៤. សក្កច្ចវគ្គវណ្ណនា

៦០៦. សក្កច្ចន្តិ ឯត្ថាបិ អសក្កច្ចំ បដិគ្គហណេយេវ អាបត្តិ, បដិគ្គហិតំ បន សុបដិគ្គហិតមេវ. សក្កច្ចន្តិ ច បត្តសញ្ញីតិ ចាតិ ឧភយំ វុត្តនយមេវ.

៦០៨. សបទានន្តិ តត្ថ តត្ថ ឱធិំ អកត្វា អនុបដិបាដិយា. សមសូបកេ វត្តព្ពំ វុត្តមេវ.

៦១០. ថូបកតោតិ មត្ថកតោ; វេមជ្ឈតោតិ អត្ថោ.

៦១១. បដិច្ឆាទេត្វា ទេន្តីតិ មាឃាតសមយាទីសុ បដិច្ឆន្នំ ព្យញ្ជនំ កត្វា ទេន្តិ. វិញ្ញត្តិយំ វត្តព្ពំ នត្ថិ.

៦១៤. ឧជ្ឈានសញ្ញីសិក្ខាបទេបិ គិលានោ ន មុច្ចតិ.

៦១៥. នាតិមហន្តោ កពឡោតិ មយូរណ្ឌំ អតិមហន្តំ, កុក្កុដណ្ឌំ អតិខុទ្ទកំ, តេសំ វេមជ្ឈប្បមាណោ. ខជ្ជកេតិ ឯត្ថ មូលខាទនីយាទិ សព្ពំ គហេតព្ពំ.

ចតុត្ថោ វគ្គោ.