១០. កោសម្ពកក្ខន្ធកំ

កោសម្ពកវិវាទកថា

៤៥១. កោសម្ពកក្ខន្ធកេ – តំ ភិក្ខុំ អាបត្តិយា អទស្សនេ ឧក្ខិបិំសូតិ ឯត្ថ អយមនុបុព្ពិកថា – ទ្វេ កិរ ភិក្ខូ ឯកស្មិំ អាវាសេ វសន្តិ វិនយធរោ ច សុត្តន្តិកោ ច. តេសុ សុត្តន្តិកោ ភិក្ខុ ឯកទិវសំ វច្ចកុដិំ បវិដ្ឋោ អាចមនឧទកាវសេសំ ភាជនេ ឋបេត្វាវ និក្ខមិ. វិនយធរោ បច្ឆា បវិដ្ឋោ តំ ឧទកំ ទិស្វា និក្ខមិត្វា តំ ភិក្ខុំ បុច្ឆិ – ‘‘អាវុសោ, តយា ឥទំ ឧទកំ ឋបិត’’ន្តិ? ‘‘អាមាវុសោ’’តិ. ‘‘កិំ ត្វំ ឯត្ថ អាបត្តិភាវំ ន ជានាសី’’តិ? ‘‘អាម, ន ជានាមី’’តិ. ‘‘ហោតិ, អាវុសោ ឯត្ថ អាបត្តី’’តិ? ‘‘សចេ ហោតិ, ទេសិស្សាមី’’តិ. ‘‘សចេ បន តេ, អាវុសោ, អសញ្ចិច្ច អសតិយា កតំ, នត្ថិ អាបត្តី’’តិ. សោ តស្សា អាបត្តិយា អនាបត្តិទិដ្ឋិ អហោសិ.

វិនយធរោបិ អត្តនោ និស្សិតកានំ ‘‘អយំ សុត្តន្តិកោ អាបត្តិំ អាបជ្ជមានោបិ ន ជានាតី’’តិ អារោចេសិ. តេ តស្ស និស្សិតកេ ទិស្វា ‘‘តុម្ហាកំ ឧបជ្ឈាយោ អាបត្តិំ អាបជ្ជិត្វាបិ អាបត្តិភាវំ ន ជានាតី’’តិ អាហំសុ. តេ គន្ត្វា អត្តនោ ឧបជ្ឈាយស្ស អារោចេសុំ. សោ ឯវមាហ – ‘‘អយំ វិនយធរោ បុព្ពេ អនាបត្តី’’តិ វត្វា ‘‘ឥទានិ អាបត្តី’’តិ វទតិ. មុសាវាទី ឯសោតិ. តេ គន្ត្វា ‘‘តុម្ហាកំ ឧបជ្ឈាយោ មុសាវាទី’’តិ ឯវំ អញ្ញមញ្ញំ កលហំ វឌ្ឍយិំសុ. តតោ វិនយធរោ ឱកាសំ លភិត្វា តស្ស អាបត្តិយា អទស្សនេ ឧក្ខេបនីយកម្មំ អកាសិ. តេន វុត្តំ – ‘‘តំ ភិក្ខុំ អាបត្តិយា អទស្សនេ ឧក្ខិបិំសូ’’តិ.

៤៥៣. ភិន្នោ ភិក្ខុសង្ឃោ ភិន្នោ ភិក្ខុសង្ឃោតិ ឯត្ថ ន តាវ ភិន្នោ; អបិច ខោ យថា ទេវេ វុដ្ឋេ ‘‘ឥទានិ សស្សំ និប្ផន្ន’’ន្តិ វុច្ចតិ, អវស្សញ្ហិ តំ និប្ផជ្ជិស្សតិ, ឯវមេវ ឥមិនា ការណេន អាយតិំ អវស្សំ ភិជ្ជិស្សតិ, សោ ច ខោ កលហវសេន ន សង្ឃភេទវសេន, តស្មា ‘‘ភិន្នោ’’តិ វុត្តំ. សម្ភមអត្ថវសេន ចេត្ថ អាមេឌិតំ វេទិតព្ពំ.

