៤. បវារណាក្ខន្ធកំ

អផាសុកវិហារកថា

២០៩. បវារណាក្ខន្ធកេ – នេវ អាលបេយ្យាម ន សល្លបេយ្យាមាតិ ឯត្ថ អាលាបោ នាម បឋមវចនំ; សល្លាបោ បច្ឆិមវចនំ. ហត្ថវិលង្ឃកេនាតិ ហត្ថុក្ខេបកេន. បសុសំវាសន្តិ បសូនំ វិយ សំវាសំ. បសវោបិ ហិ អត្តនោ ឧប្បន្នំ សុខទុក្ខំ អញ្ញមញ្ញស្ស ន អារោចេន្តិ, បដិសន្ថារំ ន ករោន្តិ, តថា ឯតេបិ ន អកំសុ; តស្មា នេសំ សំវាសោ ‘‘បសុសំវាសោ’’តិ វុច្ចតិ. ឯស នយោ សព្ពត្ថ. ន ភិក្ខវេ មូគព្ពតំ តិត្ថិយសមាទានន្តិ ‘‘ឥមំ តេមាសំ ន កថេតព្ព’’ន្តិ ឯវរូបំ វតសមាទានំ ន កាតព្ពំ; អធម្មកតិកា ហេសា. អញ្ញមញ្ញានុលោមតាតិ អញ្ញមញ្ញំ វត្តុំ អនុលោមភាវោ. ‘‘វទន្តុ មំ អាយស្មន្តោ’’តិ ហិ វទន្តំ សក្កា ហោតិ កិញ្ចិ វត្តុំ; ន ឥតរំ. អាបត្តិវុដ្ឋានតា វិនយបុរេក្ខារតាតិ អាបត្តីហិ វុដ្ឋានភាវោ វិនយំ បុរតោ កត្វា ចរណភាវោ. ‘‘វទន្តុ មំ អាយស្មន្តោ’’តិ ហិ ឯវំ វទន្តោ អាបត្តីហិ វុដ្ឋហិស្សតិ, វិនយញ្ច បុរក្ខត្វា វិហរិស្សតីតិ វុច្ចតិ.

២១០. សុណាតុ មេ ភន្តេ សង្ឃោ អជ្ជ បវារណា, យទិ សង្ឃស្ស បត្តកល្លំ, សង្ឃោ បវារេយ្យាតិ អយំ សព្ពសង្គាហិកា នាម ញត្តិ; ឯវញ្ហិ វុត្តេ តេវាចិកំ ទ្វេវាចិកំ ឯកវាចិកញ្ច បវារេតុំ វដ្ដតិ. សមានវស្សិកំ ន វដ្ដតិ. ‘‘តេវាចិកំ បវារេយ្យា’’តិ វុត្តេ បន តេវាចិកមេវ វដ្ដតិ, អញ្ញំ ន វដ្ដតិ. ‘‘ទ្វេវាចិកំ បវារេយ្យា’’តិ វុត្តេ ទ្វេវាចិកញ្ច តេវាចិកញ្ច វដ្ដតិ, ឯកវាចិកញ្ច សមានវស្សិកញ្ច ន វដ្ដតិ. ‘‘ឯកវាចិកំ បវារេយ្យា’’តិ វុត្តេ បន ឯកវាចិក-ទ្វេវាចិក-តេវាចិកានិ វដ្ដន្តិ, សមានវស្សិកមេវ ន វដ្ដតិ. ‘‘សមានវស្សិក’’ន្តិ វុត្តេ សព្ពំ វដ្ដតិ.

២១១. អច្ឆន្តីតិ និសិន្នាវ ហោន្តិ, ន ឧដ្ឋហន្តិ. តទមន្តរាតិ តទន្តរា; តាវតកំ កាលន្តិ អត្ថោ.

បវារណាភេទកថា

២១២. ចាតុទ្ទសិកា ច បន្នរសិកា ចាតិ ឯត្ថ ចាតុទ្ទសិកាយ ‘‘អជ្ជ បវារណា ចាតុទ្ទសី’’តិ ឯវំ បុព្ពកិច្ចំ កាតព្ពំ, បន្នរសិកាយ ‘‘អជ្ជ បវារណា បន្នរសី’’តិ.

