឡានិ ច;

ជីវកា សុតកា ចេវ, ពហុកា មម អស្សមេ.

១៧១. ‘‘អស្សមស្សាវិទូរម្ហិ, តឡាកាសុំ សុនិម្មិតា;

អច្ឆោទកា សីតជលា, សុបតិត្ថា មនោរមា.

១៧២. ‘‘បទុមុប្បលសញ្ឆន្នា, បុណ្ឌរីកសមាយុតា;

មន្ទាលកេហិ សញ្ឆន្នា, ទិព្ពគន្ធោ បវាយតិ.

១៧៣. ‘‘ឯវំ សព្ពង្គសម្បន្នេ, បុប្ផិតេ ផលិតេ វនេ;

សុកតេ អស្សមេ រម្មេ, វិហរាមិ អហំ តទា.

១៧៤. ‘‘សីលវា វតសម្បន្នោ [វត្តសម្បន្នោ (ស្យា.)], ឈាយី ឈានរតោ សទា;

បញ្ចាភិញ្ញាពលប្បត្តោ, សុរុចិ នាម តាបសោ.

១៧៥. ‘‘ចតុវីសសហស្សានិ, សិស្សា មយ្ហំ ឧបដ្ឋហុ;

សព្ពេវ ព្រាហ្មណា ឯតេ, ជាតិមន្តោ យសស្សិនោ.

១៧៦. ‘‘លក្ខណេ ឥតិហាសេ ច, សនិឃណ្ដុសកេដុភេ;

បទកា វេយ្យាករណា, សធម្មេ បារមិំ គតា.

១៧៧. ‘‘ឧប្បាតេសុ និមិត្តេសុ, លក្ខណេសុ ច កោវិទា;

បថព្យា ភូមន្តលិក្ខេ, មម សិស្សា សុសិក្ខិតា.

១៧៨. ‘‘អប្បិច្ឆា និបកា ឯតេ, អប្បាហារា អលោលុបា;

លាភាលាភេន សន្តុដ្ឋា, បរិវារេន្តិ មំ សទា.

១៧៩. ‘‘ឈាយី ឈានរតា ធីរា, សន្តចិត្តា សមាហិតា;

អាកិញ្ចញ្ញំ បត្ថយន្តា, បរិវារេន្តិ មំ សទា.

១៨០. ‘‘អភិញ្ញាបារមិប្បត្តា, បេត្តិកេ គោចរេ រតា;

អន្តលិក្ខចរា ធីរា, បរិវារេន្តិ មំ សទា.

១៨១. ‘‘សំវុតា ឆសុ ទ្វារេសុ, អនេជា រក្ខិតិន្ទ្រិយា;

អសំសដ្ឋា ច តេ ធីរា, មម សិស្សា ទុរាសទា.

១៨២. ‘‘បល្លង្កេន និសជ្ជាយ, ឋានចង្កមនេន ច;

វីតិនាមេន្តិ តេ រត្តិំ, មម សិស្សា ទុរាសទា.

១៨៣. ‘‘រជនីយេ ន រជ្ជន្តិ, ទុស្សនីយេ ន ទុស្សរេ;

មោហនីយេ ន មុយ្ហន្តិ, មម សិស្សា ទុរាសទា.

១៨៤. ‘‘ឥទ្ធិំ វីមំសមានា តេ, វត្តន្តិ និច្ចកាលិកំ;

បថវិំ [បឋវិំ (សី. ស្យា.)] តេ បកម្បេន្តិ, សារម្ភេន ទុរាសទា.

១៨៥. ‘‘កីឡមានា ច តេ សិស្សា, កីឡន្តិ ឈានកីឡិតំ;

ជម្ពុតោ ផលមានេន្តិ, មម សិស្សា ទុរាសទា.

១៨៦. ‘‘អញ្ញេ គច្ឆន្តិ គោយានំ, អញ្ញេ បុព្ពវិទេហកំ [បុព្ពវិទេហនំ (ស្យា. ក.)];

អញ្ញេ ច ឧត្តរកុរុំ, ឯសនាយ ទុរាសទា.

១៨៧. ‘‘បុរតោ បេសេន្តិ ខារិំ, បច្ឆតោ ច វជន្តិ តេ;

ចតុវីសសហស្សេហិ, ឆាទិតំ ហោតិ អម្ពរំ.

១៨៨. ‘‘អគ្គិបាកី អនគ្គី ច, ទន្តោទុក្ខលិកាបិ ច;

អស្មេន កោដ្ដិតា កេចិ, បវត្តផលភោជនា.

១៨៩. ‘‘ឧទកោរោហណា កេចិ, សាយំ បាតោ សុចីរតា;

តោយាភិសេចនករា, មម សិស្សា ទុរាសទា.

១៩០. ‘‘បរូឡ្ហកច្ឆនខលោមា, បង្កទន្តា រជស្សិរា;

គន្ធិតា សីលគន្ធេន, មម សិស្សា ទុរាសទា.

១៩១. ‘‘បាតោវ សន្និបតិត្វា, ជដិលា ឧគ្គតាបនា;

លាភាលាភំ បកិត្តេត្វា, គច្ឆន្តិ អម្ពរេ តទា.

១៩២. ‘‘ឯតេសំ បក្កមន្តានំ, មហាសទ្ទោ បវត្តតិ;

អជិនចម្មសទ្ទេន, មុទិតា ហោន្តិ ទេវតា.