៤៥៤. ឯតមត្ថំ ភាសិត្វា ឧដ្ឋាយាសនា បក្កាមីតិ កស្មា ឯវំ ភាសិត្វា បក្កាមិ? សចេ ហិ ភគវា ឧក្ខេបកេ វា ‘‘អការណេ តុម្ហេហិ សោ ភិក្ខុ ឧក្ខិត្តោ’’តិ វទេយ្យ, ឧក្ខិត្តានុវត្តកេ វា ‘‘តុម្ហេ អាបត្តិំ អាបន្នា’’តិ វទេយ្យ, ‘‘ឯតេសំ ភគវា បក្ខោ, ឯតេសំ ភគវា បក្ខោ’’តិ វត្វា អាឃាតំ ពន្ធេយ្យុំ, តស្មា តន្តិមេវ ឋបេត្វា ឯតមត្ថំ ភាសិត្វា ឧដ្ឋាយាសនា បក្កាមិ.

៤៥៥. អត្តនា វា អត្តានន្តិ ឯត្ថ យោ សង្ឃេន ឧក្ខេបនីយកតានំ អធម្មវាទីនំ បក្ខេ និសិន្នោ ‘‘តុម្ហេ កិំ ភណថា’’តិ តេសញ្ច ឥតរេសញ្ច លទ្ធិំ សុត្វា ‘‘ឥមេ អធម្មវាទិនោ, ឥតរេ ធម្មវាទិនោ’’តិ ចិត្តំ ឧប្បាទេតិ, អយំ តេសំ មជ្ឈេ និសិន្នោវ តេសំ នានាសំវាសកោ ហោតិ, កម្មំ កោបេតិ, ឥតរេសម្បិ ហត្ថបាសំ អនាគតត្តា កោបេតិ. ឯវំ អត្តនា វា អត្តានំ នានាសំវាសកំ ករោតិ. សមានសំវាសកន្តិ ឯត្ថាបិ យោ អធម្មវាទីនំ បក្ខេ និសិន្នោ ‘‘អធម្មវាទិនោ ឥមេ, ឥតរេ ធម្មវាទិនោ’’តិ តេសំ មជ្ឈំ បវិសតិ, យត្ថ វា តត្ថ វា បន បក្ខេ និសិន្នោ ‘‘ឥមេ ធម្មវាទិនោ’’តិ គណ្ហាតិ, អយំ អត្តនា វា អត្តានំ សមានសំវាសកំ ករោតីតិ វេទិតព្ពោ.

៤៥៦. កាយកម្មំ វចីកម្មន្តិ ឯត្ថ កាយេន បហរន្តា កាយកម្មំ ឧបទំសេន្តិ, ផរុសំ វទន្តា វចីកម្មំ ឧបទំសេន្តីតិ វេទិតព្ពា. ហត្ថបរាមាសំ ករោន្តីតិ កោធវសេន ហត្ថេហិ អញ្ញមញ្ញំ បរាមសនំ ករោន្តិ. អធម្មិយាយមានេតិ អធម្មិយានិ កិច្ចានិ កុរុមានេ. អសម្មោទិកាវត្តមានាយាតិ អសម្មោទិកាយ វត្តមានាយ. អយមេវ វា បាឋោ. សម្មោទនកថាយ អវត្តមានាយាតិ អត្ថោ. ឯត្តាវតា ន អញ្ញមញ្ញន្តិ ឯត្ថ ទ្វេ បន្តិយោ កត្វា ឧបចារំ មុញ្ចិត្វា និសីទិតព្ពំ, ធម្មិយាយមានេ បន សម្មោទិកាយ វត្តមានាយ អាសនន្តរិកាយ និសីទិតព្ពំ, ឯកេកំ អាសនំ អន្តរំ កត្វា និសីទិតព្ពំ.

៤៥៧-៤៥៨. មា ភណ្ឌនន្តិអាទីសុ ‘‘អកត្ថា’’តិ បាឋសេសំ គហេត្វា ‘‘មា ភណ្ឌនំ អកត្ថា’’តិ ឯវមត្ថោ ទដ្ឋព្ពោ. អធម្មវាទីតិ ឧក្ខិត្តានុវត្តកេសុ អញ្ញតរោ. អយំ បន ភិក្ខុ ភគវតោ អត្ថកាមោ, អយំ កិរស្ស អធិប្បាយោ ‘‘ឥមេ ភិក្ខូ កោធាភិភូតា សត្ថុ វចនំ ន គណ្ហន្តិ, មា ភគវា ឯតេ ឱវទន្តោ កិលមិត្ថា’’តិ តស្មា ឯវមាហ. ភគវា បន ‘‘បច្ឆាបិ សញ្ញំ លភិត្វា ឱរមិស្សន្តី’’តិ តេសំ អនុកម្បាយ អតីតវត្ថុំ អាហរិត្វា កថេសិ. តត្ថ អនត្ថតោតិ អនត្ថោ អតោ; ឯតស្មា មេ បុរិសា អនត្ថោតិ វុត្តំ ហោតិ. អថ វា អនត្ថតោតិ អនត្ថទោ. សេសំ បាកដមេវ.