បវារណកម្មេសុ សចេ ឯកស្មិំ វិហារេ បញ្ចសុ ភិក្ខូសុ វសន្តេសុ ឯកស្ស បវារណំ អាហរិត្វា ចត្តារោ គណញត្តិំ ឋបេត្វា បវារេន្តិ, ចតូសុ តីសុ វា វសន្តេសុ ឯកស្ស បវារណំ អាហរិត្វា តយោ វា ទ្វេ វា សង្ឃញត្តិំ ឋបេត្វា បវារេន្តិ, សព្ពមេតំ អធម្មេនវគ្គំ បវារណកម្មំ.

សចេ បន សព្ពេបិ បញ្ច ជនា ឯកតោ សន្និបតិត្វា គណញត្តិំ ឋបេត្វា បវារេន្តិ, ចត្តារោ តយោ វា ទ្វេ វា វសន្តា ឯកតោ សន្និបតិត្វា សង្ឃញត្តិំ ឋបេត្វា បវារេន្តិ, សព្ពមេតំ អធម្មេនសមគ្គំ បវារណកម្មំ.

សចេ បញ្ចសុ ជនេសុ ឯកស្ស បវារណំ អាហរិត្វា ចត្តារោ សង្ឃញត្តិំ ឋបេត្វា បវារេន្តិ, ចតូសុ តីសុ វា ឯកស្ស បវារណំ អាហរិត្វា តយោ វា ទ្វេ វា គណញត្តិំ ឋបេត្វា បវារេន្តិ, សព្ពមេតំ ធម្មេនវគ្គំ បវារណកម្មំ.

សចេ បន សព្ពេបិ បញ្ច ជនា ឯកតោ សន្និបតិត្វា សង្ឃញត្តិំ ឋបេត្វា បវារេន្តិ, ចត្តារោ វា តយោ វា ឯកតោ សន្និបតិត្វា គណញត្តិំ ឋបេត្វា បវារេន្តិ, ទ្វេ អញ្ញមញ្ញំ បវារេន្តិ, ឯកកោ វសន្តោ អធិដ្ឋានបវារណំ ករោតិ, សព្ពមេតំ ធម្មេនសមគ្គំ នាម បវារណកម្មន្តិ.

បវារណាទានានុជាននកថា

២១៣. ទិន្នា ហោតិ បវារណាតិ ឯត្ថ ឯវំ ទិន្នាយ បវារណាយ បវារណាហារកេន សង្ឃំ ឧបសង្កមិត្វា ឯវំ បវារេតព្ពំ – ‘‘តិស្សោ ភន្តេ ភិក្ខុ សង្ឃំ បវារេតិ ទិដ្ឋេន វា សុតេន វា បរិសង្កាយ វា, វទតុ តំ ភន្តេ សង្ឃោ អនុកម្បំ ឧបាទាយ, បស្សន្តោ បដិករិស្សតិ. ទុតិយម្បិ…បេ… តតិយម្បិ ភន្តេ តិស្សោ ភិក្ខុ សង្ឃំ បវារេតិ…បេ… បដិករិស្សតី’’តិ. សចេ បន វុឌ្ឍតរោ ហោតិ, ‘‘អាយស្មា ភន្តេ តិស្សោ’’តិ វត្តព្ពំ; ឯវញ្ហិ តេន តស្សត្ថាយ បវារិតំ ហោតីតិ.

