៨. សូទសុត្តវណ្ណនា

៣៧៤. អដ្ឋមេ សូទោតិ ភត្តការកោ. នានច្ចយេហីតិ នានាចយេហិ, នានាវិធេហីតិ អត្ថោ. អយមេវ វា បាឋោ. អម្ពិលគ្គេហីតិ អម្ពិលកោដ្ឋាសេហិ. ឯសេវ នយោ សព្ពត្ថ. អភិហរតីតិ គហណត្ថាយ ហត្ថំ បសារេតិ. ពហុំ គណ្ហាតីតិ ឯកគ្គហណេន ពហុំ គណ្ហន្តោបិ បុនប្បុនំ គណ្ហន្តោបិ ពហុំ គណ្ហតេវ. អភិហារានន្តិ សតំ វា សហស្សំ វា ឧក្ខិបិត្វា អភិហដានំ ទាយានំ. ឧបក្កិលេសាតិ បញ្ច នីវរណា. និមិត្តំ ន ឧគ្គណ្ហាតីតិ ‘‘ឥមំ មេ កម្មដ្ឋានំ អនុលោមំ វា គោត្រភុំ វា អាហច្ច ឋិត’’ន្តិ ន ជានាតិ, អត្តនោ ចិត្តស្ស និមិត្តំ គណ្ហិតុំ ន សក្កោតិ. ឥមស្មិំ សុត្តេ បុព្ពភាគវិបស្សនា សតិបដ្ឋានាវ កថិតា.