១៩៣. ‘‘ទិសោទិសំ បក្កមន្តិ, អន្តលិក្ខចរា ឥសី;

សកេ ពលេនុបត្ថទ្ធា, តេ គច្ឆន្តិ យទិច្ឆកំ.

១៩៤. ‘‘បថវីកម្បកា ឯតេ, សព្ពេវ នភចារិនោ;

ឧគ្គតេជា ទុប្បសហា, សាគរោវ អខោភិយា.

១៩៥. ‘‘ឋានចង្កមិនោ កេចិ, កេចិ នេសជ្ជិកា ឥសី;

បវត្តភោជនា កេចិ, មម សិស្សា ទុរាសទា.

១៩៦. ‘‘មេត្តាវិហារិនោ ឯតេ, ហិតេសី សព្ពបាណិនំ;

អនត្តុក្កំសកា សព្ពេ, ន តេ វម្ភេន្តិ កស្សចិ.

១៩៧. ‘‘សីហរាជាវសម្ភីតា, គជរាជាវ ថាមវា;

ទុរាសទា ព្យគ្ឃារិវ, អាគច្ឆន្តិ មមន្តិកេ.

១៩៨. ‘‘វិជ្ជាធរា ទេវតា ច, នាគគន្ធព្ពរក្ខសា;

កុម្ភណ្ឌា ទានវា គរុឡា, ឧបជីវន្តិ តំ សរំ.

១៩៩. ‘‘តេ ជដាខារិភរិតា, អជិនុត្តរវាសនា;

អន្តលិក្ខចរា សព្ពេ, ឧបជីវន្តិ តំ សរំ.

២០០. ‘‘សទានុច្ឆវិកា [តទានុច្ឆវិកា (ស្យា. ក.)] ឯតេ, អញ្ញមញ្ញំ សគារវា;

ចតុព្ពីសសហស្សានំ, ខិបិតសទ្ទោ ន វិជ្ជតិ.

២០១. ‘‘បាទេ បាទំ និក្ខិបន្តា, អប្បសទ្ទា សុសំវុតា;

ឧបសង្កម្ម សព្ពេវ [សព្ពេ តេ (ស្យា.)], សិរសា វន្ទរេ មមំ.

២០២. ‘‘តេហិ សិស្សេហិ បរិវុតោ, សន្តេហិ ច តបស្សិភិ;

វសាមិ អស្សមេ តត្ថ, ឈាយី ឈានរតោ អហំ.

២០៣. ‘‘ឥសីនំ សីលគន្ធេន, បុប្ផគន្ធេន ចូភយំ;

ផលីនំ ផលគន្ធេន, គន្ធិតោ ហោតិ អស្សមោ.

២០៤. ‘‘រត្តិន្ទិវំ ន ជានាមិ, អរតិ មេ ន វិជ្ជតិ;

សកេ សិស្សេ ឱវទន្តោ, ភិយ្យោ ហាសំ លភាមហំ.

២០៥. ‘‘បុប្ផានំ បុប្ផមានានំ, ផលានញ្ច វិបច្ចតំ;

ទិព្ពគន្ធា បវាយន្តិ, សោភយន្តា មមស្សមំ.

២០៦. ‘‘សមាធិម្ហា វុដ្ឋហិត្វា, អាតាបី និបកោ អហំ;

ខារិភារំ គហេត្វាន, វនំ អជ្ឈោគហិំ អហំ.

២០៧. ‘‘ឧប្បាតេ សុបិនេ ចាបិ, លក្ខណេសុ សុសិក្ខិតោ;

បវត្តមានំ [វត្តមានំ (ក.)] មន្តបទំ, ធារយាមិ អហំ តទា.

២០៨. ‘‘អនោមទស្សី ភគវា, លោកជេដ្ឋោ នរាសភោ;

វិវេកកាមោ សម្ពុទ្ធោ, ហិមវន្តមុបាគមិ.

២០៩. ‘‘អជ្ឈោគាហេត្វា ហិមវន្តំ, អគ្គោ ការុណិកោ មុនិ;

បល្លង្កំ អាភុជិត្វាន, និសីទិ បុរិសុត្តមោ.

២១០. ‘‘តមទ្ទសាហំ សម្ពុទ្ធំ, សប្បភាសំ មនោរមំ;

ឥន្ទីវរំវ ជលិតំ, អាទិត្តំវ ហុតាសនំ.

២១១. ‘‘ជលន្តំ ទីបរុក្ខំវ, វិជ្ជុតំ គគណេ យថា;

សុផុល្លំ សាលរាជំវ, អទ្ទសំ លោកនាយកំ.

២១២. ‘‘អយំ នាគោ មហាវីរោ, ទុក្ខស្សន្តករោ មុនិ;

ឥមំ ទស្សនមាគម្ម, សព្ពទុក្ខា បមុច្ចរេ.

២១៣. ‘‘ទិស្វានាហំ ទេវទេវំ, លក្ខណំ ឧបធារយិំ;

ពុទ្ធោ នុ ខោ ន វា ពុទ្ធោ, ហន្ទ បស្សាមិ ចក្ខុមំ.

២១៤. ‘‘សហស្សារានិ ចក្កានិ, ទិស្សន្តិ ចរណុត្តមេ;

លក្ខណានិស្ស ទិស្វាន, និដ្ឋំ គច្ឆិំ តថាគតេ.