បវារណំ ទេន្តេន ឆន្ទម្បិ ទាតុន្តិ ឯត្ថ ឆន្ទទានំ ឧបោសថក្ខន្ធកេ វុត្តនយេនេវ វេទិតព្ពំ. ឥធាបិ ច ឆន្ទទានំ អវសេសកម្មត្ថាយ. តស្មា សចេ បវារណំ ទេន្តោ ឆន្ទំ ទេតិ, វុត្តនយេន អាហដាយ បវារណាយ តេន ច ភិក្ខុនា សង្ឃេន ច បវារិតមេវ ហោតិ. អថ បវារណមេវ ទេតិ, ន ឆន្ទំ, តស្ស ច បវារណាយ អារោចិតាយ សង្ឃេន ច បវារិតេ សព្ពេសំ សុប្បវារិតំ ហោតិ, អញ្ញំ បន កម្មំ កុប្បតិ. សចេ ឆន្ទមេវ ទេតិ ន បវារណំ, សង្ឃស្ស បវារណា ច សេសកម្មានិ ច ន កុប្បន្តិ, តេន បន ភិក្ខុនា អប្បវារិតំ ហោតិ. បវារណទិវសេ បន ពហិសីមាយំ បវារណំ អធិដ្ឋហិត្វា អាគតេនបិ ឆន្ទោ ទាតព្ពោ, តេន សង្ឃស្ស បវារណកម្មំ ន កុប្បតិ.

២១៨. អជ្ជ មេ បវារណាតិ ឯត្ថ សចេ ចាតុទ្ទសិកា ហោតិ, ‘‘អជ្ជ មេ បវារណា ចាតុទ្ទសី’’តិ សចេ បន្នរសិកា ‘‘អជ្ជ មេ បវារណា បន្នរសី’’តិ ឯវំ អធិដ្ឋាតព្ពំ.

២១៩. តទហុបវារណាយ អាបត្តិន្តិអាទិ វុត្តនយមេវ.

អនាបត្តិបន្នរសកាទិកថា

២២២. បុន បវារេតព្ពន្តិ បុន បុព្ពកិច្ចំ កត្វា ញត្តិំ ឋបេត្វា សង្ឃត្ថេរតោ បដ្ឋាយ បវារេតព្ពំ. សេសំ ឧបោសថក្ខន្ធកវណ្ណនាយំ វុត្តនយេនេវ វេទិតព្ពំ.

២២៨. អាគន្តុកេហិ អាវាសិកានំ អនុវត្តិតព្ពន្តិ ‘‘អជ្ជ បវារណា ចាតុទ្ទសី’’តិ ឯតទេវ បុព្ពកិច្ចំ កាតព្ពំ. បន្នរសិកវារេបិ ឯសេវ នយោ. អាវាសិកេហិ និស្សីមំ គន្ត្វា បវារេតព្ពន្តិ អស្សាវសានេ អយំ បាឡិមុត្តកវិនិច្ឆយោ – សចេ បុរិមិកាយ បញ្ច ភិក្ខូ វស្សំ ឧបគតា, បច្ឆិមិកាយបិ បញ្ច, បុរិមេហិ ញត្តិំ ឋបេត្វា បវារិតេ បច្ឆិមេហិ តេសំ សន្តិកេ បារិសុទ្ធិឧបោសថោ កាតព្ពោ, ន ឯកស្មិំ ឧបោសថគ្គេ ទ្វេ ញត្តិយោ ឋបេតព្ពា. សចេបិ បច្ឆិមិកាយ ឧបគតា ចត្តារោ តយោ ទ្វេ ឯកោ វា ហោតិ, ឯសេវ នយោ. អថ បុរិមិកាយ ចត្តារោ បច្ឆិមិកាយបិ ចត្តារោ តយោ ទ្វេ ឯកោ វា ឯសេវ នយោ. អថាបិ បុរិមិកាយ តយោ, បច្ឆិមិកាយបិ តយោ ទ្វេ វា, ឯសេវ នយោ. ឥទញ្ហេត្ថ លក្ខណំ – សចេ បុរិមិកាយ ឧបគតេហិ បច្ឆិមិកាយ ឧបគតា ថោកតរា ចេវ ហោន្តិ សមសមា ច, សង្ឃបវារណាយ គណំ បូរេន្តិ, សង្ឃបវារណាវសេន ញត្តិ ឋបេតព្ពាតិ.