៤៦៤. បុថុសទ្ទោតិអាទិគាថាសុ បន បុថុ មហា សទ្ទោ អស្សាតិ បុថុសទ្ទោ. សមជនោតិ សមានោ ឯកសទិសោ ជនោ; សព្ពោ ចាយំ ភណ្ឌនការកោជនោ សមន្តតោ សទ្ទនិច្ឆារណេន បុថុសទ្ទោ ចេវ សទិសោ ចាតិ វុត្តំ ហោតិ. ន ពាលោ កោចិ មញ្ញថាតិ តត្ថ កោចិ ឯកោបិ ‘‘អហំ ពាលោ’’តិ ន មញ្ញិត្ថ; សព្ពេបិ បណ្ឌិតមានិនោយេវ. នាញ្ញំ ភិយ្យោ អមញ្ញរុន្តិ កោចិ ឯកោបិ ‘‘អហំ ពាលោ’’តិ ច ន មញ្ញិត្ថ; ភិយ្យោ ច សង្ឃស្មិំ ភិជ្ជមានេ អញ្ញម្បិ ឯកំ ‘‘មយ្ហំ ការណា សង្ឃោ ភិជ្ជតី’’តិ ឥទំ ការណំ ន មញ្ញិត្ថាតិ អត្ថោ.

បរិមុដ្ឋាតិ បរិមុដ្ឋស្សតិនោ. វាចាគោចរភាណិនោតិ រាការស្ស រស្សាទេសោ កតោ, វាចាគោចរា ន សតិបដ្ឋានាទិគោចរា. ភាណិនោ ច កថំ ភាណិនោ? យាវិច្ឆន្តិ មុខាយាមំ យាវ មុខំ បសារេតុំ ឥច្ឆន្តិ, តាវ បសារេត្វា ភាណិនោ, ឯកោបិ សង្ឃគារវេន មុខសង្កោចំ ន ករោតីតិ អត្ថោ. យេន នីតាតិ យេន កលហេន ឥមំ និល្លជ្ជភាវំ នីតា. ន តំ វិទូតិ ន តំ ជានន្តិ, ‘‘ឯវំ សាទីនវោ អយ’’ន្តិ.

យេ ច តំ ឧបនយ្ហន្តីតិ តំ ‘‘អក្កោច្ឆិ មំ, អវធិ ម’’ន្តិអាទិកំ អាការំ យេ ច ឧបនយ្ហន្តិ. សនន្តនោតិ បោរាណោ.

បរេតិ បណ្ឌិតេ ឋបេត្វា តតោ អញ្ញេ ភណ្ឌនការកា បរេ នាម. តេ ឯត្ថ សង្ឃមជ្ឈេ កលហំ ករោន្តា ‘‘មយំ យមាមសេ ឧបយមាម; សតតំ សមិតំ មច្ចុសន្តិកំ គច្ឆាមា’’តិ ន ជានន្តិ. យេ ច តត្ថ វិជានន្តីតិ យេ តត្ថ បណ្ឌិតា ‘‘មយំ មច្ចុសមីបំ គច្ឆាមា’’តិ វិជានន្តិ. តតោ សម្មន្តិ មេធគាតិ ឯវញ្ហិ តេ ជានន្តា យោនិសោមនសិការំ ឧប្បាទេត្វា មេធគានំ កលហានំ វូបសមាយ បដិបជ្ជន្តិ.

អដ្ឋិច្ឆិន្នាតិ អយំ គាថា ព្រហ្មទត្តញ្ច ទីឃាវុកុមារញ្ច សន្ធាយ វុត្តា. តេសម្បិ ហោតិ សង្គតិ, កស្មា តុម្ហាកំ ន ហោតិ, យេសំ វោ នេវ មាតាបិតូនំ អដ្ឋីនិ ឆិន្នានិ, ន បាណា ហតា, ន គវាស្សធនានិ ហដានីតិ.

