៥. អមតវគ្គោ

២. សមុទយសុត្តវណ្ណនា

៤០៨. បញ្ចមវគ្គស្ស ទុតិយេ អាហារសមុទយា កាយស្ស សមុទយោតិ អាហារសមុទយេន កាយសមុទយោ. ឯសេវ នយោ សេសេសុ. មនសិការសមុទយាតិ ឯត្ថ បន យោនិសោមនសិការសមុទយា ពោជ្ឈង្គធម្មានំ សមុទយោ, អយោនិសោមនសិការសមុទយា នីវរណធម្មានំ. ឥតិ ឥមស្មិំ សុត្តេ សារម្មណសតិបដ្ឋានា កថិតា.

៤. សតិសុត្តវណ្ណនា

៤១០. ចតុត្ថំ សុទ្ធិកំ កត្វា សមុទយេ កថិតេ ពុជ្ឈនកានំ អជ្ឈាសយេន វុត្តំ.

៦. បាតិមោក្ខសំវរសុត្តវណ្ណនា

៤១២. ឆដ្ឋេ បាតិមោក្ខសំវរសំវុតោតិ ចតុន្នំ សីលានំ ជេដ្ឋកសីលំ ទស្សេន្តោ ឯវមាហ. តិបិដកចូឡនាគត្ថេរោ បនាហ – ‘‘បាតិមោក្ខសំវរោវ សីលំ, ឥតរានិ តីណិ សីលន្តិ វុត្តដ្ឋានំ នាម នត្ថី’’តិ. វត្វា តំ អនុជានន្តោ អាហ – ‘‘ឥន្ទ្រិយសំវរោ នាម ឆទ្វាររក្ខណមត្តមេវ, អាជីវបារិសុទ្ធិ ធម្មេនេវ សមេន បច្ចយុប្បត្តិមត្តកំ, បច្ចយសន្និស្សិតំ បដិលទ្ធបច្ចយេ ឥទមត្ថន្តិ បច្ចវេក្ខិត្វា បរិភុញ្ជនមត្តកំ. និប្បរិយាយេន បាតិមោក្ខសំវរោវ សីលំ. យស្ស សោ ភិន្នោ, អយំ ឆិន្នសីសោ វិយ បុរិសោ ហត្ថបាទេ, សេសានិ រក្ខិស្សតីតិ ន វត្តព្ពោ. យស្ស បន សោ អរោគោ, អយំ អច្ឆិន្នសីសោ វិយ បុរិសោ ជីវិតំ, សេសានិ បុន បាកតិកានិ កត្វា រក្ខិតុម្បិ សក្កោតី’’តិ. តស្មា បាតិមោក្ខសំវរោវ សីលំ, តេន បាតិមោក្ខសំវរេន សំវុតោតិ បាតិមោក្ខសំវរសំវុតោ, ឧបេតោ សមន្នាគតោតិ អត្ថោ.

អាចារគោចរសម្បន្នោតិ អាចារេន ច គោចរេន ច សម្បន្នោ. អណុមត្តេសូតិ អប្បមត្តកេសុ. វជ្ជេសូតិ អកុសលធម្មេសុ. ភយទស្សាវីតិ ភយទស្សី. សមាទាយាតិ សម្មា អាទិយិត្វា. សិក្ខស្សុ សិក្ខាបទេសូតិ សិក្ខាបទេសុ តំ តំ សិក្ខាបទំ សមាទិយិត្វា សិក្ខ, យំ យំ បន កិញ្ចិ សិក្ខាបទេសុ សិក្ខាកោដ្ឋាសេសុ សិក្ខិតព្ពំ កាយិកំ វា វាចសិកំ វា, តំ តំ សព្ពំ សម្មា អាទាយ សិក្ខស្សូតិ អយមេត្ថ សង្ខេបត្ថោ. វិត្ថារោ បន វិសុទ្ធិមគ្គេ (វិសុទ្ធិ. ១.១៤) វុត្តោ. ឥតិ ឥមស្មិំ សុត្តេ បាតិមោក្ខសំវរសីលមេវ កថិតំ.

៧. ទុច្ចរិតសុត្តវណ្ណនា

៤១៣. សត្តមេ កាយសុចរិតវចីសុចរិតានិ បាតិមោក្ខសំវរសីលំ, មនោសុចរិតំ ឥតរានិ តីណិ សីលានីតិ ចតុបារិសុទ្ធិសីលំ កថិតំ ហោតិ. ឥមិនា នយេន បញ្ចសត្តនវទសសុ កុសលកម្មបថេសុ បច្ឆិមាបិ តយោ សីលំ ហោតីតិ វេទិតព្ពា. សេសំ ឧត្តានមេវាតិ. ឆដ្ឋសត្តមេសុ ហេដ្ឋា វុត្តនយេនេវ អត្ថោ វេទិតព្ពោ.

អមតវគ្គោ បញ្ចមោ.

សតិបដ្ឋានសំយុត្តវណ្ណនា និដ្ឋិតា.