សចេ បន បុរិមិកាយ តយោ, បច្ឆិមិកាយ ឯកោ ហោតិ, តេន សទ្ធិំ តេ ចត្តារោ ហោន្តិ, ចតុន្នំ សង្ឃញត្តិំ ឋបេត្វា បវារេតុំ ន វដ្ដតិ. គណញត្តិយា បន សោ គណបូរកោ ហោតិ, តស្មា គណវសេន ញត្តិំ ឋបេត្វា បុរិមេហិ បវារេតព្ពំ. ឥតរេន តេសំ សន្តិកេ បារិសុទ្ធិឧបោសថោ កាតព្ពោ. សចេ បុរិមិកាយ ទ្វេ បច្ឆិមិកាយ ទ្វេ វា ឯកោ វា ហោតិ, ឯសេវ នយោ. សចេ បុរិមិកាយ ឯកោ, បច្ឆិមិកាយបិ ឯកោ ហោតិ, ឯកេន ឯកស្ស សន្តិកេ បវារេតព្ពំ, ឯកេន បារិសុទ្ធិឧបោសថោ កាតព្ពោ. សចេ បន បុរិមវស្សូបគតេហិ បច្ឆិមវស្សូបគតា ឯកេនបិ អធិកតរា ហោន្តិ, បឋមំ បាតិមោក្ខំ ឧទ្ទិសិត្វា បច្ឆា ថោកតរេហិ តេសំ សន្តិកេ បវារេតព្ពំ.

កត្តិកចាតុមាសិនិយា បវារណាយ បន សចេ បឋមំ វស្សូបគតេហិ មហាបវារណាយ បវារិតេហិ បច្ឆា ឧបគតា អធិកតរា វា សមសមា វា ហោន្តិ, បវារណាញត្តិំ ឋបេត្វា បវារេតព្ពំ. តេហិ បវារិតេ បច្ឆា ឥតរេហិ បារិសុទ្ធិឧបោសថោ កាតព្ពោ. អថ មហាបវារណាយ បវារិតា ពហូ ភិក្ខូ ហោន្តិ, បច្ឆិមវស្សូបគតា ថោកតរា វា ឯកោ វា, បាតិមោក្ខេ ឧទ្ទិដ្ឋេ បច្ឆា តេសំ សន្តិកេ តេន បវារេតព្ពំ.

២៣៣. ន ច ភិក្ខវេ អប្បវារណាយ បវារេតព្ពំ, អញ្ញត្រ សង្ឃសាមគ្គិយាតិ ឯត្ថ កោសម្ពកសាមគ្គីសទិសាវ សាមគ្គី វេទិតព្ពា. ‘‘អជ្ជ បវារណា សាមគ្គី’’តិ ឯវញ្ចេត្ថ បុព្ពកិច្ចំ កាតព្ពំ. យេ បន កិស្មិញ្ចិទេវ អប្បមត្តកេ បវារណំ ឋបេត្វា សមគ្គា ហោន្តិ, តេហិ បវារណាយមេវ បវារណា កាតព្ពា. សាមគ្គីបវារណំ ករោន្តេហិ ច បឋមបវារណំ ឋបេត្វា បាដិបទតោ បដ្ឋាយ យាវ កត្តិកចាតុមាសិនី បុណ្ណមា, ឯត្ថន្តរេ កាតព្ពា, តតោ បច្ឆា វា បុរេ វា ន វដ្ដតិ.

ទ្វេវាចិកាទិបវារណាកថា

២៣៤. ទ្វេវាចិកំ បវារេតុន្តិ ឯត្ថ ញត្តិំ ឋបេន្តេនាបិ ‘‘យទិ សង្ឃស្ស បត្តកល្លំ សង្ឃោ ទ្វេវាចិកំ បវារេយ្យា’’តិ វត្តព្ពំ, ឯកវាចិកេ ‘‘ឯកវាចិកំ បវារេយ្យា’’តិ, សមានវស្សិកេបិ ‘‘សមានវស្សិកំ បវារេយ្យា’’តិ វត្តព្ពំ, ឯត្ថ ច ពហូបិ សមានវស្សា ឯកតោ បវារេតុំ លភន្តិ.

