៣. សេខសុត្តវណ្ណនា

៥២៣. តតិយេ ន ហេវ ខោ កាយេន ផុសិត្វា វិហរតីតិ ន នាមកាយេន ផុសិត្វា បដិលភិត្វា វិហរតិ, ផុសិតុំ បដិលភិតុំ ន សក្កោតិ. បញ្ញាយ ច អតិវិជ្ឈ បស្សតីតិ បច្ចវេក្ខណបញ្ញាយ បន ‘‘ឧបរិ អរហត្តផលិន្ទ្រិយំ នាម អត្ថី’’តិ បជានាតិ. អសេខភូមិយំ ផុសិត្វា វិហរតីតិ បដិលភិត្វា វិហរតិ. បញ្ញាយាតិ បច្ចវេក្ខណបញ្ញាយ ‘‘អរហត្តផលិន្ទ្រិយំ នាម អត្ថី’’តិ បជានាតិ. ន កុហិញ្ចិ កិស្មិញ្ចីតិ ទ្វេបិ អញ្ញមញ្ញវេវចនានេវ, កិស្មិញ្ចិ ភវេ ន ឧប្បជ្ជិស្សន្តីតិ អត្ថោ. ឥមស្មិំ សុត្តេ បញ្ចិន្ទ្រិយានិ លោកុត្តរានិ, ឆ លោកិកានិ វដ្ដនិស្សិតានេវ កថិតានិ.