៣. ទុតិយសំខិត្តសុត្តវណ្ណនា

៤៨៣. តតិយេ តតោតិ ផលវសេន និស្សក្កំ វេទិតព្ពំ. សមត្តានិ ហិ បរិបុណ្ណានិ បញ្ចិន្ទ្រិយានិ អរហត្តផលិន្ទ្រិយានិ នាម ហោន្តិ, អរហត្តផលេន សមន្នាគតោ បុគ្គលោ អរហា នាម ហោតិ. អរហត្តផលតោ មុទុតរានិ អនាគាមិផលិន្ទ្រិយានិ នាម ហោន្តិ, តតោ មុទុតរានិ សកទាគាមិផលិន្ទ្រិយានិ, តតោ មុទុតរានិ សោតាបត្តិផលិន្ទ្រិយានិ, សោតាបត្តិផលេន សមន្នាគតោ បុគ្គលោ សោតាបន្នោ នាម ហោតិ. ឥន្ទ្រិយវេមត្តតា ផលវេមត្តតា ហោតីតិ ឥន្ទ្រិយនានត្តេន ផលនានត្តំ, ផលនានត្តេន បុគ្គលនានត្តន្តិ.