បវារណាឋបនកថា

២៣៦. ភាសិតាយ លបិតាយ អបរិយោសិតាយាតិ ឯត្ថ សព្ពសង្គាហិកញ្ច បុគ្គលិកញ្ចាតិ ទុវិធំ បវារណាឋបនំ. តត្ថ សព្ពសង្គាហិកេ ‘‘សុណាតុ មេ ភន្តេ សង្ឃោ…បេ… សង្ឃោ តេវាចិកំ បវារេ’’ ឥតិ សុការតោ យាវ រេការោ, តាវ ភាសិតា លបិតា អបរិយោសិតាវ ហោតិ បវារណា. ឯត្ថន្តរេ ឯកបទេបិ ឋបេន្តេន ឋបិតា ហោតិ បវារណា. ‘យ្យ’ការេ បន បត្តេ បរិយោសិតា ហោតិ, តស្មា តតោ បដ្ឋាយ ឋបេន្តេន ឋបិតាបិ អដ្ឋបិតា ហោតិ. បុគ្គលិកឋបនេ បន – ‘‘សង្ឃំ ភន្តេ បវារេមិ…បេ… តតិយម្បិ ភន្តេ សង្ឃំ បវារេមិ ទិដ្ឋេន វា…បេ… បស្សន្តោ បដី’’តិ សង្ការតោ យាវ អយំ សព្ពបច្ឆិមោ ‘ដិ’ការោ តាវ ភាសិតា លបិតា អបរិយោសិតាវ ហោតិ បវារណា, ឯត្ថន្តរេ ឯកបទេបិ ឋបេន្តេន ឋបិតា ហោតិ បវារណា, ‘‘ករិស្សាមី’’តិ វុត្តេ បន បរិយោសិតា ហោតិ, តស្មា ‘‘ករិស្សាមី’’តិ ឯតស្មិំ បទេ បត្តេ ឋបិតាបិ អដ្ឋបិតា ហោតិ. ឯស នយោ ទ្វេវាចិកឯកវាចិកសមានវស្សិកាសុបិ. ឯតាសុបិ ហិ ដិការាវសានំយេវ ឋបនខេត្តន្តិ.

២៣៧. អនុយុញ្ជិយមានោតិ ‘‘កិម្ហិ នំ ឋបេសី’’តិ បរតោ វុត្តនយេន បុច្ឆិយមានោ. ឱមទ្ទិត្វាតិ ឯតានិ ‘‘អលំ ភិក្ខុ មា ភណ្ឌន’’ន្តិអាទីនិ វចនានិ វត្វា, វចនោមទ្ទនា ហិ ឥធ ឱមទ្ទនាតិ អធិប្បេតា. អនុទ្ធំសិតំ បដិជានាតីតិ ‘‘អមូលកេន បារាជិកេន អនុទ្ធំសិតោ អយំ មយា’’តិ ឯវំ បដិជានាតិ. យថាធម្មន្តិ សង្ឃាទិសេសេន អនុទ្ធំសនេ បាចិត្តិយំ; ឥតរេហិ ទុក្កដំ. នាសេត្វាតិ លិង្គនាសនាយ នាសេត្វា.

២៣៨. សាស្ស យថាធម្មំ បដិកតាតិ ឯត្តកមេវ វត្វា បវារេថាតិ វត្តព្ពា, អសុកា នាម អាបត្តីតិ ឥទំ បន ន វត្តព្ពំ, ឯតញ្ហិ កលហស្ស មុខំ ហោតិ.

វត្ថុឋបនាទិកថា

២៣៩. ឥទំ វត្ថុ បញ្ញាយតិ ន បុគ្គលោតិ ឯត្ថ ចោរា កិរ អរញ្ញវិហារេ បោក្ខរណិតោ មច្ឆេ គហេត្វា បចិត្វា ខាទិត្វា អគមំសុ. សោ តំ វិប្បការំ ទិស្វា អារាមេ វា កិញ្ចិ ធុត្តេន កតំ វិប្បការំ ទិស្វា ‘‘ភិក្ខុស្ស ឥមិនា កម្មេន ភវិតព្ព’’ន្តិ សល្លក្ខេត្វា ឯវមាហ. វត្ថុំ ឋបេត្វា សង្ឃោ បវារេយ្យាតិ ‘‘យទា តំ បុគ្គលំ ជានិស្សាម, តទា នំ ចោទេស្សាម. ឥទានិ បន សង្ឃោ បវារេតូ’’តិ អយមេត្ថ អត្ថោ. ឥទានេវ នំ វទេហីតិ សចេ ឥមិនា វត្ថុនា កញ្ចិ បុគ្គលំ បរិសង្កសិ, ឥទានេវ នំ អបទិសាហីតិ អត្ថោ. សចេ អបទិសតិ, តំ បុគ្គលំ អនុវិជ្ជិត្វា បវារេតព្ពំ; នោ ចេ អបទិសតិ, ឧបបរិក្ខិត្វា ជានិស្សាមាតិ បវារេតព្ពំ.