សចេ លភេថាតិអាទិគាថា បណ្ឌិតសហាយស្ស ច ពាលសហាយស្ស ច វណ្ណាវណ្ណទីបនត្ថំ វុត្តា. អភិភុយ្យ សព្ពានិ បរិស្សយានីតិ បាកដបរិស្សយេ ច បដិច្ឆន្នបរិស្សយេ ច អភិភវិត្វា តេន សទ្ធិំ អត្តមនោ សតិមា ចរេយ្យ.

រាជាវ រដ្ឋំ វិជិតន្តិ យថា អត្តនោ វិជិតំ រដ្ឋំ មហាជនករាជា ច អរិន្ទមមហារាជា ច បហាយ ឯកកា ចរិំសុ; ឯវំ ចរេយ្យាតិ អត្ថោ. មាតង្គរញ្ញេវ នាគោតិ មាតង្គោ អរញ្ញេ នាគោវ. មាតង្គោតិ ហត្ថី វុច្ចតិ; នាគោតិ មហន្តាធិវចនមេតំ. យថា ហិ មាតុបោសកោ មាតង្គនាគោ អរញ្ញេ ឯកោ ចរិ, ន ច បាបានិ អកាសិ. យថា ច បាលិលេយ្យកោ, ឯវំ ឯកោ ចរេ, ន ច បាបានិ កយិរាតិ វុត្តំ ហោតិ.

បាលិលេយ្យកគមនកថា

៤៦៧. បាលិលេយ្យកេ វិហរតិ រក្ខិតវនសណ្ឌេតិ បាលិលេយ្យកំ ឧបនិស្សាយ រក្ខិតវនសណ្ឌេ វិហរតិ. ហត្ថិនាគោតិ មហាហត្ថី. ហត្ថិកលភេហីតិ ហត្ថិបោតកេហិ. ហត្ថិច្ឆាបេហីតិ ខីរូបកេហិ ទហរបោតកេហិ. ឆិន្នគ្គានីតិ តេហិ បុរតោ បុរតោ គច្ឆន្តេហិ ឆិន្នគ្គានិ ខាយិតាវសេសានិ ខាណុសទិសានិ តិណានិ ខាទតិ. ឱភគ្គោភគ្គន្តិ តេន ហត្ថិនាគេន ឧច្ចដ្ឋានតោ ភញ្ជិត្វា ភញ្ជិត្វា បាតិតំ. អស្ស សាខាភង្គន្តិ ឯតស្ស សន្តកំ សាខាភង្គំ តេ ខាទន្តិ. អាវិលានីតិ តេហិ បឋមតរំ ឱតរិត្វា បិវន្តេហិ អាលុលិតានិ កទ្ទមោទកានិ បិវតិ. ឱគាហាតិ តិត្ថតោ.

នាគស្ស នាគេនាតិ ហត្ថិនាគស្ស ពុទ្ធនាគេន. ឦសាទន្តស្សាតិ រថឦសាសទិសទន្តស្ស. យទេកោ រមតី វនេតិ យស្មា ពុទ្ធនាគោ វិយ អយម្បិ ហត្ថិនាគោ ឯកោ បវិវិត្តោ វនេ រមតិ; តស្មាស្ស នាគស្ស នាគេន ចិត្តំ សមេតិ, ឯកីភាវរតិយា ឯកសទិសំ ហោតីតិ អត្ថោ.

យថាភិរន្តំ វិហរិត្វាតិ ឯត្ថ តេមាសំ ភគវា តត្ថ វិហាសីតិ វេទិតព្ពោ. ឯត្តាវតា កោសម្ពកេហិ កិរ ឧព្ពាឡ្ហោ ភគវា តេមាសំ អរញ្ញំ បវិសិត្វា វសីតិ សព្ពត្ថ កថា បត្ថដា អហោសិ.

អថ ខោ កោសម្ពកា ឧបាសកាតិ អថ ខោ ឥមំ កថាសល្លាបំ សុត្វា កោសម្ពិវាសិនោ ឧបាសកា.

អដ្ឋារសវត្ថុកថា

៤៦៨. អធម្មំ ធម្មោតិអាទីនិ អដ្ឋារស ភេទករវត្ថូនិ សង្ឃភេទកក្ខន្ធកេ វណ្ណយិស្សាម.

