៦. បឋមវិភង្គសុត្តវណ្ណនា

៥០៦. ឆដ្ឋេ កាយិកន្តិ កាយបសាទវត្ថុកំ. សុខន្តិ អយមស្ស សរូបនិទ្ទេសោ. សាតន្តិ តស្សេវ វេវចនំ, មធុរន្តិ វុត្តំ ហោតិ. កាយសម្ផស្សជន្តិ កាយសម្ផស្សតោ ជាតំ. សុខំ សាតន្តិ វុត្តនយមេវ. វេទយិតន្តិ អយមស្ស សព្ពវេទនាសាធារណោ អញ្ញធម្មវិសិដ្ឋោ សភាវនិទ្ទេសោ. ឥមិនា នយេន សេសេសុបិ អត្ថោ វេទិតព្ពោ. កាយិកំ វា ចេតសិកំ វាតិ ឯត្ថ បន ចក្ខាទយោ ចត្តារោ បសាទកាយេ វត្ថុំ កត្វា ឧប្បត្តិវសេន កាយិកន្តិ វុត្តំ. កាយបសាទវត្ថុកំ បន អទុក្ខមសុខំ នាម នត្ថិ.