អយំ បុគ្គលោ បញ្ញាយតិ ន វត្ថូតិ ឯត្ថ ឯកោ ភិក្ខុ មាលាគន្ធវិលេបនេហិ ចេតិយំ វា បូជេសិ, អរិដ្ឋំ វា បិវិ, តស្ស តទនុរូបោ សរីរគន្ធោ អហោសិ; សោ តំ គន្ធំ សន្ធាយ ‘‘ឥមស្ស ភិក្ខុនោ ឯវរូបោ សរីរគន្ធោ’’តិ វត្ថុំ បកាសេន្តោ ឯវមាហ. បុគ្គលំ ឋបេត្វា សង្ឃោ បវារេយ្យាតិ ឯតំ បុគ្គលំ ឋបេត្វា សង្ឃោ បវារេតុ. ឥទានេវ នំ វទេហីតិ យំ ត្វំ បុគ្គលំ ឋបេសិ, តស្ស បុគ្គលស្ស ឥទានេវ ទោសំ វទ. សចេ អយមស្ស ទោសោតិ វទតិ, តំ បុគ្គលំ សោធេត្វា បវារេតព្ពំ. អថ នាហំ ជានាមីតិ វទតិ, ឧបបរិក្ខិត្វា ជានិស្សាមាតិ បវារេតព្ពំ.

ឥទំ វត្ថុ ច បុគ្គលោ ច បញ្ញាយតីតិ បុរិមនយេនេវ ចោរេហិ មច្ឆេ គហេត្វា បចិត្វា បរិភុត្តដ្ឋានញ្ច គន្ធាទីហិ នហានដ្ឋានញ្ច ទិស្វា ‘‘បព្ពជិតស្ស កម្ម’’ន្តិ មញ្ញមានោ សោ ឯវមាហ. ឥទានេវ នំ វទេហីតិ ឥទានេវ តេន វត្ថុនា បរិសង្កិតំ បុគ្គលំ វទេហិ; ឥទំ បន ឧភយម្បិ ទិស្វា ទិដ្ឋកាលតោ បដ្ឋាយ វិនិច្ឆិនិត្វាវ បវារេតព្ពំ. កល្លំ វចនាយាតិ កល្លំ ចោទនាយ; ចោទេតុំ វដ្ដតីតិ អត្ថោ. កស្មា? បវារណតោ បុព្ពេ អវិនិច្ឆិតត្តា បច្ឆា ច ទិស្វា ចោទិតត្តាតិ. ឧក្កោដនកំ បាចិត្តិយន្តិ ឥទញ្ហិ ឧភយំ បុព្ពេ បវារណាយ ទិស្វា វិនិច្ឆិនិត្វាវ ភិក្ខូ បវារេន្តិ, តស្មា បុន តំ ឧក្កោដេន្តស្ស អាបត្តិ.

ភណ្ឌនការកវត្ថុកថា

២៤០. ទ្វេ តយោ ឧបោសថេ ចាតុទ្ទសិកេ កាតុន្តិ ឯត្ថ ចតុត្ថបញ្ចមា ទ្វេ, តតិយោ បន បកតិយាបិ ចតុទ្ទសិកោយេវាតិ. តស្មា តតិយចតុត្ថា វា តតិយចតុត្ថបញ្ចមា វា ទ្វេ តយោ ចាតុទ្ទសិកា កាតព្ពា. អថ ចតុត្ថេ កតេ សុណន្តិ, បញ្ចមោ ចាតុទ្ទសិកោ កាតព្ពោ. ឯវម្បិ ទ្វេ ចាតុទ្ទសិកា ហោន្តិ. ឯវំ ករោន្តា ភណ្ឌនការកានំ តេរសេ វា ចាតុទ្ទសេ វា ឥមេ បន្នរសីបវារណំ បវារេស្សន្តិ. ឯវំ បវារេន្តេហិ ច ពហិសីមាយ សាមណេរេ ឋបេត្វា ‘‘តេ អាគច្ឆន្តី’’តិ សុត្វា លហុំ លហុំ សន្និបតិត្វា បវារេតព្ពំ. ឯតមត្ថំ ទស្សេតុំ ‘‘តេ ចេ ភិក្ខវេ…បេ… តថា ករោន្តូ’’តិ វុត្តំ.