៤៧៥. តំ ឧក្ខិត្តកំ ភិក្ខុំ ឱសារេត្វាតិ តំ គហេត្វា សីមំ គន្ត្វា អាបត្តិំ ទេសាបេត្វា កម្មវាចាយ ឱសារេត្វា. តាវទេវ ឧបោសថោតិ តំទិវសមេវ ឧបោសថក្ខន្ធកេ វុត្តនយេនេវ សាមគ្គីឧបោសថោ កាតព្ពោ.

៤៧៦. អមូលា មូលំ គន្ត្វាតិ ន មូលា មូលំ គន្ត្វា; តំ វត្ថុំ អវិនិច្ឆិនិត្វាតិ អត្ថោ. អយំ វុច្ចតិ ឧបាលិ សង្ឃសាមគ្គី អត្ថាបេតា ព្យញ្ជនូបេតាតិ អត្ថតោ អបគតា, ‘‘សង្ឃសាមគ្គី’’តិ ឥមំ បន ព្យញ្ជនមត្តំ ឧបេតា.

៤៧៧. សង្ឃស្ស កិច្ចេសូតិ សង្ឃស្ស ករណីយេសុ ឧប្បន្នេសុ. មន្តនាសូតិ វិនយមន្តនាសុ. អត្ថេសុ ជាតេសូតិ វិនយអត្ថេសុ ឧប្បន្នេសុ. វិនិច្ឆយេសូតិ តេសំយេវ អត្ថានំ វិនិច្ឆយេសុ. មហត្ថិកោតិ មហាឧបការោ. បគ្គហារហោតិ បគ្គណ្ហិតុំ វុត្តោ.

អនានុវជ្ជោ បឋមេន សីលតោតិអាទិម្ហិយេវ តាវ សីលតោ ន ឧបវជ្ជោ. អវេក្ខិតាចារោតិ អបេក្ខិតាចារោ; អាលោកិតេ វិលោកិតេ សម្បជានការីតិអាទិនា នយេន ឧបបរិក្ខិតាចារោ. អដ្ឋកថាសុ បន ‘‘អប្បដិច្ឆន្នាចារោ’’តិ វុត្តំ.

វិសយ្ហាតិ អភិភវិត្វា. អនុយ្យុតំ ភណន្តិ អនុញ្ញាតំ អនបគតំ ភណន្តោ. យស្មា ហិ សោ អនុយ្យុតំ ភណតិ, ឧសូយាយ វា អគតិគមនវសេន វា ការណាបគតំ ន ភណតិ, តស្មា អត្ថំ ន ហាបេតិ. ឧសូយាយ បន អគតិគមនវសេន វា ភណន្តោ អត្ថំ ហាបេតិ, ការណំ ន ទេតិ, តស្មា សោ បរិសគតោ ឆម្ភតិ ចេវ វេធតិ ច. យោ ឦទិសោ ន ហោតិ, អយំ ‘‘បគ្គហារហោ’’តិ ទស្សេតិ.

កិញ្ច ភិយ្យោ ‘‘តថេវ បញ្ហ’’ន្តិ គាថា, តស្សត្ថោ – យថា ច អនុយ្យុតំ ភណន្តោ អត្ថំ ន ហាបេតិ, តថេវ បរិសាយ មជ្ឈេ បញ្ហំ បុច្ឆិតោ សមានោ ន ចេវ បជ្ឈាយតិ, ន ច មង្កុ ហោតិ. យោ ហិ អត្ថំ ន ជានាតិ, សោ បជ្ឈាយតិ. យោ វត្តុំ ន សក្កោតិ, សោ មង្កុ ហោតិ. យោ បន អត្ថញ្ច ជានាតិ, វត្តុញ្ច សក្កោតិ; សោ ន បជ្ឈាយតិ, ន មង្កុ ហោតិ. កាលាគតន្តិ កថេតព្ពយុត្តកាលេ អាគតំ. ព្យាករណារហន្តិ បញ្ហស្ស អត្ថានុលោមតាយ ព្យាករណានុច្ឆវិកំ. វចោតិ វទន្តោ; ឯវរូបំ វចនំ ភណន្តោតិ អត្ថោ. រញ្ជេតីតិ តោសេតិ. វិញ្ញូបរិសន្តិ វិញ្ញូនំ បរិសំ.

