សន្ថតចតុក្កភេទកថា

៦១-៦២. ឯវំ ភគវា បដិបន្នកស្ស ភិក្ខុនោ រក្ខណត្ថំ សត្តតិទ្វិសតចតុក្កានិ នីហរិត្វា ‘‘ឥទានិ យេ អនាគតេ បាបភិក្ខូ ‘សន្ថតំ ឥមំ ន កិញ្ចិ ឧបាទិន្នកំ ឧបាទិន្នកេន ផុសតិ, កោ ឯត្ថ ទោសោ’តិ សញ្ចិច្ច លេសំ ឱឌ្ឌេស្សន្តិ, តេសំ សាសនេ បតិដ្ឋា ឯវ ន ភវិស្សតី’’តិ ទិស្វា តេសុ សត្តតិទ្វិសតចតុក្កេសុ ឯកមេកំ ចតុក្កំ ចតូហិ សន្ថតាទិភេទេហិ ភិន្ទិត្វា ទស្សេន្តោ ភិក្ខុបច្ចត្ថិកា មនុស្សិត្ថិំ ភិក្ខុស្ស សន្តិកេ អានេត្វា វច្ចមគ្គេន បស្សាវមគ្គេន មុខេន អង្គជាតំ អភិនិសីទេន្តិ សន្ថតាយ អសន្ថតស្សាតិអាទិមាហ.

តត្ថ សន្ថតាយ អសន្ថតស្សាតិអាទីសុ សន្ថតាយ ឥត្ថិយា វច្ចមគ្គេន បស្សាវមគ្គេន មុខេន អសន្ថតស្ស ភិក្ខុស្ស អង្គជាតំ អភិនិសីទេន្តីតិ ឥមិនា នយេន យោជនា វេទិតព្ពា. តត្ថ សន្ថតា នាម យស្សា តីសុ មគ្គេសុ យោ កោចិ មគ្គោ បលិវេឋេត្វា វា អន្តោ វា បវេសេត្វា យេន កេនចិ វត្ថេន វា បណ្ណេន វា វាកបដ្ដេន វា ចម្មេន វា តិបុសីសាទីនំ បដ្ដេន វា បដិច្ឆន្នោ. សន្ថតោ នាម យស្ស អង្គជាតំ តេសំយេវ វត្ថាទីនំ យេន កេនចិ បដិច្ឆន្នំ. តត្ថ ឧបាទិន្នកេន វា អនុបាទិន្នកំ ឃដ្ដិយតុ, អនុបាទិន្នកេន វា ឧបាទិន្នកំ, អនុបាទិន្នកេន វា អនុបាទិន្នកំ, ឧបាទិន្នកេន វា ឧបាទិន្នកំ, សចេ យត្តកេ បវិដ្ឋេ បារាជិកំ ហោតីតិ វុត្តំ, តត្តកំ បវិសតិ, សព្ពត្ថ សាទិយន្តស្ស បារាជិកក្ខេត្តេ បារាជិកំ; ថុល្លច្ចយក្ខេត្តេ ថុល្លច្ចយំ, ទុក្កដក្ខេត្តេ ទុក្កដមេវ ហោតិ. សចេ ឥត្ថិនិមិត្តំ ខាណុំ កត្វា សន្ថតំ, ខាណុំ ឃដ្ដេន្តស្ស ទុក្កដំ. សចេ បុរិសនិមិត្តំ ខាណុំ កត្វា សន្ថតំ, ខាណុំ បវេសេន្តស្ស ទុក្កដំ. សចេ ឧភយំ ខាណុំ កត្វា សន្ថតំ, ខាណុនា ខាណុំ ឃដ្ដេន្តស្ស ទុក្កដំ. សចេ ឥត្ថិនិមិត្តេ វេឡុនឡបព្ពាទីនំ កិញ្ចិ បក្ខិត្តំ, តស្ស ហេដ្ឋាភាគំ ចេបិ ផុសន្តោ តិលផលមត្តំ បវេសេតិ, បារាជិកំ. ឧបរិភាគំ ចេបិ ឧភោសុ បស្សេសុ ឯកបស្សំ ចេបិ ផុសន្តោ បវេសេតិ, បារាជិកំ. ចត្តារិបិ បស្សានិ អផុសន្តោ បវេសេត្វា តស្ស តលំ ចេបិ ផុសតិ, បារាជិកំ. យទិ បន បស្សេសុ វា តលេ វា អផុសន្តោ អាកាសគតមេវ កត្វា បវេសេត្វា នីហរតិ, ទុក្កដំ. ពហិទ្ធា ខាណុកេ ផុសតិ ទុក្កដមេវ. យថា ច ឥត្ថិនិមិត្តេ វុត្តំ, ឯវំ សព្ពត្ថ លក្ខណំ វេទិតព្ពន្តិ.

សន្ថតចតុក្កភេទកថា និដ្ឋិតា.