អសំវិហិតាតិ សំវិទហនរហិតា អាគមនជាននត្ថាយ អកតសំវិទហិតា; អវិញ្ញាតាវ ហុត្វាតិ អត្ថោ. តេសំ វិក្ខិត្វាតិ ‘‘កិលន្តត្ថ មុហុត្តំ វិស្សមថា’’តិអាទិនា នយេន សម្មោហំ កត្វាតិ អត្ថោ. នោ ចេ លភេថាតិ នោ ចេ ពហិសីមំ គន្តុំ លភេយ្យុំ; ភណ្ឌនការកានំ សាមណេរេហិ ច ទហរភិក្ខូហិ ច និរន្តរំ អនុពទ្ធាវ ហោន្តិ. អាគមេ ជុណ្ហេតិ យំ សន្ធាយ អាគមេ ជុណ្ហេ បវារេយ្យាមាតិ ញត្តិំ ឋបេសុំ, តស្មិំ អាគមេ ជុណ្ហេ កោមុទិយា ចាតុមាសិនិយា អកាមា បវារេតព្ពំ, អវស្សំ បវារេតព្ពំ, ន ហិ តំ អតិក្កមិត្វា បវារេតុំ លព្ភតិ. តេហិ ចេ ភិក្ខវេ ភិក្ខូហិ បវារិយមានេតិ ឯវំ ចាតុមាសិនិយា បវារិយមានេ.

បវារណាសង្គហកថា

២៤១. អញ្ញតរោ ផាសុវិហារោតិ តរុណសមថោ វា តរុណវិបស្សនា វា. បរិពាហិរា ភវិស្សាមាតិ អនិពទ្ធរត្តិដ្ឋានទិវាដ្ឋានាទិភាវេន ភាវនានុយោគំ សម្បាទេតុំ អសក្កោន្តា ពាហិរា ភវិស្សាម. សព្ពេហេវ ឯកជ្ឈំ សន្និបតិតព្ពន្តិ ឥមិនា ឆន្ទទានំ បដិក្ខិបតិ. ភិន្នស្ស ហិ សង្ឃស្ស សមគ្គករណកាលេ តិណវត្ថារកសមថេ ឥមស្មិញ្ច បវារណាសង្គហេតិ ឥមេសុ តីសុ ឋានេសុ ឆន្ទំ ទាតុំ ន វដ្ដតិ. បវារណាសង្គហោ នាមាយំ វិស្សដ្ឋកម្មដ្ឋានានំ ថាមគតសមថវិបស្សនានំ សោតាបន្នាទីនញ្ច ន ទាតព្ពោ. តរុណសមថវិបស្សនាលាភិនោ បន សព្ពេ វា ហោន្តុ, ឧបឌ្ឍា វា, ឯកបុគ្គលោ វា ឯកស្សបិ វសេន ទាតព្ពោយេវ. ទិន្នេ បវារណាសង្គហេ អន្តោវស្សេ បរិហារោវ ហោតិ, អាគន្តុកា តេសំ សេនាសនំ គហេតុំ ន លភន្តិ. តេហិបិ ឆិន្នវស្សេហិ ន ភវិតព្ពំ, បវារេត្វា បន អន្តរាបិ ចារិកំ បក្កមិតុំ លភន្តីតិ ទស្សនត្ថំ ‘‘តេហិ ចេ ភិក្ខវេ’’តិអាទិមាហ. សេសំ សព្ពត្ថ ឧត្តានមេវាតិ.

បវារណាក្ខន្ធកវណ្ណនា និដ្ឋិតា.