អាចេរកម្ហិ ច សកេតិ អត្តនោ អាចរិយវាទេ. អលំ បមេតុន្តិ វីមំសិតុំ តំ តំ ការណំ បញ្ញាយ តុលយិតុំ សមត្ថោ. បគុណោតិ កតបរិចយោ លទ្ធាសេវនោ. កថេតវេតិ កថេតព្ពេ. វិរទ្ធិកោវិទោតិ វិរទ្ធដ្ឋានកុសលោ.

បច្ចត្ថិកា យេន វជន្តីតិ អយំ គាថា យាទិសេ កថេតព្ពេ បគុណោ, តំ ទស្សេតុំ វុត្តា. អយញ្ហេត្ថ អត្ថោ – យាទិសេន កថិតេន បច្ចត្ថិកា ច និគ្គហំ គច្ឆន្តិ, មហាជនោ ច សញ្ញបនំ គច្ឆតិ; សញ្ញត្តិំ អវពោធនំ គច្ឆតីតិ អត្ថោ. យញ្ច កថេន្តោ សកំ អាទាយំ អត្តនោ អាចរិយវាទំ ន ហាបេតិ, យស្មិំ វត្ថុស្មិំ អធិករណំ ឧប្បន្នំ, តទនុរូបំ អនុបឃាតករំ បញ្ហំ ព្យាករមានោ តាទិសេ កថេតព្ពេ បគុណោ ហោតីតិ.

ទូតេយ្យកម្មេសុ អលន្តិ អដ្ឋហិ ទូតង្គេហិ សមន្នាគតត្តា សង្ឃស្ស ទូតេយ្យកម្មេសុ សមត្ថោ. សុដ្ឋុ ឧគ្គណ្ហាតីតិ សមុគ្គហោ. ឥទំ វុត្តំ ហោតិ – យថា នាម អាហុនំ អាហុតិបិណ្ឌំ សមុគ្គណ្ហន្តិ, ឯវំ បីតិសោមនស្សជាតេនេវ ចេតសា សង្ឃស្ស កិច្ចេសុ សមុគ្គហោ, សង្ឃស្សកិច្ចេសុ តស្ស តស្ស កិច្ចស្ស បដិគ្គាហកោតិ អត្ថោ. ករំ វចោតិ វចនំ ករោន្តោ. ន តេន មញ្ញតីតិ តេន វចនករណេន ‘‘អហំ ករោមិ, សង្ឃភារំ និត្ថរាមី’’តិ ន មានាតិមានំ ជប្បេតិ.

អាបជ្ជតិ យាវតកេសុ វត្ថូសូតិ យត្តកេសុ វត្ថូសុ អាបត្តិំ អាបជ្ជមានោ អាបជ្ជតិ. ហោតិ យថា ច វុដ្ឋិតីតិ តស្សា ច អាបត្តិយា យថា វុដ្ឋានំ ហោតិ. ឯតេ វិភង្គាតិ យេសុ វត្ថូសុ អាបជ្ជតិ, យថា ច វុដ្ឋានំ ហោតិ, ឥមេសំ អត្ថានំ ជោតកា ឯតេ វិភង្គា. ឧភយស្សាតិ ឧភយេ អស្ស. ស្វាគតាតិ សុដ្ឋុ អាគតា. អាបត្តិវុដ្ឋានបទស្ស កោវិទោតិ អាបត្តិវុដ្ឋានការណកុសលោ.

យានិ ចាចរន្តិ យានិ ច ភណ្ឌនការណាទីនិ អាចរន្តោ តជ្ជនីយកម្មាទិវសេន និស្សារណំ គច្ឆតិ. ឱសារណំ តំវុសិតស្ស ជន្តុនោតិ តំ វត្តំ វុសិតស្ស ជន្តុនោ, យា ឱសារណា កាតព្ពា, ឯតម្បិ ជានាតិ. សេសំ សព្ពត្ថ ឧត្តានមេវាតិ.

កោសម្ពកក្ខន្ធកវណ្ណនា និដ្ឋិតា.

សមន្តបាសាទិកាយ វិនយសំវណ្ណនាយ

មហាវគ្គវណ្ណនា សមត្តា.

មហាវគ្គ-អដ្ឋកថា និដ្ឋិតា.